މޭޑޭއަކީ އަނިޔާގެ މައްޗަށް އިންސާފު ހޯދައިދޭނެ ދުވަސް-ޝިފާޒު
25 ޢޭޕްރިލް 2015 22:22
މިރޭގެ ޖަލްސާގައި ޝިފާޒު ވާހަކަ ދައްކަވަނީ
މެއިމަހުގެ ފުރަތަމަ ދުވަހު ފާހަގަކުރާ މޭޑޭއަކީ އަނިޔާގެ މައްޗަށް އިންސާފު ހޯދައިދޭނެ ދުވަސް ކަމަށް އެމްޑީޕީގެ ނާއިބު ރައީސް މުޙައްމަދު ޝިފާޒު މިރޭ ވިދާޅުވެއްޖެއެވެ.
އޭނާ މިހެން ވިދާޅުވީ ފ. ބިލެތްދޫގައި މިހާރު ހިނގަމުންދާ "އަނިޔާވެރިކަމާ ދެކޮޅަށް ދިވެހިން" ގެ ޖަލްސާގައި ވާހަކަ ދައްކަވަމުންނެވެ.
"އެދުވަހު ވީހާވެސް ގިނަ ރައްޔިތުން މާލެ އަންނަން ޖެހޭނެ. ރައްޔިތުން އަޅުގަނޑުމެންނާއެކު ތިބިކަމަށް ވާނަމަ ރައްޔިތުންނަށްޓަކައި އަނިޔާވެރިކަމުގެ މައްޗަށް އިންސާފު ހޯދައިދޭނަން،" ޝިފާޒު ވިދާޅުވިއެވެ.
އެދުވަހު މަގުމައްޗަށް ނުކުންނަނީ، ފުލުހުންނާއި، މިނިވަން މުޢައްސަސާތަކަށް ކުރިމަތިވެފައިވާ ބިރުވެރިކަމުން އެތަންތަންވެސް ސަލާމަތް ކުރަން ކަމަށްވެސް ޝިފާޒު ވިދާޅުވިއެވެ. އޭނާ ވިދާޅުވީ އެދުހު މަގުމައްޗަށް ނުކުންނަނީ އެއްވެސް ކަހަލަ ހަމަޖެހުމެއް ހިންގަން ނޫނެވެ. އޭގެ ބަދަލުގައި އެދުވަހު މަގުމައްޗަށް ނުކުންނަނީ ސުލްހަވެރި ކަމާއެކު ކަމަށްވެސް ވިދާޅުވިއެވެ. ނަމަވެސް އެދުވަހު އަނިޔާވެރިކަން ނިމުމަކަށް ގެންނާނެ ކަމަށްވެސް ވިދާޅުވިއެވެ.
ޝިފާޒު ވިދާޅުވީ މި ސަރުކާރުގެ އަނިޔާވެރިކަމުގެ ތެރެއިންވަނީ ކުރީގެ ރައީސް މުޙައްމަދު ނަޝީދުގެ މައްޗަށް "ޙަރާމް" ޝަރީޢަތެއްކޮށް ޙުކުމެއްކޮށް ޖަލަށްލައިފައި ކަމަށެވެ. އަދި ކުރީގެ ޑިފެންސް މިނިސްޓަރ ކާނަލް ނާޒިމާ މެދުވެސް ވަނީ އެފަދައިން ޢަމަލުކޮށްފައި ކަމަށެވެ. އަދި ޖޭޕީގެ ލީޑަރަށް ސަރުކާރުން ދެމުންގެންދާ އަނިޔާދަނީ އިތުރުވަމުން ކަމަށްވެސް ޝިފާޒު ވިދާޅުވިއެވެ. އެހެން ކަމުން މޭޑޭގައި މަގުމައްޗަށް ނުކުމެ އަނިޔާވެރިކަން ނިންމަންޖެހޭ ކަމަށްވެސް ވިދާޅުވިއެވެ.
އެދުވަހު މަގުމައްޗަށް ނުކުންނާނެ ކަމަށާއި، ނުކުމެ ދުވަން ޖެހިއްޖެނަމަ ދުވާނެ ކަމަށާއި، ހިނގަން ޖެހިއްޖެނަމަ ހިނގާނެ ކަމަށްވެސް ވިދާޅުވިއެވެ. މާލެ ފުރޭވަރަށް އެދުވަހު ރަށްރަށުން މީހުން މާލެ އަންނާނެ ކަމަށް ވިދާޅުވިއެވެ. މަގުމަތީގެ ޙަރަކާތް އެދުވަހު ފުޅާކުރަން ޖެހިއްޖެކަމަށްވާނަމަ އެކަމަށްވެސް ތައްޔާރު ކަމަށް ޝިފާޒި ވިދާޅުވިއެވެ.
ފެބުރުއަރީ 27 ގައިވެސް މަގުމައްޗަށް އެތައްހާސް ބަޔަކު ނުކުތް ކަމަށާއި، ނަަމަވެސް ރައްޔިތުން އެެދުވަހު ފާޅުކުރި ޝުޢޫރު ސަރުކާރަށް ނުއިވުނު ކަމަށެވެ. އެހެން ކަމުން މޭޑޭގައި އަނެއްކާވެސް އަޑު އިއްވާނެކަމަށް ވިދާޅުވިއެވެ.އޭނާ ވިދާޅުވީ ރައީސް ނަޝީދު ޖަލުގައި ހުންނެވިހާ ދުވަހަކު މަގުތަކުގައި ރައްޔިތުން އިހުތިޖާޖު ކުރާނެ ކަމަށެވެ. ނަޝީދު މިނިވަން ނުކުރާހާ ހިނދަކު އެކަން އެގޮތަށް ދާނެ ކަމަށްވެސް ވިދާޅުވިއެވެ.
ޝިފާޒު ވިދާޅުވީ މިސަރުކާރުން މިހާރު މަސައްކަތް ކުރަމުން ގެންދަނީ ފ. އަތޮޅާއި، ދ. އަތޮޅު ސަޢުދީ ރަސްގެފާނަށް ވިއްކާލުމަށް ކަމަށެވެ. އެކަމަށް ބޭނުންވާ ޤާނޫނުތައްވެސް މިހާރުވަނީ ޑްރާފްޓްކޮށް ނިމިފައި ކަމަށް ވިދާޅުވިއެވެ. ނަމަވެސް އެކަމަކީ އެގޮތަށްވާން ދޫކޮށްލެވޭނެ ކަމެއް ނޫންކަމަށްވެސް ވިދާޅުވިއެވެ. އޭނާ ވިދާޅުވީ މިފަދަ ކަންކަން ޙައްލުކޮށް ސަރުކާރު ޒިންމާދާރު ކުރުވުމަށް އެންމެންވެސް މޭޑޭގައި މަގުމައްޗަށް ނުކުތުމަށެވެ.
ކިޔުންތެރިންގެ ހިޔާލު