ކާނަލް ނާޒިމުގެ މައްސަލާގައި އެންމެ ބޮޑު ޒިންމާއެއް ނަގަންވާނީސީޕީ

ކުރީގެ ޑިފެންސް މިނިސްޓަރ މުޙަމައްދު ނާޒިމް ދިރިއުޅުއްވާ ގ. އެނިފް އިން ހަތިޔާރު ފެނި އޭގެ ތުހުމަތު އޭރުގެ މިނިސްޓަރ ނާޒިމްގެ އިސްތަށި ފުޅުގައި އަޅުވައި އެމައްސަލަ ކޯޓަށް ވައްދައި 11 އަހަރުގެ ޖަލުޙުކުމެއް ކުރެވިގެން ދިޔަ މައްސަލައިގެ އެންމެ ބޮޑު ޒިންމާ ނަންގަވަން ޖެހިވަޑައިގަންނަވާނީ މިހާރުގެ ކޮމިޝަނަރ އޮފް ޕޮލިސް (ސީޕީ) ޙުސައިން ވަޙީދު ކަމަށް ކުރީގެ ސީޕީ ޢަބްދުﷲ ރިޔާޒު ވިދާޅުވެއްޖެއެވެ.

މިހާރު ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު އަދި ޖޭޕީގެ ޕާލިމެންޓްރީ ގްރޫޕުގެ ޑެޕިޔުޓީ ލީޑަރ ރިޔާޒު ތުހުމަތު ކުރައްވަނީ ނާޒިމާމެދު އެގޮތަށް ކަންކަން ވެގެންދިޔައީ ފްރޭމްކޮށްގެން ކަމަށެވެ. އެކަމުގެ ޒިންމާ މިހާރުގެ ސީޕީ ނަންގަވަންޖެހޭ ސަބަބުގެ ތަފްސީލެއް ރިޔާޒު ނުދެއްވައެވެ.

ރިޔާޒު ވިދާޅުވީ އޭނާ ސީޕީއަކަށް ހުންނެވި އިރު ދުވަހަކުވެސް ފުލުހުންގެ މައްޗަށް ޤާނޫނޫ ޚިލާފު އަމުރެއް ނުކުރައްވާ ކަމުގެ ހިތްހަމަޖެހުން މިއަދު އެބައޮތް ކަމަށެވެ. ނަަމަވެސް އެފަަދަ އަމުރެއް ފުލުހުންގެ މައްޗަށް ނުކުރާ ކަމުގެ ޔަޤީން ކަމެއް މިހާރުގެ ސީޕީއަށް ނޯންނާނެ ކަމަށްވެސް ވިދާޅުވިއެވެ.

އޭނާ ވިދާޅުވީ ކޮންމެ މީހަކު ސީޕީ ކަމުގައި ހުންނެވިޔަސް ފުލުހުންގެ މައްޗަށްް ޤާނޫނާ ޚިލާފު އަމުރެއް ކޮށްގެން ނުވާނެ ކަމަށެވެ.ރިޔާޒު ވިދާޅުވީ ޤައުމު ސަލާމަތްކުރެވޭނީ ޤައުމާމެދު ސީރިއަސްކޮށް ވިސްނައިގެން އެއަށް ޢަމަލީ ސިފަ ގެނެސްގެން ކަމަށެވެ. އޭނާ ޕޮލިސް ކޮމިޝަނަރަކަށް ހުންނެވިއިރު އޭރުގެ ރައީސް ހިތްޕުޅާނުވާ ކަންކަން ދިޔަކަމަށްވެސް ވިދާޅުވިއެވެ. ނަަމަވެސް އެފަދަ ވަގުތުތަކުގައި ދައްކަން ޖެހެނީ ޤާނޫނު ޢަސާސީއާއި، ޤާނޫނުތައް ކަމަށްވެސް ވިދާޅުވިއެވެ.

އެޤާނޫނު އަސާސީންވަނީ މުޒާހަރާ ކުރުމުގެ ޙައްޤުވެސް ވަރަށް ފުޅާކޮށް ދީފައި ކަމަށް ވިދާޅުވިއެވެ. ނަމަވެސް މިހާރު ކުރަމުންދާ މުޒާހަރާތަކުގައި އެ ޙައްގު ހަނިކުރުމަށް ފުލުހުން ގެންދަނީ މަސައްކަތް ކުރަމުންނެވެ. "އެޙައްޤު ހަނިކުރެވިގެން ނުވާނެ" ރިޔާޒު ވިދާޅުވިއެވެ.

ޑރ. އަފްރާޝީމްގެ އަވަހާރަކޮށްލުމާ ބެހޭ ގޮތުންވެސް އޭނާވަނީ ރާއްޖެ ޓީވީގައި ރޭ ކޮންމެވެސް ވަރަކަށް ވާހަކަ ދައްކަވާފައެވެ. ރިޔާޒު ވިދާޅުވީ އެމައްސަލައިގައި އެކަމަށް މިހާރުވަނީ ޙުކުމްވެސް އިއްވާފައި ކަމަށެވެ. ނަމަވެސް އެކަމުގައި ބައިވެރިވެފައިވަނީ އެކަކު ނޫންކަމަށާއި، އެއަށްވުރެ ގިނަމީހުން ބައިވެރިވެފައިވާނެ ކަމަށް ދެކެވަޑައިގަންނަވާ ކަމަށްވެސް ވިދާޅުވިއެވެ. އެމައްސަލަ ބެއްލެވުމަށް ފުލުހުންގެ ހުރިހާ ވަސީލަތެއް ބޭނުންކުރެއްވި ކަމަށްވެސް ވިދާޅުވިއެވެ. އެކަމުގައި އެމެރިކާގެ އެހީތެރިކަން ލިބުނު ކަމަށްވެސް ވިދާޅުވިއެވެ. އެއީ "އަޅުގަނޑުގެ ހަނދާނުގައި އެންމެ ގިނަ މީހުން ބޭނުންކޮށްގެން ކުރި އެންމެ ބޮޑު ތަޙުޤީޤު" ކަމަށްވެސް ވިދާޅުވިއެވެ. އެމައްސަލަ އަދިވެސް ނިމުނުކަމެއް އެނގިވަޑައިގެންފައި ނުވާކަމަށާއި އެކަމާ ގުޅިގެން ފުލުހުން ބަސް ބުނަންޖެހޭ ކަމަށްވެސް ވިދާޅުވިއެވެ.

ރިޔާޒު ވިދާޅުވީ ރާއްޖެގައި ފުލުހުންނަށްވެސް އެންމެ މުހިންމުވާން ޖެހޭނީ ދިވެހި ރައްޔިތުން ކަމަށެވެ. އެކަން ދެނެތިބެ އެގޮތުގައި މަސައްކަތް ކުރެއްވުމަށް ފުލުހުންނަށް އޭނާވަނީ އިލްތިމާސް ކުރައްވާފައެވެ. އޭނާ ވިދާޅުވީ ކޮންސްޓަބަލުންއިން ފެށިގެން ޕޮލިސް ކޮމިޝަނަރާ ހަމަށް ވެސް މަސައްކަތް ކުރަންޖެހޭނީ ޤާނޫނީ އިމުގެ ތެރެއިން ކަމަށެވެ. އެގޮތުން އެއްވެސް ބަޔަކާ ރުޅިވެރިކަމެއް ނުބާއްވައި މަސައްކަތް ކުރުމަށް ފުލުހުންނަށް ރިޔާޒު ގޮވައިލެއްވިއެވެ.