ބައިނަލް އަޤުވާމީ ވަކީލުން ދައްކާނީ ރާއްޖޭގެ ޖުޑިޝަރީގެ ދޯހަޅި ކަމުގެ ވާހަކަ-ޙަސަން ލަތީފް
16 ޢޭޕްރިލް 2015 1:20
ތޭރަ އަހަރުގެ ޖަލު ޙުކުމެއް ތަންފީޒު ކުރަމުންދާ ރާއްޖޭގެ ކުރީގެ ރައީސް މުޙައްމަދު ނަޝީދުގެ ދިފާޢުގައި މަސައްކަތްކުރާ ބައިނަލް އަޤުވާމީ ޤާނޫނީ ވަކީލުން، ރާއްޖޭގެ ގޮނޑުދޮށްތަކުގެ ރީތި ވާހަކަ ދެއްކުމުގެ ބަދަލުގައި ދައްކާނީ ރާއްޖޭގެ ޖުޑިޝަރީގެ ދޯހަޅި ކަމުގެ ވާހަކަ ކަމަށް ރައީސް ނަޝީދުގެ ޤާނޫނީ ވަކީލް ޙަސަން ލަތީފް ވިދާޅު ވެއްޖެއެވެ.
ޙަސަން ލަތީފް ވިދާޅުވީ ރައީސް ނަޝީދު މިނިވަންކޮށް އެމަނިކުފާނަށް އިންސާފް ހޯދައި ދިނުމަށް މަސައްކަތްކުރާ ބޭރުގެ 3 ވަކީލުން މިހާރުވެސް މަސައްކަތް ކުރަމުން ގެންދާ ކަމަށެވެ. އެމީހުން މަސައްކަތްކުރާނީ އދ. ގެތެރެއިން ކަމަށްވެސް ވިދާޅުވިއެވެ.
އެމީހުންނަށް ބޭނުންވާ ލިޔެކިޔުންތައް އިނގިރޭސި ބަހަށް ބަދަލުކޮށް މިހާރު އެމީހުންނަށް ފޮނުވުމުގެ މަސައްކަތް ކުރަމުންދާ ކަަމަށްވެސް ޙަސަން ވިދާޅުވިއެވެ.
ޙަސަން ލަތީފް ވިދާޅުވީ ރައީސް ނަޝީދުގެ މައްސަލަ މިހާރުވެފައިވަނީ "ގާދޫކޮލުން ނުކުމެ" ބައިނަލް އަޤުވާމީ މައްސަލައަކަށް ވެފައި ކަމަށެވެ. އެހެން ކަމުން ދުނިޔޭގެ އެކި ކަންކޮޅުތަކުގައި އެވާހަކަ ފެތުރިގެންދާއިރު ރާއްޖޭގެ ޖުޑިޝަރީގެ "ހުތުރުވާހަކަ" ދެއްކޭނެ ކަމަށެވެ. ނަމަވެސް އެއީ އެކަން ވާންބޭނުންވާ ގޮތެއް ނޫންކަމަށްވިޔަސް އެކަން މިހާރުވަނީ އެގޮތަށް ބަދަލުވެފައި ކަމަށް ވިދާޅުވިއެވެ.
ރައީސް ނަޝީދުގެ މައްސަލާގައި ވާހަކަ ދައްކާއިރު ފަތުރުވެރިކަމަށް މަޝްހޫރު ރާއްޖޭގެ ގޮނޑުދޮށްތަކުގެ ވާހަކަ ދައްކާނެ ކަމަށް އެކަކުވެސް ޤަބޫލުކޮށްގެން ނުވާނެ ކަމަށްވެސް ވިދާޅުވިއެވެ. އެފަދަ ވާހަކަތަކެއް ދެކެވޭނީ ރައްޔިތުންނަށް އިންސާފާއި ހަމަހަމަ ކަމާއި ފުރިހަމަ މާނާގައި މިނިވަންކަން ލިބިގެން ކަމަށްވެސް އޭނާ ވިދާޅުވިއެވެ.
ޙަސަލް ލަތީފް ވިދާޅުވީ ރައީސް ނަޝީދު މިނިވަން ކުރުމަށް އެމަނިކުފާނުގެ ޤާނޫނީ ޓީމާ ގުޅިފައިވާ ބޭރުގެ ވަކީލުން ރާއްޖެއަށް އަންނަ ގޮތަށް އަދި ހަމަޖެހިފައި ނުވާ ކަމަށެވެ. ނަމަވެސް އަންނަން ޖެހިއްޖެއްޔާ ރާއްޖެއަށްވެސް އަންނާނެ ކަމަށް ވިދާޅުވިއެވެ. އެމީހުން މަސައްކަތްކުރާނީ ބޭރުގައި ތިބެގެން އދ. ގެ ތެރެއިން ރައީސް ނަޝީދަށް އިންސާފު ހޯދައި ދިނުމަށް ކަމަށްވެސް ޙަސަން ވިދާޅުވިއެވެ.
އެމީހުން ރައީސް ނަޝީދުގެ ޤާނޫނީ ޓީމާ ގުޅުމަކީ ލިބުނު ވަރަށް ބޮޑު އުންމީދެއް ކަމަށްވެސް ޙަސަން ލަތީފް ވިދާޅުވިއެވެ.
ކިޔުންތެރިންގެ ހިޔާލު