އޭދަފުށީ ބަނދަރު ސަރަޙައްދުގައިހުރި ޕެޓްރޯލް ފީފާތަކެއްގައި ރޯވެ އަނދައިފި

ބ. އޭދަފުށީ ބަނދަރުގެ ހުޅަނގު ފަރާތުގައިހުރި ޕެޓްރޯލް ފީފާތަކާއި، ގޭސްފުޅިތަކެއްގައި ރޯވެ އަނދައިފިއެވެ.

އޭދަފުށީ ކައުންސިލްގެ ރައީސް ޢަލީ ވަޙީދު ވިދާޅުވީ އަނދައިިދިޔަ ޕެޓްރޯލް ފީފާތަކަކީ އެރަށް ޕެޓްރޯލް ވިއްކަން އައިސްއޮތް ދޯންޏަކުން އަޅާފައިވާ ޕެޓްރޯލް ކަމަށެވެ. "ޕެޓްރޯލް އަޅަމުން ގޮސް "އިންޓޯލް ވަގުތަށް" ހުއްޓާލައިފައި އޮތްވަގުތު އަލިފާން ރޯވީ. ގާތްގަނޑަކަށް ދިހަ ފީފާ ޕެޓްރޯލްހުރި. އަދި އަށެއްކަ ގޭސްފުޅިވެސްހުރި. އޭގެ ތެރޭގައި ހުސްފުޅިވެސް ހުރިކަމަށްވަނީ. ހަމަގައިމުވެސް ހަތަރެއް ނުވަތަ ފަސްފުޅި ގޮވި،" ޢަލީ ވަޙީދު ވިދާޅުވިއެވެ.

އޭނާ ވިދާޅުވީ ފެނަކައިން އެރަށުގައި ހިންގާ އިންޖީނުގެއަށް ބޭނުންވާ ޑީސެލްވެސް އެދޯނީގައިހުރި ކަމަށެވެ. އަލިފާނުގެ ޙާދިސާގައި އެދޯންޏަށްވެސް ގެއްލުމެއް ނުވާކަމަށް ވިދާޅުވިއެވެ. ނަމަވެސް އޭގައިހުރި ކަޅު ހަމަކަށް އަލިފާނުގެ އަސަރު ކޮންމެވެސް ވަރަކަށް ކޮފައިވާ ކަމަށް ފާޖަގަކުރެވުނު ކަމަށެވެ.

ޢަލީ ވަޙީދު ވިދާޅުވީ އަލިފާނުގެ ޙާދިސާ ހިނގި ސަރަޙައްދަކީ ޢިމާރާތްތަކާއި، މީހުން އެހާ ގިނަ ސަރަޙައްދެއް ނޫން ކަމަށެވެ. އެހެން ކަމުން އެއްވެސް ޢިމާރާތަކަށްވެސް މީހަކަށްވެސް އަލިފާނުގެ ސަބަބުން ގެއްލުމެއް ނުވާ ކަމަށެވެ.

ޢަލީ ވަޙީދު ވިދާޅުވީ ރޯވި އަލިފާންގަނޑު އެއްވެސް ބައެއްގެ މަސައްކަތާ ނުލައި އޭގެ ޒާތުގައި ކަމަށެވެ. ނަމަވެސް ބައެއް މީހުން ބުނެފައިވަނީ އަލިފާން ނިއްވާފައިވަނީ އެރަށުގައި މަސައްކަތްކުރާ ފުލުހުންނާއި، އެރަށުގެ ބައެއް ރައްޔިތުންގެ މަސައްކަތުން ކަމަށެވެ.

އަލިފާނުގެ ޙާދިސާ ހިނގަންދިމާވި ސަބަބެއް އެއްގޮތަކަށްވެސް އެނގިވަޑައި ނުގަންނަވާ ކަމަށް ޢަލީ ވަޙީދު ވިދާޅުވިއެވެ. ފުލުހުން ގެންދަނީ އެމައްސަލަ ތަޙުޤީގު ކުރަމުން ކަމަށް އޭނާ ވިދާޅުވިއެވެ.