ރާއްޖެއާއި ޗައިނާއިން ޢަސްކަރީ އެއްބަސްވުމެއްގައި ސޮއިކޮށްފި

އަސްކަރީ ދާއިރާއިން އެހީތެރިކަން ފޯރުކޮށްދިނުމާއިގުޅޭ ގޮތުން ދިވެހި ސަރުކާރާއި ޕީޕަލްސް ރިޕަބްލިކް އޮފް ޗައިނާއާ ދެމެދު އެމްއޯޔޫއެއްގައި މިއަދު ސޮއިކޮށްފިއެވެ.

ކޯސްޓްގާޑް ބިލްޑިންގެ ކޮންފަރެންސް ހޯލްގައި މިއަދު ބޭއްވި ރަސްމިއްޔާތުގައި މި އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ މޭޖަރ ޖެނެރަލް (ރިޓަޔާރޑް) މޫސާ ޢަލީ ޖަލީލެވެ. ޗައިނާ ސަރުކާރުގެ ފަރާތުން ސޮއި ކުރެއްވީ ޗައިނާއިން ރާއްޖެއަށް ކަނޑަޅުއްވާފައި ހުންނަވާ ސަފީރު ވަންގް ފޫކަންގްއެވެ.

މިއެއްބަސްވުމުގެ ދަށުން 64.5 މިލިއަން ދިވެހި ރުފިޔާގެ އެހީ ހަމަޖެހިގެންދާނެއެވެ. މިއެހީ ބޭނުންކުރާނެ ގޮތް ކަނޑައެޅިގެންދާނީ މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީއާއި ޗައިނާގެ މިނިސްޓްރީ އޮފް ނޭޝަނަލް ޑިފެންސް އާއި ދެމެދު މަޝްވަރާކުރެވި ޕްރޮޓޮކޯލްއެއް ކަނޑައެޅުމަށް ފަހުކަމަށް ޑިފެންސް މިނިސްޓްރީން ބުނެފައިވެއެވެ.

އަސްކަރީ ދާއިރާއިން އެހީތެރިކަން ފޯރުކޮށްދިނުމާއިގުޅޭ ގޮތުން ދިވެހި ސަރުކާރާއި ޗައިނާ ސަރުކާރާއި ދެމެދު އެމްއޯޔޫގައި ސޮއިކުރުމަށް ބޭއްވި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޝާހިދުގެ އިތުރުން ޖެނެރަލް އޮފިސަރުންނާއި ޑިފެންސް މިނިސްޓްރީގެ އިސްވެރިނާއި ޗައިނާ އެމްބަސީގެ އިސްވެރިން ބައިވެރިވެ ވަޑައިގެންނެވިއެވެ.

މި އެއްބަސްވުމަކީ ރައީސުލްޖުމުހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ ސަރުކާރުން ރާއްޖޭގެ ދިފާޢީ ދާއިރާގެ ކުރިއެރުމަށް ކުރެވުނު މަސައްކަތްތަކުގެ ދަށުން ވެފައިވާ އެއްބަސްވުމެކެވެ.