މިނިވަންކަމާއެކު ސިޔާސީ ވާހަކަ ދެއްކުމުގެ ފުރުސަތު މިޤައުމަކުނެތް- ޖޭޕީ ރެޖިސްޓްރަރ

ރައިސް ޔާމީންގެ ސަރުކާރުންވަނީ މިނިވަން ކަމާއެކު ސިޔާސީ ވާހަކަ ދެއްކުމުގެ ފުރުސަތު ސިޔާސީ ލީޑަރުންނަށްވެސް ބަންދުކޮށްފައި ކަމަށް ޖުމްހުރީޕާޓީގެ ރެޖިސްޓްރަރ އަޙުމަދު ސަޢުދުވާ ވިދާޅުވެއްޖެއެވެ.

އަޙުމަދު ވިދާޅުވީ މިނިވަންކަމާއެކު ސިޔާސީ ވާހަކަ ދައްކަން ނުކުންނަ ކޮންމެ ލީޑަރަކުވެސް މިހާރު ވަންނަން ޖެހިފައިވަނީ ޖަލަށް ކަމަށެވެ. އެގޮތުން ޖުމްހޫރީޕާޓީގެ ޑެޕިޔުޓީ ލީޑަރު އަމީން އިބްރާހީމާއި، ޢަދާލަތު ޕާޓީގެ ރައީސް އައްޝައިޚް އިމްރާން ޢަބްދުﷲ އާއި، އެމްޑީޕީގެ ޗެއަރޕާސަން ޢަލީ ވަޙީދު މިނިވަން ކަމާއެކު ޚިޔާލު ފާޅުކުރަމުން ގެންދަނިކޮށް ވަނީ ޖަލަށް ލާފައި ކަމަށް ވިދާޅުވިއެވެ.

އެއީ ސަރުކާރުން އެއްގޮތަކަށްވެސް ކަންކަން ކޮށްގެންވާނެ ގޮތެއް ނޫންކަމަށާއި ޤާނޫނީ އިމުން ބޭރުނުވާހާ ހިނދަކު ކޮންމެ މީހަކަށްވެސް ޚިޔާލުފާޅު ކުރުމުގެ މިނިވަންކަމުގެ ތެރެއިން ފުރުސަތު ލިބެންވާނެ ކަމަށްވެސް ވިދާޅުވިއެވެ. އަޙުމަދު ވިދާޅުވީ ޖުމްހޫރީ ޕާޓީގެ ލީޑަރު ޤާސިމް އިބްރާހީމާ މެދުވެސް ސަރުކާރުން ކަންކަން ކުރަމުންދަނީ ވަރަށް "އަނިޔާވެރިކޮށް" ކަމަށެވެ.

ޤާސިމް ފަދަ ބޭފުޅުންނަކީ ޤައުމަށާއި، ރައްޔިތުންނަށް ހުރިހާ ގޮތަކުންވެސް ޚިދުމަތް ކޮށްދެއްވާފައިވާ އަދި ކޮށްދެއްވަމުން ގެންދަވާ ލީޑަރުންނަށްވާތީ އެބޭފުޅުންނަށް އަނިޔާވެރިވުމަކީ ޤާނޫނީ އިމުގެތެރޭގައި ތިއްބަވާހާ ހިނދަކު އެއްގޮތަކަށްވެސް ކޮށްގެންވާނެ ކަމެއް ނޫންކަމަށްވެސް އަޙުމަދު ވިދާޅުވިއެވެ.

އޭނާ ވިދާޅުވީ ރައްޔިތުންގެ މަޖިލީހުގެ މެންބަރުންނަށްވެސް މިނިވަންކާމާއެކު އެއްވެސް ވާހަކައެއް މިހާރު ނުދެއްކެވޭ ކަމަށެވެ. ސަރުކާރާ ދެކޮޅަށް ކިރިޔާވެސް އެއްޗެއް ވިދާޅުވާއިރަށް އެބޭފުޅަކު ތަމްސީލް ކުރައްވަމުން ގެންދަވާ ދާއިރާއަށް ކޮށްދެއްވާ ނުވަތަ ކޮށްދެއްވަން ނިންމަވާފައިވާ ކަންކަން ސަރުކާރުން ހުއްޓާލާ ކަަމަށްވެސް ވިދާޅުވިއެވެ.

ސަރުކާރުން ކުރަމުންދާ އެފަދަ ޢަމަލް ހުއްޓާލުމަށްފަހު ޤައުމުގެގެ ކަންކަން ސުލްޙައިގެ މަގުން ގެންދިޔުމަށް އިނދިކޮޅު ފަރާތްތަކާއެކު މަޝްވަރާކުރުމަކީ ސަރުކާރުން މިވަގުތަށް ޤައުމަށްޓަކައި ކުރަންޖެހޭ އެންމެ މުހިންމު އެއްކަންތައް ކަމަށްވެސް އޭނާ ވިދާޅުވިއެވެ.

އަޙުމަދު ވިދާޅުވީ އެތައްހާސް ބަޔަކު މަގުތަކަށް ނުކުމެ މަޝްވަރާއަށް ސަރުކާރަށް ގޮވަމުންދާއިރު އެކަމަށް އިޖާބަ ނުދީ އޮތުމަކީ ސަރުކާރާމެދު އިތުބާރު ކުޑަވެ ރައްޔިތުންގެ ނުރުހުން އިންތިހާއަށް ކުރިމަތިވާނެ ކަމެއް ކަމަށެވެ. އޭގެ ނަތީޖާއަކަށްވާނީ އާޚިރުގައި ސަރުކާރު ނިމުމަކަށް އައުން ކަމަށްވެސް އަޙުމަދު ވިދާޅުވިއެވެ.

ޤާނޫނީ ސަރުކާރެއް އުފެދިގެން އަންނަނީ ރައްޔިތުންގެ ކިބައިން ކަމަށް ވީހިނދު ޤާނޫނީ ހަމަތަކުން ވެރިކަން ނިމުމަކަށް ގެނައުމުގެ ބާރުވެސް ރައްޔިތުންނަށް އޮންނާނެ ކަމަށް އޭނާ ވިދާޅުވިއެވެ.