ދިއްގަރު ދާއިރާގެ މެންބަރު ނާޒިމަށް 25 އަހަރަށް ޖަލަށް

ރައްޔިތުންގެ މަޖިލީހުގެ ކުރީގެ ނާއިބް ރައީސް އަދި ރައްޔިތުންގެ މަޖިލީހުގެ ދިއްްގަރު ދާއިރާގެ މެންބަރ އަޙުމަދު ނާޒިމްގެ މައްޗަށް 25 އަހަރުގެ ޖަލު ޙުކުމެއް ސްޕްރީމް ކޯޓުން ކޮށްފިއެވެ.

ނާޒިމްގެ މައްޗަށް ޙުކުމް ކޮށްފައިވަނީ މަކަރާއި ޙީލަތް ހެދުމުގެ މައްސަލައެއް އޭނާގެ މައްޗަށް ސާބިތުވުމާ ގުޅިގެންނެވެ. މިމައްސަލަ ސާބިތުވުމާ ގުޅިގެން 25 އަހަރަށް އޭނާ ޖަލަށް ލުމަށް ޙުކުމް ކޮށްފައިވަނީ ސްޕްރީމް ކޯޓުގެ ފަސް ފަނޑިޔާރުންގެ އިއްތިފާގުންނެވެ.

ދައުލަތުންވަނީ މަކަރާއި ޙީލަތް ހެދުމުގެ 4 މައްސަލައެއްގެ ދަޢުވާ ނާޒިމްގެ މައްޗަށް އުފުލާފައެވެ. އޭގެ ތެރެއިން ސާބިތުވެ ޙުކުމް އިއްވާފައިވަނީ އެއް މައްސަލައެވެ. އަދި 3 މައްސަލައެއް އެބައޮތެވެ. އެމައްސަލަތައްވެސް މިހާރު ހުރީ ޙުކުމް އިއްވާ ހިސާބުގައި ކަމަށް މަޢުލޫމާތު ލިބިފައިވެއެވެ.

ނާޒިމްގެ މައްޗަށް ސްޕްރީމްކޯޓުން ހުކުމްކުރީ އެޓޯލްސް މިނިސްޓްރީ އަށް 15000 ދިދަ ގަތުމަށް ބީލަމަށް ހުޅުވާލުމުން އޭނާގެ ޙިއްސާ އޮންނަ ނަމިރާ އިންޖިނިއަރިން އާއި އެ ކުންފުނީގެ މުވައްޒަފުން ބޭނުންކޮށްގެން މަކަރާއި ހީލަތުން އެބީލަން ކާމިޔާބުކޮށްފައިވާ ކަމަށް ބުނެ ދައުލަތުން ދަޢުވާ ކުރުމުންނެވެ. ޙުކުމް އިއްވަމުން އުއްތަމަ ފަނޑިޔާރު ޢަބްދުﷲ ސަޢީދު ވިދާޅުވީ އެމައްސަލައިގައި ދައުލަތަށްވަނީ 1.4 މިލިއަން ރުފިޔާ ގެއްލުންވެފައި ކަމަށެވެ. އެމައްސަލައިގައި ނާޒިމްގެ މައްޗަށް 25 އަހަރަށްވުރެ ދިގު ޙުކުމެއް ކުރަން ޖެހުނަސް ޤާނޫނުލް ޢުޤޫބާތު ބުނާގޮތުގައި އެއަށްވުރެ ދިގު ޙުކުމެއް ކުރެވެންނެތް ކަމަށްވެސް އުއްތަމަ ފަނޑިޔާރު ވިދާޅުވިއެވެ.

ނާޒިމްގެ މައްޗަށް 25 އަހަރުގެ ދިގު ޙުކުމެއް ކޮށްފައިވިޔަސް އޭނާގެ އަތުން 1.4 މިލިއަން ރުފިޔާ ދައުލަތަށް ނަގައި ދިނުމަށް ދައުލަތުން އެދިފައިވެއެވެ. ނަމަވެސް އެ ފައިސާ ދައުލަތަށް ނަގައިދެވެން ނެތް ކަމަށް ސުޕްރީމް ކޯޓުން ވަނީ ކަނޑައަޅާފައެވެ.

މިދަޢުވާތައް ނާޒިމާ ދެކޮޅަށް ދައުލަތުން ފުރަތަމަ އުފުލާފައިވަނީ ކްރިމިނަލް ކޯޓުގައެވެ. އެމައްސަލަތައް ނާޒިމްގެ މައްޗަށް ސާބިތުނުވާ ކަމަށް އެކޯޓުން ނިންމުމުން ދައުލަތުންވަނީ ހައިކޯޓުގައި އިސްތިއުނާފް ކޮށްފައެވެ. ހައިކޯޓުންވެސް ނިންމީ އެމައްސަލަ ސާބިތު ނުވާކަމަށެވެ.

އެމައްސަލަ ސްޕްރީމް ކޯޓަށް ހުށަހެޅުމުން އެމައްސަލަ ސާބިތުވާ ކަމަށް އެކޯޓުން ނިންމެވީ މިއަދުއެވެ. އެ ޙުކުމާ ގުޅިގެން ނާޒިމްގެ މަޖިލިސް މެންބަރުކަން ގެއްލި އޭނާ ފުރަމުންދިޔަ ގޮނޑިވެސް މިހާރުވަނީ ހުސްވެފައެވެ. އެ ގޮނޑި ހުސްވުމުން ބައެއް ފަރާތްތަކުންވަނީ އެގޮނޑިއަށް ވާދަކުރުމުގެ ޝައުގުވެރިކަން ފާޅުކޮށްފައެވެ.