ރައީސް ޔާމީންގެ ސަރުކާރަކީ ވަޢުދު ނުފުއްދާ ސަރުކާރެއްގެ ލާމަސީލު މިސާލެއް- ޑރ. ޙުސައިން ރަޝީދު

ރައީސް ޢަބްދުﷲ ޔާމީނުގެ ސަރުކާރަކީ ވަޢުދު ނުފުއްދާ ސަރުކާރެއްގެ ލާމަސީލު މިސާލެއް ކަމަށް ޖުމްހޫރީޕާޓީގެ ނާއިބު ލީޑަރު ޑރ. ޙުސައިން ރަޝީދު ވިދާޅުވެއްޖެއެވެ.

މިސަރުކާރަކީ ރައްޔިތުންނަށް އެތައް ކަމެއް ކޮށްދެއްވާނެ ކަމުގެ އުންމީދީ ވަޢުދުތަކާގެން އައިސް އޮތް ސަރުކާރަކަށްވިޔަސް އެއްގޮތަކަށްވެސް ރިޔާސީ ވަޢުދު ފުއްދަމުން ގެންދާ ތަނެއް ނުފެންނަ ކަމަށް ޑރ. ޙުސައިން ވިދާޅުވިއެވެ.

ރަޝީދު ވިދާޅުވީ ވަޢުދުތައް ފުއްދުމުގެ ބަދަލުގައި މިސަރުކާރުން ގެންދަނީ ރައްޔިތުންނަށް ވަރަށް ބޮޑަށް އަނިޔާވެރިވަމުންނެވެ. އެހެން ކަމުން އަނިޔާވެރިކަން ނައްތާލުމަށްފަހު ހެޔޮވެރިކަމެއް ރައްޔިތުންނަށްޓަކައި ރާއްޖޭގައި ޤާއިމް ކޮށްދެއްވާނެ ކަމަށް ވިދާޅުވިއެވެ.

"އަނިޔާވެރިކަމާ ދެކޮޅަށް ދިވެހިން" ނަމުގައި ބާއްވާ ސިލްސިލާ ޖަލްސާގެ ތެރެއިން ހުޅުމާލޭގައި މިރޭ ހުޅުމާލޭގައިބޭއްވި ޖަލްސާގައި ވާހަކަ ދައްކަވަމުން ޙުސައިންރަޝީދު ވިދާޅުވީ މޭޑޭގައި ރައްޔިތުންނާއެކު މަގުމައްޗަށް ނިކުންނަނީ ކަރަންޓްގެ މައްސަލައަށް ހައްލެއް ހޯދުމަށް ކަމަށެވެ. ކަރަންޓުގެ މައްސަލަތައް ބޮޑުވެ ވިޔަފާރިތަކުގެ ކަރަންޓު ބިލްވަނީ އިންތިހާއަށް ބޮޑުވެފައެވެ. އަދި ސަބްސިޑީ ދިނުމުގައިވެސް ވަރަށްބޮޑެތި މައްސަލަތައް އެބަހުރި ކަމަށްވެސް ވިދާޅުވިއެވެ.

އޭނާ ވިދާޅުވީ ކުރިއަށްއޮތްތަނުގައި ރާއްޖޭގެ ވެރިކަން ކުރަން ބޭނުން ކަމަށްވާނަނަ ރައްޔިތުން ކުޑަކަކޫ މައްޗަށް ތިރިކޮށްގެން ރައީސް ޔާމީނަށް ވެރިކަމެއް ނުކުރެވޭނެ ކަމަށެވެ. އޭގެ ބަދަލުގައި ކަންކަން އިސްލާހުކޮށް ރައްޔިތުންނަށް ފުރިހަމަ އިންސާފާއެކު ކަންކަމން ކޮށްދެއްވައި ރައްޔިތުންގެ ލޯބި ލިބިގެން ނޫނީ ރައީސް ޔާމީނަށް ވެރިކަމެއް ނުކުރެވޭނެ ކަމަށެވެ.

މާލޭ ސިޓީ ކައުންސިލްގެ ހިންގާ ޢިމާރާތް ސަރުކާރަށް ނަގަން ކެބިނެޓުން ނިންމެވުމުން އެކަމަށްވެސް ރަޝީދުވަނީ ފާޑުވިދާޅުވެފައެވެ. ޑރ. ރަޝީދު ވިދާޅުވީ މާލޭސިޓީ ކައުންސިލް ހިންގާ ޢިމާރާތް ސަރުކާރަށް ނުނެގޭނެ ކަމަށްވެސް އޭނާ ވިދާޅުވިއެވެ.

ޑރ. ޙުސައިންރަޝީދުވަނީ ސަރުކާރުން ޤާސިމާމެދު ޢަމަލުކުރަމުންދާ ގޮތަށްވެސް ފާޑުވިދާޅުވެފައެވެ. ޙުސައިން ވިދާޅުވީ ޤާސިމަކީ ރާއްޖޭގެ ވިޔަފާރިވެރިންގެ ތެރޭގައި ވަރަށް ބޮޑަށް ފާހަގަކުރެވޭ ބޭފުޅެއް ކަމަށެވެ. ނަމަވެސް ރައީސް ޔާމީން ވެރިކަމަށް ވަޑައިގެން ފުރަތަމަވެސް މަސައްކަތް ކުރެއްވީ އެމަނިކުފާނުގެ ސަރުކާރުން ގެންނެވުމަށް އެންމެ ބޮޑަށް މަސައްކަތް ކުރެއްވި ޤާސިމް ސަރުކާރުން ބޭރު ކުރެއްވުމަށް ކަމަށެވެ. މިހާރު މަސައްކަތް ކުރައްވަނީ އެމަނިކުފާނުގެ ވިޔަފާރިތައް ބަނގުރޫޓުކޮށްލަން ކަމަށްވެސް ވިދާޅުވިއެވެ.