މިރޭގެ މުޒާހަރާ ސުހަވެރިއެއް ނޫން-ޕީއައިސީ
2 މޭ 2015 3:13
"އަނިޔާވެރިކަން ނިންމަން" ކަމަށްބުނެ އިދިކޮޅު ފަރާތްތަކުން މާލޭގައި މިރޭ ބޭއްވި މުޒާހަރާއަކީ ސުލްހަވެރި މުޒާހަރާއެއް ނޫންކަމަށް ޕޮލިސް އިންޓަރގްރިޓީ ކޮމިޝަން (ޕީއައިސީ) އިން ބުނެފިއެވެ.
މިރޭ ނެރުނު ބަޔާނެއްގައި ޕީއައިސީން ބުނެފައިވަނީ ސުލްހަވެރި މުޒާހަރާއެއް ކަމަށް ބުނެ މިރޭ ކުރިއަށް ގެންދިޔަ މުޒާހަރާ ސުލްހަވެރި ނުވިޔަސް މުޒާހަރާ ރޫޅާލުމަށް ފުލުހުން މަސައްކަތް ކޮށްފައިވަނީ ޤާނޫނާއި ޤަވާޢިދާ އެއްގޮތަށް ކަމަށެވެ.
އެމުޒާހަރާގެ ބައިވެރިންވަނީ ފުލުހުންނާ ދިމާއަށް ހަޑިހުތުރު އެއްޗެހި ކިޔާފައި ކަމަށާއި، އަދި ފުލުހުންނާ ދިމާކޮށް ޕޭވްމަންޓް ގަލާއި ތިމަރަބަރި ފަދަ ތަކެތިން ފުލުހުންނަށް ހަމަލާދީފައިވާ ކަމަށްވެސް ބުނެފައިވެއެވެ. އޭގެ ސަބަބުން ފުލުހުންނަށް އަނިޔާ ލިބިފައިވާ ކަމަށްވެސް ބުނެފައިވެއެވެ.
ފުލުހުން މުޒާހަރާ ކޮންޓްރޯލް ކުރުމަށްކުރި މަސައްކަތުގައި ހިނގި ހަމަނުޖެހުންތަކުގައި އާންމުންނަށްވެސް އަނިޔާ ލިބިފައިވާ ކަމަށް އެތަނުގެ ބަޔާނުގައި ބުނެފައިވެއެވެ. އެހެންނަމަވެސް މުޒާހަރާ ރޫޅާލުމަށް ފުލުހުން މަސައްކަތްކޮށްފައިވަނީ ވަރަށް ކެތްތެރިކަމާއެކު ކަމަށްވެސް ބުނެފައިވެއެވެ. މުޒާހަރާ ރޫޅާލުމަށް އެކަށީގެން ނުވާ ބާރެެއް ނުވަތަ ފޯސްއެއްވެސް ބޭނުންކޮށްފައި ނުވާކަމަށް ބުނެފައިވެއެވެ. މިއަދު ހަވީރު ފެށި މުޒާހަރާގައި އެތައްހާސް ބަޔަކުވަނީ ބައިވެރިވެފައެވެ.
ކިޔުންތެރިންގެ ހިޔާލު