މިނިވަން މުޢައްސަސާތަކުގެ ވެރިންގެ މައްޗަށް ޝަރީޢަތް ހިންގަންޖެހޭ-ފައްޔާޒު

ރާއްޖޭގައި ޢަދުލު އިންސާފް ޤާއިމް ކުރަން ބޭނުން ކަމަށްވާނަމަ މިނިވަން މުޢައްސަސާތަކުގެ ވެރިންގެ މައްޗަށް ޝަރީޢަތް ހިންގަންޖެހޭ ކަމަށް ރައްޔިތުންގެ މަޖިލީހުގެ ލ. ގަމުދާއިރާގެ މެންބަރު އަލްއުސްތާޒު ފައްޔާޒު އިސްމާޢީލް މިރޭ ވިދާޅުވެއްޖެއެވެ.

"އަނިޔާވެރިކަމާ ދެކޮޅަށް ދިވެހިން" ގެ ނަމުގައި މާލޭގައި ރޭ ބޭއްވި މުޒާހަރާގައި ވާހަކަ ދައްކަވަމުން އޭނާ ވިދާޅުވީ އާ ޤާނޫނު ޢަސާސީއެއް ހެދުމަށްފަހު ތިންބާރު ވަކިވެފައިވާ ވެރިކަމެއް ރާއްޖޭގައި ޤާއިމް ކުރެވުނު ކަމަށެވެ.

އެތިންބާރުގެ މައްޗަށް ފާރަވެރިވުމަށް މިނިވަން މުޢައްސަސާތަކެއްވެސް އުފެއްދި ކަަމަށެވެ. އެހެންނަމަވެސް އެފަދަ މުޢައްސަސާތަކުގެ ވެރިން ގެންދަނީ ސަރުލާރުން ހިންގާ ލާއިންސާނީ އަނިޔާތަކުގައި ބައިވެރިވެ ރައްޔިތުންނަށް "ޙަރާމްކޯރު ވަމުން" ކަމަށެވެ. އެހެން ކަމުން އެފަދަ މީހުންގެ މައްޗަށް ޝަރީޢަތް ހިންގަން ޖެހޭނެ ކަމަށެވެ.

އޭނާ ވިދާޅުވީ މިހާރު ދިމާވެފައިވާ އެންމެބޮޑު އަނިޔާވެރި ކަމަކީ ތިންބާރުގެ މައްޗަށް އިސްކޮށްފައިވާ މިނިވަން މުޢައްސަސާތައް މަސްހުނިވުން ކަމަށެވެ.

ސަރުކާރުގެ އަނިޔާވެރިކަމާހެދި ދިވެހިރައްޔިތުން މިހާރު މިތިބީ ބިރުވެރިކަމެއްގެ ތެރޭގައި ކަމަށް ޤަބޫލު ކުރައްވާ ކަމަށްވެސް ފައްޔާޒު ވިދާޅުވިއެވެ. އެހެންނަމަވެސް ދަރީންގެ ދަރީންގެ މުސްތަގްބަލަށްޓަކައިވެސް އަނިޔާވެރިކަމާ ދެކޮޅަށް ނުކުންނަން ޖެހޭ ކަމަށް ވިދާޅުވިއެވެ. އެގޮތުން މެއިމަހުގެ އެއްވަނަ ދުވަހު ބާއްވާ ބޮޑު އެއްވުމަށް ވީހާވެސް ގިނަބަޔަކު އައިސް ބައިވެރިވުމަށް ފައްޔާޒް ގޮވައިލެއްވިއެވެ.