ނަޝީދުގެ ފުރާނައަށް ގެއްލުން ދިނުމަށް ބޭނުންކުރާ ސާމާނު ސަރުކާރުގެ އިސްވެރިއަކުވަނީ ހޯދާފައި-އެމްޑީޕީ

ދިވެހިރައްޔިތުންގެ ޑިމޮކްރެޓިކް ޕާރޓީ (އެމް.ޑީ.ޕީ) ގެ ރައީސް އަދި ރާއްޖޭގެ ކުރީގެ ރައީސުލްޖުމްހޫރިއްޔާ މުޙައްމަދު ނަޝީދުގެ ފުރާނައަށް ނުވަތަ ހަށިކޮޅަށް ގެއްލުން ދިނުމަށް ބޭނުންކުރާ ބައެއް ސާމާނު ސަރުކާރުގެ އިސްވެރިއަކު ހޯދާފައިވާ ކަމުގެ މަޢުލޫމާތު އިތުބާރުހުރި ގޮތަކަށް ލިބިފައިވާ ކަމަސް އެމްޑީޕީން ބުނެފިއެވެ.

އެމްޑީޕީން ނެެެެރެފައިވާ ނޫސްބަޔާނެއްގައި ބުނެފައިވަނީ ރައީސް ނަޝީދުގެ މައްޗަށް "ނާއިންސާފުން ޙުކުމްކޮށް" "ސަރުކާރުގެ އަތްދަށުގައި އެމަނިކުފާނު ޙައްޔަރުކޮށްފައިވާއިރު" އެމަނިކުފާނުގެ ހަށިކޮޅަށް ނުވަތަ ފުރާނައަށް ގެއްލުންދިނުމުގެ ޢަމަލެއް ހިންގުމުގެ ބޭނުމުގައި ސަރުކާރުގެ އިސް ވެރިޔަކު، ރާއްޖޭގެ ސިއްޙީ ދާއިރާގައި މަސައްކަތްކުރާ މީހަކު މެދުވެރިކޮށް "އެނިސްތީޒިއާ" ނުވަތަ ހޭނައްތައި ޚަބަރުހުސްކޮށްލުމުގައި ބޭނުންކުރާ ބާރުގަދަ ހުރިހައި ސާމާނެއް ހޯދާފައިވާ ކަމަށެވެ.

އެސާމާނު ހޯދާފައިވަނީ މީގެ ދުވަސްކޮޅެއް ކުރިން ކަމަށްވެސް ބުނެފައިވެއެވެ. އެމަޢުލޫމާތު ނަޝީދުގެ ޢާއިލާއަށާއި އެމްޑީޕީއަށްވެސް ލިބިފައިވާ ކަމަށް ބަޔާނުގައި ބުނެފައިވެއެވެ.

އެފަދަ ތަކެތި ސިއްޙީ ދާއިރާއިން ބޭރުގައި އަމިއްލަ ބޭނުމަށް ހޯދުމަކީ ކަނޑައެޅިގެން މަނާކަމެކެވެ. އެފަދަ ނުރައްކާތެރި ތަކެތި ސިއްޙީދާއިރާއިން ބޭރުގައި ގެންގުޅެނީ ދުނިޔޭގައި ބޮޑެތި ޖަރީމާތައް ހިންގާ މީހުން އިންސާނުންގެ ހަށިގަނޑާއި، ފުރާނައަށް ނުރައްކާކުރަން ކަމަށްވެސް ބުނެފައިވެއެވެ.

ސަރުކާރުގެ އިސްވެރިއަކު “އެނިސްތީޒިއާ” ނުވަތަ ހޭނައްތައި ޚަބަރުހުސްކޮށްލުމުގައި ބޭނުންކުރާ ބާރުގަދަ ކްލޯރޮފޯރމް ފަދަ ހުރިހައި ތަކެއްޗެއް އަމިއްލަ ބޭނުމަށް މިދުވަސްކޮޅުގައި ހޯދުމަކީ ކަންބޮޑުވާކަމެއް ކަމަށްވެސް އެމްޑީޕީން ބުނެފައިވެއެވެ. " އެތަކެތި ހޯދާފައިވަނީ ރައީސް ނަޝީދުގެ ހަށިކޮޅަށް ނުވަތަ ފުރާނައަށް ގެއްލުންދިނުމަށް ކަމަށް އިތުބާރުހުރި މަޢުލޫމާތު ލިބިފައިވާތީ އެކަމުގެ ކަންބޮޑުވުން އިންތިހާއަށް ފާޅުކުރަމެވެ." އެބަޔާނުގައި ވެއެވެ.

ރައީސް ނަޝީދު ހައްޔަރުކުރިފަހުން އެމަނިކުފާނަށް އެފަދަ ނުރައްކާ ކުރިމަތިކުރުވުމަށް ސަރުކާރުން ރާވާފައިވާކަމުގެ މަޢުލޫމާތު މީގެކުރިން ވެސް ލިބިފައިވެއެވެ. އެފަހަރު އެމްޑީޕީއާއި، އެމަނިކުފާނުގެ ޢާއިލާއިންވަނީ އެކަން ހުއްޓުވުމަށް ބޮޑެތި މަސައްކަތްތަކެއް ކޮށްފައި ކަމަށްވެސް އެމްޑީޕީން ބުނެފައިވެއެވެ.

"ރައީސް މުޙައްމަދު ނަޝީދު ޖަލުގައި ހައްޔަރުކޮށްފައިވާއިރު، އެމަނިކުފާނުގެ ހަށިކޮޅާއި ފުރާނައަށް ގެއްލުންދެނިވި އަމަލުތަކުން އެމަނިކުފާނު ރައްކާތެރިކޮށްދިނުމުގެ ފިޔަވަޅުތައް މިހިނދުން މިހިނދަށް އަޅުއްވައިދެއްވުމަށް ހިޔުމަން ރައިޓްސް ކޮމިޝަނާއި، ރާއްޖޭގެ ކަމާބެހޭ އެންމެހައި ފަރާތްތަކާއި އެކުވެރި ދައުލަތްތަކާއި ބައިނަލްއަޤުވާމީ އެންމެހައި ފަރާތްތަކަށް އެމް.ޑީ.ޕީ އިން ގޮވައިލަމެވެ." އެބަޔާނުގައި ބުނެފައިވެއެވެ.

މިކަމާބެހޭ ގޮތުން ފުލުހުން އަދި އެއްޗެއް ބުނެފައެއް ނުވެއެވެ.