ޤާނޫނުތަކަށް ހޭލުންތެރިކުރުމުގެ ޕްރޮގްރާމެއް ބަނޑިދޫގައި ހިންގައިފި
13 ޢޭޕްރިލް 2015 22:28
އާންމު އިޖްތިމާޢީ މިންގަނޑުތަކާއި ހިލާފު ޢަމަލުތައް ހުއްތުވުމާއި ބެހޭ ޤާނޫނާއި އެއްގަމު ދަތުރު ފަތުރުގެ ޤާނޫނާއި ބެހޭގޮތުން މަޢުލޫމާތުދީ ހޭލުންތެރިކުރުމުގެ ގޮތުން ދ. ބަނޑިދޫގައި ޕްރޮގްރާމެއް ހިންގައިފި ކަމަށް ފުލުހުން ބުނެފިއެވެ.
މިއޭޕްރީލް މަހުގެ 12 ވަނަ ދުވަހު ހިންގި މި ޕްރޮގްރާމުގައި މަޢުލޫމާތު ދީފައިވަނީ ބަނޑިދޫ ސްކޫލުގެ ބެލެނިވެރިންނާއި އެސްކޫލުގެ ގްރޭޑް 8 ން މަތީ ގްރޭޑް ތަކުގެ ދަރިވަރުންނާއި އެރަށުގައި ހުރި މުއައްސަސާތަކުގެ މުވައްޒަފުންގެ އިތުރަށް ޒުވާނުންނަށް ކަމަށް ފުލުހުން ބުނެފައިވެއެވެ.
އެގޮތުން ބެލެނިވެރިންނަށާއި ދަރިވަރުންގެ އިތުރުން އެކު މުއައްސަސާތަކުގެ މުވައްޒަފުންނާއި ރަށުގެ ޒުވާނުންނަށް ވަކިވަކިން ހިންގި ސެޝަންގައި މަޢުލޫމާތު ދީފައިވަނީ އާންމު އިޖްތިމާޢީ މިންގަނޑުތަކާއި ހިލާފު ޢަމަލުތައް ހުއްޓުވުމާއި ބެހޭ ޤާނޫނާއި އެއްގަމު ދަތުރު ފަތުރުގެ ޤާނޫނާއި ބެހޭގޮތުންނެވެ. އަދި ދަރިވަރުންނަށް ހިންގި ސެޝަންގައިވަނީ ޓްރެފިކް ނިޝާންތަކާއި ބެހޭގޮތުން މަޢުލޫމާތު ދީ ނިޝާާންތައް ބޭނުންކުރާނެ ގޮތްތަކާއި ނިޝާންތައް ދައްކާލާފައެވެ. އަދި ނިޝާންތައް ދެއްކުމުގައި ޢަމަލު ކުރާ ގޮތްތައް ޢަމަލީގޮތުން ތަޖުރިބާކޮށްފައިވެއެވެ.
ބަނޑިދޫގައި ހިންގި އެ ޕްރޮގްރާމަކީ ސެންޓްރަލް ޕޮލިސް ޑިވިޜަން އާއި ޓްރެފިކް މެނޭޖްމަންޓް ޑިޕާޓްމަންޓް ގުޅިގެން ހިންގި ޕްރޮގްރާމެކެވެ.
ކިޔުންތެރިންގެ ހިޔާލު