ސިފައިންގެ ސަފުތައް ފޫއަޅުވާލުމުގެ އެއްވެސް ފުރުސަތެއް ނުދޭނަން- ދިފާޢީ ވަޒީރު

ދިވެހި ސިފައިންގެ ބަދަހި ސަފުތައް ފޫއަޅުވާލުމުގެ އެއްވެސް ފުރުސަތެއް އެއްވެސް ފަރާތަކަށް ދިވެހި ސިފައިން ނުދޭނެ ކަމަށް ދިފާޢީ ވަޒީރު މޭޖަރޖެނެރަލް (ރިޓަޔަރޑް) މޫސާ ޢަލީ ޖަލީލް މިރޭ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ކަޅުތުއްކަލާކޮށީގައި މިރޭ ބޭއްވި ސިފައިންގެ 123 ވަނަ އަހަރީދުވަހުގެ ޖަލްސާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ ސިފައިން އަބަދުވެސް ތިބޭނީ ޤާނޫނީ ޒިންމާ އަދާކުރުންމަތީ ފިސާރި ސާބިތުކަންމަތީ ކަމުގެ ޔާޤީންކަން ރައީސަށް ދެއްވާ ކަމަށެވެ. އަދި ރައީސް ދޫކޮށްލާފައި ސިފައިން ނުދާނެ ކަމަށްވެސް ވިދާޅުވިއެވެ. "ޢިއްޒަތްތެރި ރައީސް، އަޅުގަނޑުމެން ރައީސް ދޫކޮށްލާފައި ނުދާނަން. އަޅުގަނޑުމެން މިތިބީ ވަރަށް ސާބިތުކަމާއެކުގައި ޤާނޫނީ ޒިންމާ އަދާކުރަން،" ވަޒީރު ވިދާޅުވިއެވެ.

އެމަނިކުފާނު ވިދާޅުވީ ސިފައިންގެ ފަންވަރާއި ހިތްވަރު އެބަހުރި ކަމަށާއި މާޒީގައި ސިފައިންވާނީ އެކަން ދައްކާފައި ކަމަށެވެ. މިހާރުވެސް ސިފައިންތިބީ "ހޭލައި" ކަމަށްވެސް ވިދާޅުވިއެވެ.

އެމަނިކުފާނު ވިދާޅުވީ ރާއްޖޭގެ ބަދަލުވަމުންދާ މާޙައުލުގައި ތައްޔާރުވާންޖެހޭ ތައްޔާރުވުންތައް އިތުރުވަމުންދާ ކަމަށެވެ. ޤައުމުގެ މިހާރުގެ ޙާލަތަށް ބަލާއިރު މުސްތަގުބަލަށް ރާވަން ޖެހޭ ކަންކަންވެސް އެބަހުރި ކަމަށް ވަޒީރު ވިދާޅުވިއެވެ. އެބަދަލްތައް ގެނައުމަށް މިހާރަށްވުރެ ބޮޑު ބަޖެޓެއް ސިފައިންނަށް ބޭނުންވާ ކަމަށްވެސް ވިދާޅުވިއެވެ. އެކަމަށް ރައްޔިތުންގެ މަޖިލީހުގެ 241 ކޮމިޓީގެ މަދަދަށް އެދިވަޑައިގަންނަވާނެ ކަމަށްވެސް ވިދާޅުވިއެވެ. އެމަނިކުފާނު ވިދާޅުވީ ރާއްޖޭގައި ދާޚިލީ ހަނގުރާމަ ނުހިނގިކަމަށްވިޔަސް ދިވެހި ސިފައިންގެ ޤާބިލްކަން ދެނެގަނެ ހަނގުރާމައަށް އަންނަ މީހުން މިހާރުމަދު ކަމަށެވެ. މީގެ ކުރިން ރާއްޖެއާ ހަނގުރާމަކުރަން ބަޔަކު އައިސްފައިވާ ކަމަށްވެސް ވިދާޅުވިއެވެ.

ވަޒީރު ވިދާޅުވީ މި ޤައުމުގެ ބޭނުގައި ހަނގުރާމައަށް އަންނާނެ މީހުން ތިބޭނެ ކަމަށާއި މާޒިއަށް ބަލާއިރު އެފަދަ މީހުން އައިސްފައިވަނީ ދިވެހީންގެ ތެރެއިން ބައެއްގެ ވާގިވެރިކަމާއެކު ކަމަށްވެސް ވިދާޅުވިއެވެ. ނަަމަވެސް އެފަދަ ފުރުސަތެއް އެއްވެސް ބަޔަކަށް ދިވެހި ސިފައިން ނުދޭނެ ކަމަށް ވިދާޅުވިއެވެ. "އަވަށްޓެރި ޤައުމުތަކުގައި ހިނގާހެން ދާޚިލީ ހަނގުރާމަތަކެއް ރާއްޖޭގައި ނުހިނގި ކަމުގައިވިޔަސް، ދިވެހި ސިފައިންގެ ޤާބިލްކަމާއި ހުޝިޔާރު ކަމާއި ޖެހިލުން ކުޑަ ކަމާއި، ހިތްވަރުގަދަ ކަން ދެނެގަނެ، މިތަނަށް (ރާއްޖެއަށް) އަންނާނެ މީހުން މިދަނީ މަދުވަމުން،" މޫސާ ޢަލީ ޖަލީލް ވިދާޅުވިއެވެ.

ދިފާޢީ ވަޒީރު ވިދާޅުވީ ސިފައިންތިބީ ކޮންމެ ޙާލަތެއްގައިވެސް ރައްޔިތުންނާއި ޤައުމު ޙިމާޔަތް ކޮށްދިނުމަށް ކަމަށެވެ. އެމަނިކުފާނު ވިދާޅުވީ ޤައުމު ސަލާމަތް ކުރުމަށް ދިވެހި ސިފައިން ފަހަތަށް ޖެހޭނެ އެއްވެސް ކަމެއް (ސަބަބެއް) ނޯންނާނެ ކަމަށެވެ. ޤައުމަށް ޢުދުވާނެއް ދިމާވިޔަސް ޤުދުރަތީ ކާރިސާއެއް ކުރިމަތިވިޔަސް ސިފައިން ތިބޭނީ ތައްޔާރަށް ކަމަށް ވިދާޅުވިއެވެ. "ޢަސާސީ ޚިދުމަތްތައް ފޯރުކޮށްދިނުމަށް ސިފައިންނަށް ފެނިއްޖެ ހިނދެއްގައި ޢަސާސީ ޚިދުމަތްވެސް ދިވެހި ސިފައިން ފޯރުކޮށްދޭނެ،" ވަޒީރު ވިދާޅުވިއެވެ.