އަދީބު މަޤާމުން ވަކި ކުރުމަށްފަހު މަޝްވަރާއަށް ވަޑައިގެންނެވުމަށް އިމްރާން ރައީސަށް ދަންނަވައިފި

ސަރުކާރާއެކު ނުވަތަ ރައީސް ޔާމީނާއެކު މަޝްވަރާ ކުރާނީ ޓޫރިޒަމް މިނިސްޓަރ އަޙުމަދު އަދީބު މަޤާމުން ވަކި ކުރުމަށްފަހު ކަމަށް ޢަދާލަތު ޕާޓީގެ ރައީސް އައްޝައިޚް އިމްރާން ޢަބްދުﷲ ރައީސުލް ޖުމްރިއްޔާ ޢަބްދުﷲ ޔާމީން ޢަބްދުލް ޤައްޔޫމަށް ދަންނަވައިފިއެވެ.

އިމްރާން ރައީސަށް މިވާހަކަ ދަންނަވާފައިވަނީ ރައީސް ޔާމީނަށް މިއަދު ފޮނުވި ސިޓީއެއްގައެވެ.

އެސިޓީގައި އިމްރާން ވިދާޅުވެފައިވަނީ އިދިކޮޅު ފަރާތްތަކާ ރައީސް ޔާމީންގެ ފަރާތުން މަޝްވަރާ ކުރައްވާނީ ޓޫރިޒަމް މިނިސްޓަރ އަޙުމަދު އަދީބު ކަަމަށް ވިދާޅުވެ އަދީބުގެ ސިޓީއެއް ލިބިފައިވާ ކަމަށެވެ. އެހެން ނަމަވެސް ސަރުކާރުން ހިންގަމުންދާ އަނިޔާވެރި ޢަމަލްތައް ހިންގެވުމުގައި އެންމެ އިސްކޮށް ހުންނެވީ އަދީބު ކަމަށްވާތީ އެމަނިކުފާނާއެކު މަޝްވަރާ ނުކުރައްވާނެ ކަމަށެވެ.

އެހެން ކަމުން "މަނިކުފާނުގެ ސަރުކާރުން ހިންގާ އަނިޔާވެރި ޢަމަލުތައް ހިންގުމުގައި އެންމެ އިސްކޮށްހުރި އެއްފަރާތަކީ އަޙުމަދު އަދީބު ކަމަށްވާތީ އެއަނިޔާވެރިވެރި ޢަމަލުތައް ހުއްޓުވުމާގުޅޭ މަޝްވަރާތަކަށް ގުޅިފައިވާ ސިޔާސީ ޕާޓީތަކުން އިށީންނާނީ މަނިކުފާނުގެ ކެބިނެޓުގެ ޓޫރިޒަމް މިނިސްޓަރ އަޙުމަދު އަދީބު މަޤާމުން ވަކިކުރެއްވުމުން އެއަށްފަހު ކަމުގައި ދަންނަވަމެވެ. ވީމާ އެކަން ފުރިހަމަ ކުރެއްވުމަށްފަހު މަޝްވަރާތަކަށް ވަޑައިގެންނެވުމަށް ދަންނަވަމެވެ." އިމްރާންގެ ސިޓީގައި ވެއެވެ.

އެސިޓީގައި ބުނެފައިވަނީ ގުޅިފައިވާ ޕާޓީތަކުން މަޝްވަރާގެ މޭޒަށް ގޮވާލަނީ ދިވެހިރާއްޖޭގެ ރައީސުލްޖުމްހޫރިއްޔާއަށް ކަމަށެވެ. އެހެންކަމުން "ޚުދު މަނިކުފާނު ބައިވެރިވެ ވަޑައިގަންނަވަންވާނެ ކަމުގައި އަޅުގަނޑު ދެކެމެވެ. މީގެ އިތުރުން އަޅުގަނޑު އަމިއްލަ ޙައިސިއްޔަތުން މަނިކުފާނާއެކު ކުރާނެ މަޝްވަރާއެއްނެތް ވާހަކަ ދަންނަވަމެވެ." އެސިޓީގައި ބުނެފައިވެއެވެ.

ޢަދާލަތު ޕާޓީން ވާދަވެރި ސިޔާސީ ޕާޓީތަކާ ގުޅިގެން މަސައްކަތް ކުރަން ޖެހުނީ އެޕާޓީން ރައީސް ޔާމީނާ އެކި ގޮތްގޮތުން ކުރި މަޝްވަރާތައް ފެއިލް ކޮށްލުމުން ކަމަށްވެސް އިމްރާންގެ ސިޓީގައި ބުނެފައިވެއެވެ. އެހެން ކަމުން މަޝްވަރާގެ މޭޒުދޮށަށް އެމަނިކުފާނު ގެންނަން މިހާރު މަސައްކަތްކުރަނީ ގުޅިފައިވާ ޕާޓީތަކުން ކަމަށްވެސް ބުނެފައިވެއެވެ. ދެން ރައީސް ޔާމީން މަޝްވަރާ ކުރައްވަން ޖެހިވަޑައިގަންނަވާނީ ސިޔާސީ ޕާޓީތަކުގެ ލީޑަރުންނާ ކަމަށްވެސް އިމްރާން ވިދާޅުވެފައިވެއެވެ.

ސިޔާސީ ޕާޓީތަކުގެ ލީޑަރުން ތަކުރާރުކޮށް މަޝްވަރާއަށް ދެންނެވުމުން އެކަމަށް ރައީސް ޔާމީންވަނީ ގޮންޖައްސަވާފައި ކަމަށްވެސް އިމްރާން ވިދާޅުވެފައިވެއެވެ. ނަމަވެސް އެމަނިކުފާނު "މިއަދު މަޝްވަރާގެ މޭޒަށް އެނބުރި ވަޑައިގަތުމުގެ ވިސްނުންފުޅު ގެންގުޅުއްވާތީވެ އަޅުގަނޑު ނުހަނު އުފާކުރާ ވާހަކަވެސް ދަންނަވަމެވެ." ސިޓީ ނިންމާލަމުން އިމްރާން ވިދާޅުވެފައިވެއެވެ.