މަސްއައިން ދެނެގަތުމުގެ ނިޒާމް ވިހި ދޯންޏަކަށްދޭން މިފްކޯއިން ނިންމައިފި

މަސް އައިން އުޅޭ ހިސާބު ދެނެގަތުމުގެ އެންމެފަހުގެ ޓެކްނޮލޮޖީގެ ނިޒާމް 20 ދޯންޏަކަށް ދިނުމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ނިންމައިފިއެވެ.

މިފްކޯއިން އެނިޒާމް ޙަވާލު ކުރާނީ މިދިޔައަހަރު އެންމެގިނައިން ޤަވާއިދުން އެކުންފުންޏަށް މަސްކިރާފައިވާ ދޯނިފަހަރަށް ކަމަށް މިފްކޯގެ މެނޭޖިންޑިރެކްޓަރ ޢަދުލީ އިސްމާޢީލް ވިދާޅުވިއެވެ.

ޒަމާނީ ޓެކްނޮލޮޖީ ބޭނުންކޮށްގެން މަސްއައިން ހޯދުމުގެ މަޝްރޫޢަކީ މޯލްޑިވްސް ފިޝަމަން އެސޯސިއެޝަންގެ އެހީގައި މިފްކޯ އިން ކުރިއަށް ގެންދާ މަޝްރޫޢެކެވެ.

މިނިޒާމް ޙަވާލު ކުރުމަށް އެއްބަސްވުމުގައި ފިޝަމަން އެސޯސިއޭޝަނާއެކު ސޮއި ކުރެއްވުމަށްފަހު ޢަދުލީ ވިދާޅުވީ މި ނިޒާމަކީތަޖުރިބާ ކުރެވިފައިވާ ނިޒާމެއް ކަމަށެވެ. މިއެއްބަސްވުމުގައި ފިޝަމަން އެސޯސިއޭޝަންގެ ފަރާތުން ސޮއިކުރެއްވީ އެ ޖަމިއްޔާގެ ރައީސް މައިޒާން އަޙުމަދު މަނިކެވެ.ޢަދުލީ ވިދާޅުވީ "ޖީއޯއީ" ގެ ނިޒާމުގެ ސަބަބުން މަސްވެރިކަން ދަށްވާ ދުވަސްވަރު މަސްއައިން ހޯދަން މަސްވެރިންނަށް ފަސޭހައެއް ލިބިގެންދާނެ ކަމަށެވެ. އަދި އޭގެ ސަބަބުން މަސްވެރިންނަށް ވަރަށް ބޮޑަށް ފަސޭހަވެގެންދާނެ ކަމަށްވެސް ޢަދުލީ ވިދާޅުވިއެވެ. ޢަދުލީ ވިދާޅުވީ މިފްކޯއިން އެނިޒާމް ޙަވާލުކުރާ 20 ދޯނިން އޭގެ ބޭނުން ހިފަން ފެށުމަށްފަހު ދޯނިފަހަރުގެ ޙަރަކާތްތައް ބަލަމުން ގެންދާނެ ކަމަށެވެ.

ޢަދުލީ ވިދާޅުވީ ދިވެހި މަސްވެރިންނަކީ މަސްއައިންތައް ހޯދައިގަންނަން ފަރިތަ ބައެއް ކަމަށެވެ. އަދި ކަނޑުމައްޗަށްވެސް އެހާ ފަސޭހަ ބައެއް ކަމަށެވެ. އެ ފަރިތަ ކަމަށް ޓެކްނޮލޮޖީގެ އެހީ ލިބުމުން އިތުރު ފަސޭހައެއް ލިބިގެންދާނެ ކަމަށްވެސް ވިދާޅުވިއެވެ.

ފިޝަމަން އެސޯސިއޭޝަންގެ ރައީސް މައިޒާން އަޙުމަދު މަނިކު ވިދާޅުވީ އެންމެ ބޮޑު މަގްސަދަކީ ކުންފުނިތަކާ އެކު މަސައްކަތް ފުޅާ ކުރުން ކަމަށެވެ. އަދި މި ނިޒާމު މެދުވެރިކޮށް ލިބޭ މައުލޫމާތު އެ ޖަމިއްޔާއިން މަސްވެރިންނާ ޙިއްސާ ކުރާނެ ކަމަށް ވެސް ވިދާޅުވިއެވެ.

މިފްކޯއިން ގެންދަނީ ރާއްޖޭގެ މަސްވެރިކަން ރަނގަޅު ކުރުމަށްޓަކައި މަސްވެރިންނަށް ތަފާތު ގޮތްގޮތުން އެހީތެރިވަމުންނެވެ. އަލަށް ތަޢާރަފްކުރި ސްފްޓްވެއާ ފޯރުކޮށްދިނުމަށް ދޯންޏަކުން 250 ޑޮލަރެވެ.