ބޮޑު އެއްވުމަށް މާލެއައުމަށް ރައްޔިތުންތިބީ ކެތް މަދުވެފައި-ޝިފާޒު
10 މޭ 2015 22:07
ސަރުކާރާ އިދިކޮޅު ޕާޓީތައް ގުޅިގެން ބޭއްވުމަށް ރާވަމުންދާ ބޮޑު މުޒާހަރާއަށް މާލެއައުމަށް ރައްޔިތުން ތިބީ ކެތްމަދުވެފައި ކަމަށް އެމްޑީޕީގެ ނާއިބު ރައީސް މުޙައްމަދު ޝިފާޒު ވިދާޅުވެއްޖެއެވެ.
ޢަދާލަތު ޕާޓީން އިސްވެ އޮވެގެން ފަށައިފައިވާ "އަނިޔާވެރިކަން ނިންމަން" ޙަރަކާތުގެ ދަށުން މޭޑޭގައި ބޭއްވި އެއްވުމަށްފަހު ރައްޔިތުން ގެއަށްދިޔައީ ވަރަށް ފޮނި އުންމީދުގައި ކަމަށާއި އެފަދަ ދެވަނަ އެއްވުކަށް މަގުތަކަށް ނުކުންނަން ރައްޔިތުން ތިބީ ކެތްމަދުވެފައި ކަމަށް ޝިފާޒު ވިދާޅުވިއެވެ.
"މޭޑޭގެ މުޒާހަރާއަށްފަހު ރައްޔިތުންގެ މޯޓިވޭޝަންވަނީ ވަރަށް ބޮޑަށް ރަނގަޅުވެފައި. ރަށްރަށުން މިހާރުވެސް ގުޅާފައި އަހަމުންދަނީ ދެން ކޮންއިރަކުހޭ އެފަދަ އެއްވުމެއް ބާއްވާނީ. އަވަހަށް ތާރީޚު އަންގައިދޭށޭ،" ޝިފާޒު ވިދާޅުވިއެވެ.
އިދިކޮޅު ފަރާތްތަކުންވަނީ ދެންއޮންނަ އެއްވުން ބާއްވާނީ ފަންސާސްހާސް މީހުންނާއެކު ކަމަށް ބުނެ އިޢުލާން ކޮށްފައެވެ. ނަމަވެސް އެއްވުން ބާއްވާނެ ތާރީޚެއް އަދި އިޢުލާން ކޮށްފައެއް ނުވެއެވެ. ނަަމަވެސް ކުރިއަށްއޮތް މަހެއްހާ ދުވަސްތެރޭގައި އެއްވުން ބާއްވާނެ ކަމަށް ޝިފާޒު ވިދާޅުވިއެވެ.
"ރަށްރަށުގައި ހުރި ޕާޓީތަކުގެ ޖަގަހަތަކުންނާއި، މާލޭގައި ހުރި ޕާޓީތަކުގެ އޮފީސްތަކާއި، ޖަގަހަތަކުން ގެންދަނީ އެދުވަހަށް ތައްޔާރު ވުމުގެ މަސައްކަތް ކުރަމުން. މިބަލަނީ ވީހާވެސް ގިނަޢަދަދެއްގެ މީހުންނާއެކު މަގުތަކަށް ނުކުމެ ސަރުކާރުގެ އަނިޔާވެރިކަން ނިމުމަކަށް ގެނައުމަށް ސަރުކާރަށް ގޮވާލަން. މީގެ އޮތް ޕުލަސް ޕޮއިންޓަކީ މޭޑޭގެ އެއްވުމަށްފަހު ރައްޔިތުން ތިބީ ދެވަނަ އެއްވުމަކަށް ވަރަށް ބޮޑަށް ޝައުޤުވެރިވެފައި. އެކަމުގެ ވޯޓިވޭޝަންވެސް ވަރަށް ރަނގަޅަށް ރައްޔިތުންގެހުރީ،" ޝިފާޒު ވިދާޅުވިއެވެ.
ކިޔުންތެރިންގެ ހިޔާލު