މެއިމަހުގެ ފުރަތަމަ ދުވަހަކީ ނަތީޖާ ނެރޭނެ ދުވަސް-ޢަލީ ވަޙީދު

އަންނަ މެއިމަހުގެ ފުރަތަމަ ދުވަހަކީ ސަރުކާރާ އިދިކޮޅު ޕާޓީތައް ގުޅިގެން މިހާރު ބާއްވަމުން ގެންދާ އިހުތިޖާޖު ތަކުގެ ނަތީޖާ ނެރޭނެ ދުވަސް ކަމަށް އެމްޑީޕީގެ ޗެއަރޕާސަން ޢަލީ ވަޙީދު ރޭ ވިދާޅުވެއްޖެއެވެ.

"އަނިޔާވެރިކަމާ ދެކޮޅަށް ދިވެހިން" ގެ ނަމުގައި އައްޑޫ ސިޓީ ހިތަދޫގައި ރޭ ބޭއްވި ޖަލްސާގައި ވާހަކަ ވާހަކަ ދައްކަވަމުން ޢަލީ ވަޙީދު ވިދާޅުވީ ނަތީޖާ ނުނެރެވެނީސް އެދުވަހު ގެއަށް ނުވަންނާނެ ކަމަށެވެ. އެދުވަހަކީ އިރުއޮއްސުމުން މުޒާހަރާ ހުއްޓާލައިފައި ގެއަށްވަންނާނެ ދުވަހެއް ނޫން ކަމަށާއި، ގެއަށް ވަންނާނީ ނަތީޖާ ނެރުމަށްފަހު ކަމަށެވެ.

ޢަލީ ވަޙީދު މިހެން ވިދާޅުވިޔަސް އެދުވަހު ނެރޭނީ ކޮން ނަތީޖާއެއް ކަމެއް ވިދާޅެއް ނުވެއެވެ. އެދުވަހުގެ ނަތީޖާއަކަށްވާނީ ކޮންކަމެއްތޯ އެހުމަށް ޢަލީ ވަޙީދާއި، އެމްޑީޕީގެ ތަރުޖަމާނު އިމްތިޔާޒު ފަހުމީއާއި، އެޕާޓީގެ ނާއިބު ރައީސް ޝިފާޒަށް ގުޅުމުން ފޯން ނުނަންގަވައެވެ.

ރޭގެ ޖަލްސާގައި ޢަލީ ވަޙީދު ވިދާޅުވީ އަނިޔާވެރިކަމާ ދެކޮޅަށް ރައްޔިތުން ކުރަންވީ ކަމަކީ އެންމެން ނުކުމެ ރައީސް ޔާމީނާއި އެމަނިކުފާނުގެ ސަރުކާރު "ކުޑަކަކޫ ޖެއްސުވުން" ކަމަށެވެ. އެކަމަށްޓަކައި މެއިމަހުގެ ފުރަތަމަ ދުވަހު ރައްޔިތުން މާލެ ޖަމާވާން ޖެހޭ ކަމަށެވެ. އެހެންކަމުން އެދުވަހުގެ ނަތީޖާއަކަށްވާނީ ސަރުކާރު "ކުޑަކަކޫ ޖެއްސުވުން" ކަމަށް ބެލެވެއެވެ.

ސަރުކާރާ އިދިކޮޅު ފަރާތްތަކުން މަގުތަކަށް ނުކުމު މުޒާހަރާ ކުރަމުންދަނީ ސަރުކާރު ޒިންމާދާރު ކުރުވުމަށް ކަމަށް ބުނެފައެވެ. އަދި ސަރުކާރުން ކުރަމުންދާ ޤާނޫނު އަސާސީއާ ޚިލާފު ކަންކަން ހުއްޓައި އިންސާފަށް ރުޖޫޢަވުމަށް ސަރުކާރަށް ގޮވާލަން ކަމަށް ބުނެއެވެ. ނަމަވެސް ސަރުކާރުން ބުނެފައިވަނީ ޤާނޫނާ ޚިލާފަށް ސަރުކާރުން ކުރަމުންދާ އެއްވެސް ކަމެއް އިދިކޮޅު ފަރާތްތަކަށް ނުދެއްކޭ ކަމަށެވެ.ރޭގެ ޖަލްސާގައި ޢަލީ ވަޙީދު ވިދާޅުވީ ޤައުމުގެ ކަންކަމާމެދު ވާހަކަ ދެއްކުމުގެ ފުރުސަތު ރައީސް އަބްދުﷲ ޔާމީނަށް އެބައޮތް ކަމަށެވެ. ނަމަވެސް އެފުރުސަތު އޮތީ ޕްރީލް މަހު 30 ވަނަ ދުވަހުގެރޭ ދަންވަރު 12:00 އާ ހަމައަށް ކަމަށެވެ. އެއަށްފަހު ރައީސް ޔާމީނަށް ފުރުސަތު ގެއްލޭނެ ކަމަށްވެސް ވިދާޅުވިއެވެ.

އޭނާ ވިދާޅުވީ ރައީސް ޔާމީނާއެކު ސަރުކާރު ޤާއިމްކުރި ޖޭޕީ ސާރުކާރު ކޯލިޝަނުން ވަކިވުމަށްފަހު ސަރުކާރުގައި އެއްވެސް ސީރިއަސް ކަމެއްނެތް ކަމަށެވެ. އަދި މިސަރުކާރުގައި ޕީޕީއެމްގެ ރައީސް މައުމޫން ޢަބްދުލް ޤައްޔޫމުގެ އެއްވެސް ބާރެއްނެތް ކަމަށްވެސް ވިދާޅުވިއެވެ. އެމަނިކުފާނުގެ ދޮށީ ދަރިކަލުން ފާރިޝް މައުމޫން ދިއްގަރު ދާއިރާގެ މަޖިލިސް ގޮނޑިއަށް ކުރިމަތި ލެއްވުމަށް ނިންމެވީވެސް އެހެންވެގެން ކަމަށް ވިދާޅުވިއެވެ.

ކަރަންޓް ބިލް ބޮޑުވުމުގެ މައްސަލާގައި ޢަލީ ވަޙީދު ވިދާޅުވީ "އައްޑޫގެ ހުރިހާ ރައްޔިތުން އެކުއެކީގައި ނުކުމެއްޖެ ކަމަށްވާނަމަ ލާހިކެއް ނޫން ކަރަންޓް ބިލް ބޮޑުކުރާކަށް. ކޮން ފެނަކައެއްތޯ؟ އެއީ ކާކުތޯ؟ އެއީ މާ މަތިން އައިސްގެން އުޅޭ ބައެއް ނޫނޭ އިނގޭތޯ. ރައްޔިތުން އަތުން ޓެކްސް އާއި ފީ ނެގުމަށް ފަހު ނުޖެހެއޭ ކަރަންޓް ޔުނިޓެއްގެ އަގު ހަ ރުފިޔާއަކަށް ބޮޑުކުރާކަށް،" ކަމަށެވެ.