އައްޑޫ ސިޓީގެ ތަރައްގީއަށް މަސައްކަތް ކޮށްދެއްވި ރައީސަކީ ނަޝީދު- ރޮޒައިނާ

އައްޑޫސިޓީގެ ތަރައްގީއަށް މަސައްކަތް ކޮށްދެއްވި ހަމައެކަނި ރައީސަކީ ރާއްޖޭގެ ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ކަމަށް އައްޑޫމީދޫ ދާއިރާގެ މަޖިލިސް މެމްބަރ ރޮޒައިނާ އާދަމް މިރޭ ވިދާޅުވެއްޖެއެވެ.

"އަނިޔާވެރިކަމާ ދެކޮޅަށް ދިވެހީން" ގެ ނަމުގައި އައްޑޫ ސިޓީގައި މިރޭ ބޭއްވި ޚާއްސަ ޖަލްސާގައި ވާހަކަ ދައްކަވަމުން ރޮޒައިނާ ވިދާޅުވީ އެސަބަބާހެދި އެސިޓީއަކީ ރައީސް ނަޝީދުގެ ސިޓީއެއް ކަމަށެވެ. އެސިޓީން އަދިވެސް މެޖޯރިޓީ ލިބޭނީ ރައީސް ނަޝީދަށް ކަމަށްވެސް ވިދާޅުވިއެވެ.

ރައީސް ޔާމީން ސަރުކާރުން އައްޑޫސިޓީއަށް ވަފުދުތައް ވަޑައިގެން އާ މަޝްރޫއުތައް ފަށާ ކަމުގެ ވާހަކަ ދެއްކިޔަސް އެއިންކޮންމެ ކަމަކީ ނަޝީދު ފަށްޓަވައި ދެއްވާފައިވާ ކަންކަން ކަމަށެވެ. އެމަނިކުފާނު އައްޑޫގެ ތަރައްޤީއަށް ފަށްޓަވާފައިވާ މަޝްރޫޢުތައް ހުއްޓުވާލީ އެމަނިކުފާނުގެ ސަރުކާރު ބަދަލުވި ހިސާބުން ކަމަށްވެސް ވިދާޅުވިއެވެ.

އަޑޫގައި ފެނާއި ނަރުދަމާގެ ޚިދުމަތް ރައީސް ނަޝީދުގެ ވެރިކަމުގައި ފެށްޓެވި ނަމަވެސް މިސަރުކާރުންވަނީ "އަލުން" އެމަސައްކަތް ފަށައިފައެވެ. ހައެއްކަމަސް ކުރިން އެމަސައްކަތް ފެށިނަމަވެސް އެފަހުން އޭގެ އެއްވެސް ޚަބަރެއް ނުވާކަމަށް ވިދާޅުވިއެވެ.

އެވަރުން އައްޑޫސިޓީގެ ތަރައްޤީއަށް މިސަރުކާރުން އެއްވެސް ކަމެއް ކޮށްދެވޭނެ ކަމަށް ޤަބޫލް ނުކުރެވޭ ކަމަށްވެސް ވިދާޅުވިއެވެ. ސަރުކާރުން ފުޓްސެލް ދަނޑެއް ހަދައިދިނަސް އެއީ ތަރައްޤީއަށް ބަލާއިރު އެއްވެސް ކަމެއް ނޫންކަމަށްވެސް ވިދާޅުވިއެވެ. އޭގެ ބަދަލުގައި ސާފު ބޯފެން މާ ބޮޑަށް މުހިންމު ކަމަށް ވިދާޅުވިއެވެ.