ރައީސް ޔާމީނުގެ ދެކަނބަލުންނަށް ޕާކިސްތާނަށް ވަޑައިގެންފި
6 މޭ 2015 19:14
ޕާކިސްތާނުގެ ބޮޑުވަޒީރު ނަވާޒު ޝަރީފް ރައީސް ޔާމީނަށް މަރުޙަބާ ވިދާޅުވަނީ: ފޮޓޯ ރައީސް އޮފީސް
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ ދެކަނަބަލުން މިއަދު ޕާކިސްތާނަށް ވަޑައިގެންފިއެވެ.
ރައީސްގެ ދެކަނބަލުން ޕާކިސްތާނަށް ވަޑައިގެންނެވުމުން އިސްލާމްއާބާދުގެ ވައިގެ ބަނދަރުން، މަރުޙަބާ ވިދާޅުވީ ޕާކިސްތާނުގެ ބޮޑުވަޒީރު މުޙައްމަދު ނަވާޒް ޝަރީފެވެ.
ރައީސް ޔާމީނާއި އެމަނިކުފާނުގެ އަނބިކަންބަލުން ފާތިމަތު އިބްރާހީމް މަތިންދާ ބޯޓުން ފައިބައި ވަޑައިގެންނެވުމުން 21 ބަޑީގެ ސަލާމެއް ވަނީ އަރުވާފައެވެ. މިދަތުރުފުޅަކީ މިއަދުން ފެށިގެން މާދަމާގެ ނިޔަލަށް ރައީސުލްޖުމްހޫރިއްޔާ ކުރައްވާ ދަތުރުފުޅެކެވެ. މިދަތުރުފުޅުގައި ޕާކިސްތާނުގެ ރައީސް މަމްނޫން ޙުސައިނާއި، ބޮޑުވަޒީރު މުޙައްމަދު ނަވާޒް ޝަރީފާ ބައްދަލު ކުރައްވާނެއެވެ. އެ ބައްދަލުވުމުގައި ދެޤައުމުގެ ދެމެދު އޮންނަ ގުޅުން އިތުރަށް ބަދަހިކުރެއްވުމާ ބެހޭގޮތުން މަޝްވަރާ ކުރައްވާނެ ކަމަށް ރައީސް އޮފީހުން ބުނެފައިވެއެވެ. މީގެ އިތުރަށް ދެޤައުމުގެ ދެމެދުގައި ރަސްމީ ވާހަކަފުޅުތައް ބާއްވަވާނެއެވެ.
މީގެއިތުރަށް ކުޅިވަރާއި، ޞިއްޙަތާއި، ތަޢްލީމީ ދާއިރާއިންނާއި، މަސްތުވާތަކެއްޗާ ދެކޮޅަށް މަސައްކަތްކުރުމުގެ ގޮތުން ދެޤައުމު މެދު އެއްބަސްވުންތަކުގައި ސޮއިކުރެއްވުމަށް ވަނީ ހަމަޖެހިފައެވެ.
ރައީސުލްޖުމްހޫރިއްޔާގެ ދެކަނބަލުން ޕާކިސްތާނަށް ފުރާވަޑައިގަތީ، މި ދަތުރުފުޅަށް ޕާކިސްތާން ސަރުކާރުން ހަމަޖައްސަވައިދެއްވި ޚާއްޞަ މަތިންދާ ބޯޓެއްގައެވެ. ރައީސް މިދަތުރުފުޅު ފެށްޓެވީ މިއަދު ހެނދުނުއެވެ.
ކިޔުންތެރިންގެ ހިޔާލު