މޭޑޭގެ ބޮޑު މުޒާހަރާ ފަށައިގެން ސޯޝަލް ސެންޓަރ ކައިރީ މަޑުކޮށްފި

ސަރުކާރުގެ އަނިޔާވެރިކަމާ ދެކޮޅަށް ކަމަށް ބުނެ އިދިކޮޅު ޕާޓީތަކުން ގުޅިގެން މިއަދު ބާއްވާ ބޮޑު މުޒާހަރާ އާޓިފިޝަލް ބީޗުން ފަށައިފިއެވެ.

މުޒަހާރާ އާޓިފިޝަލް ބީޗުން ފަށައިގެން ކުރީކޮޅު ގޮސް ް ސޯޝަލް ސެންޓަރ ކައިރީގައި މަޑުކުރިއިރު ފަހަތު ކޮޅުއަދިވެސް އާޓިފިޝަލް ބީޗުން ހިނގައި ނުގަނެވެއެވެ.

މިމުޒާހަރާގައި ބައިވެރިވުމަށް ރަށްރަށުން 7000 މީހުން މާލެ އައިސްފައިވާ ކަމަށް އެމްޑީޕީން ބުނެފައިވެއެވެ. އަދި ރިސޯޓުތަކުންނާއި އިތުރު ރަށްރަށުން މީހުން އަންނަމުންދާ ކަމަށްވެސް ބުންޏެވެ. ރައީސް ނަޝީދު ސަރުކާރުގެ ޑެޕިޔުޓީ މިނިސްޓަރަކު ވިދާޅުވީ ފެބުރުއަރީ 27 ގައި އެއްވި މީހުންގެ ކޮންމެ މީހަކަށް ދެ މީހުން މިއަދުގެ އެއްވުގައި ތިބޭނެ ކަމަށެވެ.

މިމުޒާހަރާއަކީ އަދާލަތުޕާޓީ އިސްވެ އޮވެގެން އިދިކޮޅު އެހެންޕާޓީތަކާ ގުޅިގެން ބާއްވާ ބޮޑު މުޒާހަރާއެކެވެ. މި އެއްވުމުގައި ޖުމްހޫރީޕާޓީގެ އިސްބޭފުޅުން ބައިވެރިވެ ވަޑައިގަންނަވަނީ އަމިއްލަ ގޮތުންނެވެ. އެޕާޓީން ރަސްމީކޮށް މިމުޒާހަރާގައި ބައިވެރިއެއް ނުވެއެވެ.

މުޒާހަރާގައި އެންމެ ފުރަތަމަ ވަހަކަ ދެއްކެވީ ކުރީގެ އިސްލާމިކް މިނިސްޓަރ ޑރ. ޢަބްދުލް މަޖީދު ޢަބްދުލް ބާރީ.

މިހާރު ވާހަކަ ދައްކަވަނީ ޖޭޕީގެ ނާއިބު ލީޑަރު އަމީން އިބްރާހީމް

އަމީން: މިއަދަކީ ދިވެހިންގެ ހަޔާތުގައި ނާންނަ ވަރުގެ ތާރީޚީ ދުވަހެއް. އެއްވުމަށް އެއްވި މީހުންގެ ނަންތައް ރަންއަކުރުން ދިވެހި ތާރީޚުގައި ލިޔެވިއްޖެ.

އަމީން: މަގުތަކަށް ނުކުމެ މިތިބީ ސަރުކާރުން ބިރުވެރިކަން ކުރިމަތު ކުރުވުމުން. މީހުންގެ ވިިޔަފާރިތައް ހަލާކު ކުރަމުންދާތީ. ހައްގުތަކަށް އަރައިގެންފި. ރައީސް ނަޝީދަށްވަނީ ނުހައްގުން އަނިޔާދީ ޖަލުގައި ބަންދުކޮށްފައި، ކާނަލް ނާޒިމްވަނީ ފްރޭކޮށްފައި.

އަމީން: ފަހަަކައި އައިސް ސަރުކާރުން ރައްޔިތުންނަށް ލިބެމުންދާއަނިޔާ ފެންނާނެ. އަފްރާޝީމުގެ މަރުގެ މައްސަލައިގެ ތާޖު އެޅުވެނީ މިސަރުކާރުގެ އިސްވެރިންގެ ބޮލުގައި.

އަމީން: އެއްވެސް ބޭފުޅަކު މިމައިދާން ދޫކޮށްފައި ނުދާތި. އިރާދަ ކުރެއްވިއްޔާ އަޅުގަނޑުމެން ކާމިޔާބު ކުރާނަން. އަމީންގެ ވާހަކަ ނިންމާލައިފި

މިހާރު ވާހަކަ ދައްކަވަނީ ގަލޮޅު ދެކުނުދާއިރާގެ މެންބަރު އަޙުމަދު މަހުލޫފް

މަހުލޫފް: މިތަނަށް އައިސް މިތިބީ ކެރިގެން. މިގައުމުން ކަރަޕްޝަނާއި، ފަސާދައާއި، އަނިޔާވެރިކަން ހުއްޓުވާނަން.

މަހުލޫފް: އަޅުގަނޑުމެން މިތަނަށް އައިސް މިތިބީ ރާއްޖޭ ޓީވީގައި ރޯކޮށްލި މީހުން މިސަރުކާރުގައި ހިމެނޭތީ އިންސާފު ހޯދަން. މަހުލޫފްގެ ވާހަކަ ނިންމާލައިފި.

މިހާރު ވާހަކަ ދައްކަވަނީ ޢަދާލަތު ޕާޓީގެ ރައީސް އިމްރާން ޢަބްދުﷲ.

އިމްރާން: ހުމާމު ވިދާޅުވި ގޮތަށް އަފްރާޝީމް މަރާލި މީހުން ރައީސް ޔާމީނާއި، މިނިސްޓަރ އަދީބަށް ރަނގަޅަށް އެނގޭނެ.

އިމްރާން: ސަރުކާރު ގެނެސް ސަރުކާރު ދަމަހައްޓަން ވަރަށް ބޮޑަށް މަސައްކަތްކުރިން. އެކަމަކު ކާނަލް ނާޒިމްގެ މައްސަލައަށްފަހު މިސަރުކާރުގެ ހެޔޮނިޔަތެއްނެތް ކަން އެނގުނު. އެހެވެ މިއަދު އަންނަން ޖެހުނީ.

އިމްރާން: ކާނަލް ނާޒިމްގެ މައްސަލަ އެގޮތަށް ހެދީ ޙުސައިން ވަހީދާއި އަދީބު އެމީހުންގެ ކަންތައް މިއަދު ނިންމަންވާނެ. އަޅުގަނޑުމެންނަކީ އަނިޔާކުރާ ބައެއްނޫން.

އިމްރާން: އަޅުގަނޑުމެންނާއެކު ސުލްހައިގެ އެއްބަސްވުމެއްގައި ސޮއިކުރުމަށްފަހު ނޫނީ ދެން ރައީސް ޔާމީނަށް ވެރިކަމުގައި ނުހުންނެވޭނެ.

އިމްރާން: ހައްގު ނޫންގޮތެއްގައި އެއްވެސް މީހެއްގެ ގައިގައި ސިފައިންނާއި ފުލުހުން އަތްލައިގެން ނުވާނެ.

މިހާރު ވާހަކަ ދައްކަވަނީ އެމްޑީޕީގެ ޗެއަރޕާސަން ޢަލީ ވަޙީދު

ޢަލީ ވަޙީދު: އަޅުގަނޑުމެން މިތިބީ ﷲގެ މަގުގައި.

ޢަލީ ވަޙީދު: ޤާނޫނީ އިމުގެ ތެރެއިން މިއަދު ގެއަށްދާންވާނީ ރައީސް ނަޝީދު ގޮވައިގެން.

ޢަލީ ވަޙީދު: މިއަދު އަރަން އޮތީ ދެމަގު. އެއީ ﷲގެ މަގާއި. ފަސްވަގުންގެ މަގު.

ޢަލީ ވަޙީދު: ކަޅުވިލާގަނޑަކަށް ބޯޓު ވަންނައިރު ކުޑަކޮށް ބޯޓު ތަޅުވާލާނެ. ތިޔަ ބޭފުޅުން ބިރު ނުގަންނާތި. ރައްޔިތުންގެ ގަޔަށް ބަޑިޖަހަން ނުކުރޭނެ. މިއަދު ފިރިހެނުންކަން އަދި އަންހެނުންކަން އަނގާލަންޖެހޭނެ.

ޢަލީ ވަހީދުގެ ވާހަކައަށްފަހު މިހާރު ދުޢާކުރަނީ. އިސްވެ ދުޢާ ދަންނަވަނީ އައްޝައިޚް އިމްރާން ޢަބްދުﷲ .

ދުޢާއަށްފަހު ދެން ހަދަންވާގޮތް އަންގާނެ ކަމަށް އިޢުލާންކޮށްފި.

ޚާއްސަ ދުޢާކޮށް ނިމިއްޖެ

އިސްލާމީ މަރުކަޒަށް މަޣްރިބް ނަމާދަށް ދިޔުމަށް އަންގައިފި.

އެމްއެމްއޭ ސަރަޙައްދުންނާއި، ސަލްސާ ރޯޔަލް ސަރަހައްދުން އިސްލާމީ މަރުކަޒަށްދާން މަސައްކަތްކުރި މީހުން ފުލުހުން ހުއްޓުވައިފި. ބައެއް މީހުން ހައްޔަރުވެސް ކޮށްފި. ގާތްގަނޑަކަށް 6 މީހުންވަނީ ހައްޔަރުކޮށްފައި.

މާރުކޭޓް ސަރަހައްދުން: ލެސްލީތަލް ވެޕަން ބޭނުންކުރަން ޖެހުނަސް ބޭނުން ކުރާނެ ކަމުގެ އިންޒާރު ފުލުހުން މުޒާހަރާގެ ބައިވެރިންނަށް ދީފި. އެހެން ނޫނީ ފުލުހުންނާއި ސިފައިންނާއި ކުރިމަތި ނުލައި ގެއަށް ދިޔުމަށް އަންގައިފި.