ނޭޕާލުގައި ތިބި ދިވެހީން މިރޭ މާލެ އަންނާނެ

ނޭޕާލަށް އައި ބާރުގަދަ ބިންހެލުމުގައި ޙާލުގައި ޖެހިފައިވާ ދިވެހިން މޯލްޑިވިއަންގެ މަތިންދާ ބޯޓެއްގައި މިރޭ މާލެ ގެންނާނެ ކަމަށް އެ އެއާލައިނުން ބުނެފިއެވެ.

މޯލްޑިވިއަންއިން ބުނެފައިވަނީ ނޭޕާލުގައިތިބި ދިވެހީން ރާއްޖެ އަންނާނީ މިރޭ މެންދަމުންއަލިވެ 3:10 ގައި ކަމަށެވެ.

މަޢުލޫމާތު ލިބިފައިވާ ގޮތުގައި މޯލްޑިވިއަންއިން އެމީހުން ރާއްޖެ ގެންނަނީ ބަނގްލަދޭޝް މަގުންނެވެ. ބަނގްލަދޭޝަށް އެމީހުންދަނީ ނޭޕާލުން ބަނގްލަދޭޝަށްދާ ބިމާން އެއާލައިންގެ ބޯޓެއްގައެވެ.

ސީދާ ނޭޕާލުން އެމީހުން ރާއްޖެ ގެނެވޭގޮތް ނުވެފައިވަނީ މޯލްޑިވިއަންގެ ބޯޓު ނޭޕާލަށް ދިޔުމުގެ ހުއްދަ އަދިވެސް ލިބިފައި ނުވާތީއެވެ. ބަނގްލަދޭޝްގެ ވެރިރަށް ޑާކާއަކީ މޯލްޑިވިއަންގެ ޝެޑިއުލް ދަތުރުކުރާ މަންޒިލެކެވެ. ނަމަވެސް މޯލްޑިއަންގެ ދަތުރުތައް ކަތުމަންޑޫއަށް ނުކުރެއެވެ.