ހަތަރު ރަށެއްގައި ޓްރެފިކް އެވެއާރނެސް ޕްރޮގްރާމެއް ހިންގައިފި

މަގުމަތީގެ ސަލާމަތާއި ރައްކާތެރިކަމަށް ރައްޔިތުން އަހުލުވެރިކުރުމުގެ ގޮތުން ދ.އަތޮޅުގެ ހަތަރު ރަށެއްގައި ހިންގި ޓްރެފިކް އެވެއާރނެސް ޕްރޮގްރާމް ނިމި ބައިވެރިންނަށް ސެޓްފިކެޓް ދީފިއެވެ.

މިމަހުގެ 12 އިން 18 ވަނަ ދުވަހާއި ހަމައަށް ދ.ބަނޑިދޫއާއި އެއަތޮޅު މީދޫއާއި، މާއެނބޫދޫގެ އިތުރުން ކުޑަހުވަދޫގައި ހިންގި އެ ޕްރޮގްރާމަކީ ރާއްޖޭގެ މަގުތަކަކީ އަމާން، ރައްކާތެރި މަގުތަކަކަށް ހެދުމަށްޓަކައި ރައްޔިތުން އަހުލުވެރިކުރުމުގެ ގޮތުން ހިންގި ޕްރިގްރާމެއް ކަމަށް ފުލުހުން ބުނެއެވެ.

މި ޕްރޮގްރާމްގެ ހިންގި ހަތަރު ރަށުގައި ސްކޫލް ދަރިވަރުންނާއި، އެކުދިންގެ ބެލެނިވެރިންނަށް ވަނީ މަޢުލޫމާތު ދީފައެވެ.

އެގޮތުން، ދަތުރުފަތުރުގެ ޤާނޫނާއި، އެޤާނޫނުން ބާރުލިބިގެން ހެދިފައިވާ ޤަވާއިދުތަކާއި ބެހޭ ގޮތުން ވަނީ މަޢުލޫމާތު ދީފައެވެ.އޭގެތެރޭގައި، މަގުމަތީގެ ސަލާމަތާއި ރައްކާތެރިކަމަށް މަސައްކަތްކުރުމުގައި ފުލުހުން ސަމާލުކަންދޭ ކަންތައްތަކާއި، ޓްރެފިކް ކޮންޓްރޯލް މެނޭޖްކުރުމާއި، ވެހިކަލް ޗެކް ޕޮއިންޓް ޖެހުމާއި، ވެހިކަލް ބަލާ، ފާސްކުރުމުގައި ސަމާލުކަން ދޭންވީ ކަންތައްތަކާއި ބެހޭގޮތުން ވަނީ ދަރިވަރުންނާއި ބެލެނިވެރިން އަހުލުވެރިކުރުވާފައެވެ.މި ޕްރޮގްރާމް ސެންޓްރަލް ޕޮލިސް ޑިވިޜަންގައި ހިމެނޭ ތިން އަތޮޅުގައި ކުރިއަށް ގެންދިޔުމަށްވަނީ ހަމަޖެހިފައެވެ.