ނޫސްވެރިންނަށް ފަސޭހަކަމާއެކު މަޢުލޫމާތު ފޯރުކޮށްދިނުމަކީ އެންމެންގެ ޒިންމާއެއް-އެޗުއާރުސީއެމް

ނޫސްވެރިކަމަށް ބޭނުންވާނެ މަޢުލޫމާތު ފަސޭހަ ކަމާއެކު ނޫސްވެރިންނަށް ފޯރުކޮށްދިނުމަކީ ދައުލަތުގެ މުއައްސަސާތަކާއި އެހެނިހެން ފަރާތްތަކުގެ ޒިންމާއެއް ކަމަށް ހިއުމަން ރައިޓްސް ކޮމިޝަން އޮފްދަ މޯލްޑިވްސް (އެޗްއާރުސީއެމް) އިން މިއަދު ބުނެފިއެވެ.

މިއަދު ފާހަގަ ކުރަމުން އަންނަ ބައިނަލްއަޤުވާމީ ނޫސްވެރިކަމުގެ މިނިވަންކަމުގެ ދުވަހާ ގުޅިގެން އެޗްއާރުސީއެމުން ނެރުނު ބަޔާނެއްގައި ބުނެފައިވަނީ އެޒިންމާ "ފުރިހަމައަށް އަދާކުރުމާއެކު، ނޫސްވެރިކަމުގެ މިނިވަންކަމަށް އިޙްތިރާމްކުރުމަށް އެންމެހާ ފަރާތްތަކަށް" ގޮވައިލާ ކަމަށެވެ.

އެބަޔާނުގައި ބުނެފައިވަނީ ދިވެހި ނޫސްވެރިންނަށްވެސް ބިރުވެރިކަން އެބައޮތް ކަމަށެވެ. ރާއްޖެގެ ނޫސްވެރިކަމުގެ މިނިވަންކަން އޭގެ އެންމެ ފުރިހަމަ ގޮތުގައި ލިބިދިނުމަށްޓަކައި އެތަކެއް މަސައްކަތެއް ކުރަންޖެހިފައިވާކަަމަށެވެ.

ނޫސްވެރިންނަށް ލިބެންޖެހޭ ރައްކާތެރިކަމާއި މިނިވަންކަން ވަރަށް ފުރިހަމައަށް ދިވެހިރާއްޖޭގެ ޤާނޫނުއަސާސީގައި ބަޔާން ކޮށްފައިވީ ނަމަވެސް ނޫސްވެރިން ފާޅުކުރާ ޚިޔާލަކުން ނުވަތަ އަދާ ކުރާ ރޯލަކުން މިނިވަންކަން ގެއްލި ނުރައްކަލާއި ކުރިމަތިލާން ޖެހިފައިވާ ކަމަށްވެސް އެބަޔާނުގައި ބުނެފައިވެއެވެ.

އެބަޔާނުގައި ބުނެފައިވަނީ ރާއްޖޭގެ ނޫސްވެރިންނަށް ބިރު ދެއްކުމާއި މަރުގެ އިންޒާރު ދެމުން ގެންދާ ކަމަށެވެ. އޭގެ ސަބަބުން މަސައްކަތްތައް ކުރުމަށް ނޫސްވެރިންނަށް ތަފާތު ގޮންޖެހުންތައް އެބަހުރި ކަމަށްވެސް އެބަޔާނުގައި ބުނެފައިވެއެވެ. އެޗުއާރުސީއެމް އިން ބުނެފައިވަނީ މުޖުތަމަޢުގައި ހުރި މައްސަލަތަކަށް ޙައްލެއް ހޯދުމަށްޓަކައި އެއްވެސް ބިރުވެރި ކަމެއްނެތިވެ މިނިވަންކަމާއެކު ނޫސްވެރިންނަށް މަސައްކަތް ކުރެވެންޖެހޭނެ ކަމަށެވެ.