ސިޓީކައުންސިލްގެ ބިންތައް ސަރުކާރަށް ނަގަން ނިންމައިފި
20 ޢޭޕްރިލް 2015 22:17
މާލޭ ސިޓީ ކައުންސިލާ ޙަވާލުކުރައްވާފައިވާ ބައެއް ބިންތައް، ސަރުކާރަށް ނެގުމަށް މިމަހުގެ 19 ވަނަ ދުވަހު ބޭއްވި ކެބިނެޓް ބައްދަލުވުމުން ނިންމައިފިއެވެ.
ރައީސް އޮފީހުން ބުނެފައިވަނީ ބިންތައް ނަގަން ނިންމެވީ އިޖުތިމާޢީ އަދި އިޤްތިޞާދީ ކަންކަމަށް، ރައްޔިތުންނަށާއި ދައުލަތަށް އެންމެ ފައިދާހުރިގޮތުގައި ބޭނުން ކުރެއްވުމަށްޓަކައި ކަމަށެވެ.
އެބިންތައް ސަރުކާރަށް ނެގުމަށް ނިންމެވީ ލޯކަލް ކައުންސިލްތަކުގެ އިޙްތިޞާސް ހިނގާ ސަރަޙައްދުގައި ހިމެނޭ ދައުލަތުގެ ބިންތައް ކައުންސިލްތަކާ ޙަވާލުކުރުމާ ބެހޭ ޤަވާޢިދު' ގެ 4 ވަނަ މާއްދާގެ (ށ) ގެ 1 ވަނަ ނަންބަރުގައިވާ ގޮތުގެ މަތީން ކަމަށްވެސް ރައީސް އޮފީހުން ބުނެފައިވެއެވެ.
ވަޒީރުންގެ މަޖިލީހުން އެގޮތަށް މި ނިންމެވީ، މިމަހުގެ 19 ވަނަދުވަހު ބޭއްވި އެމަޖިލީހުގެ ޖަލްސާގައި މާލޭ ސިޓީ ކައުންސިލާ ހަވާލުކޮށްފައިވާ ބައެއް ބިންތައް، އަނބުރާ ނެގުމާ ގުޅޭގޮތުން މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރއިން ހުށަހެޅުއްވި ކަރުދާހެއްގެ މައްޗަށް މެންބަރުން މަޝްވަރާ ކުރެއްވުމަށްފަހު ކަމަށްވެސް ރައީސް އޮފީހުން ބުނެފައިވެއެވެ.
އިޖުތިމާޢީ ބޭނުމަށް ނެގުމަށް ނިންމަވާފައިވަނީ ގަލޮޅު ބިއްލޫރިޖެހިގެ (މިހާރުގެ މާލެ ސިޓީ ހޯލު) އިމާރާތާއި ބިމެވެ. އަދި ސަރުކާރުގެ ސިޔާސަތުގެ ތެރޭގައި ހިމެނޭ، އިޖުތިމާޢީ އަދި އިޤްތިޞާދީ ބޭނުމަށް ނެގުމަށް ނިންމަވާފައިވަނީ ލޯކަލް މާރުކޭޓް (ކޮށި ނަންބަރު 207) އާއި މަސް މާރުކޭޓު އެޅުމަށްޓަކައި ބޮޑުތަކުރުފާނު މަގު އުތުރުން ހިއްކާފައިވާ ބިންވެސް ނެގުމަށްވަނީ ނިންމާފައެވެ.
އެ ބިންތައް ސަރުކާރަށް އަނބުރާ ނެންގެވުމަށްޓަކައި ކުރައްވަންޖެހޭ ކަންތައްތައް، ކަމާބެހޭ ފަރާތްތަކާ މަޝްވަރާކުރައްވައިގެން ކުރެއްވުމަށް ރައީސުލްޖުމްހޫރިއްޔާ ޙަވާލު ކުރައްވާފައިވަނީ ހައުސިންގ މިނިސްޓްރީއާއެވެ.
ކިޔުންތެރިންގެ ހިޔާލު