މަސްތުވާ ތަކެއްޗާއެކު ކުޑަކުއްޖަކު ހައްޔަރު ކޮށްފި

މަސްތުވާތަކެތިކަމަށް ޝައްކުކުރެވޭ އެއްޗެއްހުރި 150 ސެލޯފިންކޮޅާއެކު ކުޑަކުއްޖަކު އިހަވަންދޫއިން ފުލުހުންގެ ބެލުމުގެ ދަށަށް ގެންގޮސްފިއެވެ.

މިމައްސަލައާއި ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ 15 އަހަރުގެ ފިރިހެން ކުއްޖެއް ކަމަށްވެސް ފުލުހުން ބުނެފައިވެއެވެ.

އެ ކުއްޖާ ފުލުހުންގެ ބެލުމުގެ ދަށަށް ގެނެސްފައިވަނީ އިހަވަންދޫއަށް މަސްތުވާތަކެތި އެތެރެކުރަން އުޅޭކަމަށް ފުލުހުންނަށް ލިބުނު މަޢުލޫމާތަކާއި ގުޅިގެން އިހަވަންދޫ ޕޮލިސް ސްޓޭޝަނުން ހިންގި އޮޕަރޭޝަނެއްގައި މި އޭޕްރީލް މަހުގެ 8 ވަނަ ދުވަހުގެ 14:58 ހާއިރު މަގުމަތިން ކަމަށް ފުލުހުން ބުނެފައިވެއެވެ.

އެ ކުއްޖާ މަގުމަތިން ހުއްޓުވައި ފުލުހުންގެ ބެލުމުގެ ދަށަށް ގެނެސްފައިވަނީ މާލެއިން އިހަވަންދޫއަށް އައި ބޯޓަކުން ގެނައި ފޮށިގަނޑެއް ހިފައިގެންގޮސް އެރަށު ފަޅު ގޯއްޗެއްގެ ކެޔޮގަސްތަކެއްގެ ތެރޭގައި ފޮރުވުމަށްފަހު އެގޯތިން ނުކުމެގެން ދަނިކޮށް ކަމަށްވެސް ފުލުހުންވަނީ ބުނެފައެވެ.

މަސްތުވާތަކެތިކަމަށް ޝައްކުކުރެވޭ އެއްޗެއްހުރި ސެލޯފިންކޮޅުތައް ފެނިފައިވަނީ އެ ކުއްޖާ ފޮރުވި ފޮށިގަނޑު ހޯދައި އެފޮށިގަނޑު ބަލައިފާސްކުރިއިރު އޭގެ ތެރެއިންނެވެ.މިމައްސަލައާއި ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ ކުއްޖާގެ ބަންދާމެދު ގޮތެއް ނިންމުމަށްޓަކައި އިހަވަންދޫ މެޖިސްޓްރޭޓް ކޯޓަށް ހާޒިރުކުރުމުން ވަނީ ގޭބަންދުގައި ބަހައްޓައިގެން ތަހުޤީޤު ކުރިއަށް ގެންދިޔުމަށް މި އޭޕްރީލް މަހުގެ 9 ވަނަ ދުވަހުން ފެށިގެން 15 ދުވަހުގެ މުއްދަތެއް ދީފައެވެ.

މިމައްސަލަ އިހަވަންދޫ ޕޮލިސް ސްޓޭޝަނުން ދަނީ ތަހުޤީޤު ކުރަމުންނެވެ.