އަޅުގަނޑަކީ ސަރުކާރުން ރައްޔިތުންނަށް ދެމުންދާ އަނިޔާގެ ދިރިހުރި މިސާލެއް-ޑރ.ޑީޑީ

މިސަރުކާރުން ގެންދަނީ އެއްވެސް އިންސާފެއްނެތި ރައްޔިތުންނަށް އަނިޔާވެރިވަމުން ކަމަށް އެމްޑީޕީގެ ކުރީގެ ރައީސް ޑރ. އިބްރާހީމް ދީދީ (ޑރ. ޑީޑީ) މިރޭ ވިދާޅުވެއްޖެއެވެ.

"އަނިޔާވެރި ކަމާ ދެކޮޅަށް ދިވެހީން" ގެ ނަމުގައި ހުޅުމާލޭގައި މިރޭ ބޭއްވި ޖަލްސާގައި ވާހަކަ ދައްކަވަމުން ޑރ. ޑީޑީ ވިދާޅުވީ ސީދާ އޭނާއަކީ އެކަމުގެ ދިރިހުރި މިސާލެއް ކަމަށެވެ. ޑީޑީ ވިދާޅުވީ މުޒާހަރާއެއްގައި މަޑުމައިތިރި ކަމާއެކު ހުންނަވަނިކޮށް ފުލުހުންވަނީ މިއަހަރުގެ ފެބްރުއަރީމަހުގެ 27 ވަނަ ދުވަހުގެރޭ ޑީޑީ ހައްޔަރު ކޯށްފައެވެ. އެއީވެސް ވަރަށަ ބޮޑު އަނިޔާއެއް ކަމަށާއި އެކަން ކޮށްފައިވަނީ ޤާނޫނު ޢަސާސީ ޚިލާފަށް ކަމަށް ވިދާޅުވިއެވެ. އެކަން ކޮށްފައިވަނީ އެންމެންނަށް ފެންގޮތަށް ކަމަށްވެސް ވިދާޅުވިއެވެ.

އެހެން ކަމުން ސަރުކާރުން ރައްޔިތުންނަށް ކުރަމުންދާ އަނިޔާއިން ސަލާމަތްވުމަށް އެންމެންވެސް މަސައްކަތް ކުރުމަށް ޑީޑީ ގޮވައިލެއްވިއެވެ. އެގޮތުން މޭޑޭގައި ވީހާވެސް ގިނަބަޔަކު މާލެއައިސް ސަރުކާރު ހަމަމަގަށް އެޅުވުމަށް މަސައްކަތް ކުރުމަށްވެސް ޑީޑީ ރައްޔިތުންނަށް ގޮވައިލެއްވިއެވެ.

މޭޑޭގައި މާލެއަށް ކިތަންމެ ބައިވަރު މީހުން އަޔަސް ދެވަނަ 7 ފެބްރުއަރީ އެއް ދިވެހި ރާއްޖެއަށް ގެންނާކަށް ބޭނުންނުވާ ކަމަށްވެސް ވިދާޅުވިއެވެ. ޑީޑީ ވިދާޅުވީ ރައީސް ޔާމީންގެ ޢަމަލުތައް މިހާރު ހުންނަވާ ގޮތުން އެމަނިކުފާނުގެ ސިކުނޑި ފުޅުގައި މައްސަލައެއް ނެތްކަމާމެދު ޝައްކު ކަމަށެވެ. އެފަދަ ކަމެއްނެތް ކަމަށްވާނަމަ ޤާސިމް އިބްރާހިމްގެ އެކައުންޓުތައް ފުރީޒް ކުރުން ފަދަ ކަމެއް ކުރުމުގެ ވާހަކައެއްވެސް ނުދައްކަވާނެ ކަމަށެވެ.

ޑީޑީ ވިދާޅުވީ އެފަދަ ކަމެއް ސަރުކާރުން ކޮށްފި ކަމަށްވާނަމަ ޤާސިމްގެ އަމިއްލަ އެއާލައިން ފްލައިމީން އައްޑުއަށް ކުރަމުންދާ ދަތުރުތައްވެސް ހުއްޓިދާނެ ކަމަށެވެ. އެފަދަ ކަމެއް މެދުވެރިވެއްޖެ ކަމަށްވާނަމަ އައްޑޫ ސިޓީގެ ރައްޔިތުންގެ ރުޅިވެރިކަމާއި ހިތްހަމަނުޖެހުން އިންތިހާއަށް ދާނެ ކަމަށެވެ.

ފުލައިމީން އައްޑުއަށް ކުރަމުންދާ ދަތުރުތައް ހުއްޓާލަން ޖެހުނަސް ޤާސިމަށް ލިބޭނެ ގެއްލުމެއް ނެތްކަމަށްވެސް ވިދާޅުވިއެވެ. އޭގެ ބަދަލުގައި ގެއްލުންވަނީ އައްޑޫ ރައްޔިތުންނަށް ކަމަށްވެސް ވިދާޅުވިއެވެ. މޯލްޑިވިއަން އިން އެކަނި ރާއްޖޭގައި އޮޕަރޭޓް ކުރަމުންދިޔައިރު ޓިކެޓްގެ އަގުތައް ވަރަށް ބޮޑު ކަމަށްވެސް ޑީޑީ ވިދާޅުވިއެވެ. އެހެން ކަމުން ފުލައިމީ ހުއްޓާލަން ޖެހުމަކީ އަޑޫ ރައްޔިތުންނަށް ލިބޭނެ ނިކަމެތި ކަމެއް ކަމަށް ވިދާޅުވިއެވެ.