ކްރިމިނަލް ކޯޓާއި ފުލުހުން ގެންދަނީ މަހުލޫފާއި ޢާއިލާއަށް އަނިޔާވެރި ވަމުން-އެމްޑީޕީ

އަނިޔާވެރިކަމާ ދެކޮޅަށް ކުރަމުންދާ މުޒާހަރާގެ ތެރެއިން ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރ ޢަޙްމަދު މަޙުލޫފް ހައްޔަރުކުރުމަށްފަހު ފުލުހުންނާއި ކްރިމިނަލް ކޯޓުން ގެންދަނީ މަހުލޫފަށާއި އޭނާގެ ޢާއިލާއަަށް ފުރައްސާރަކޮށް އަނިޔާވެރި ވަމުން ކަމަށ އެމްޑީޕީން ބުނެފިއެވެ.

އެޕާޓީން މިއަދު ނެރެފައިވާ ބަޔާނެއްގައި ބުނެފައިވަނީ "މިހާރު ކްރިމިނަލް ކޯޓުން ފާޅުކަންބޮޑުގޮތެއްގައި އެމަނިކުފާނަށް (މަހުލޫފަށް) އަނިޔާވެރިވެ، އަދި ފުލުހުން ފާޅުކަން ބޮޑުގޮތެއްގައި އެމަނިކުފާނުގެ ޢާއިލާއަށް އަނިޔާވެރިވެ ފުރައްސާރަކުރަމުންދާ ދިއުމާމެދު" އެޕާޓީން ކަންބޮޑުވާ ކަމަށެވެ. އަދި އެކަށް ކުށްވެރި ކުރާ ކަމަށްވެސް ބުނެފައިވެއެވެ.

"ދަޢުވާކުރުމަކާ ނުލައި އަޙްމަދު މަޙްލޫފުގެ ބަންދު މުއްދަތަށް ޖުމްލަ 25 ދުވަސް ކްރިމިނަލް ކޯޓުން މިހާތަނަށް ޖަހާފައިވުމަކީ އެކަމުގައި ބަހުސްކުރުމުގެ އެއްވެސް ޖާގައެއް ނެތް، އަދި ފާޅުގައި ވެފައިވާ އަނިޔާވެރިކަމެއްކަމުގައި ދެކެމެވެ. އެބާވަތުގެ މައްސަލަތަކުގައި، އަދި ދަޢުވާކުރުމަކާ ވެސް ނުލައި ހައްޔަރުގައި ބެހެއްޓުމަކީ ރާއްޖޭގެ ޤާނޫނު އަސާސީއާއި މިނިވަން ޑިމޮކްރެޓިކް މުޖުތަމަޢުތަކުގައި ކަނޑައަޅާފައިވާ މިންގަނޑުތަކާއި ހަމަތަކާ ކަނޑައެޅިގެން ޚިލާފުކަމެކެވެ." އެމްޑީޕީގެ ބަޔާނުގައި ބުނެފައިވެއެވެ.

އެބަޔާނުގައި ބުނެފައިވަނި މަހުލޫފުގެ ބަންދަކީ "ސީދާ ޣައިރު ޤާނޫނީ" ބަންދެއް ކަމަށެވެ. މުޒާހަރާއަށް ދިޔުމާއި 4 މީހުންނަށްވުރެ ގިނަ މީހުން ތިބޭ ތަނަކަށް ނުދިއުމަށް "ކޯޓުން ޝަރުތުކުރުމަކީ އަސާސީ ޙައްޤުތަކާއި ޤާނޫނީ ހަމަތަކާމެދު ޣާފިލުވެފައިވާ މިންވަރު" ހާމަވާ ކަމެއް ކަމަށްވެސް ބުނެފައިވެއެވެ.

މަހުލޫފުގެ މުއްދަތު އިތުރުކުރި އަޑުއެހުމަށް އޭނާގެ އަންހެނުން ގޮސް ކްރިމިނަލް ކޯޓު ސަރަޙައްދުގައި ހުއްޓައި "ފިރިހެން ފުލުންތަކެއް އަރައިގަނެ" އޭނާގެ ހަށިގަނޑުގެ އެކިތަންތާގައި ހިފައި، ފުރައްސާރަކޮށް، އަދި އޭނާގެ އަތް އަނބުރާލައި، އިނިގިލި ބިންދާލަން މަސައްކަތްކޮށްފައިވާ ކަމަށްވެސް އެމްޑީޕީން ބުނެފައިވެއެވެ.

" މި މުޑުދާރު ނުބައި ޢަމަލު ހިންގާފައިވަނީ މީހުންގެ ކުރިމަތީގައި ފިރިހެން ފުލުހުންތަކެއްކަން ކަންބޮޑުވުމާއެކު ފާހަގަކުރަމެވެ. މިފަދަ އަނިޔާވެރިކަމާއި ފުރައްސާރަކުރުން ޢަޙްމަދު މަޙުލޫފުގެ އިތުރުން އަނބިކަނބަލުންނަށް ވެސް ފާޅުކަން ބޮޑުގޮތެއްގައި ރައްދުކުރާކުރުމަކީ މިރާއްޖޭގައި ދެން ދިބި ރައްޔިތުންނަށް މި ސަރުކާރުން ދޭ ނުރައްކާތެރި އިންޒާރެއްކަމުގައި ދެކެމެވެ." އެބަޔާނުގައިވެއެވެ.

އެ މައްސަލަތައް ދައުލަތުގެ ކަމާބެހޭ މުވައްސަސާތަކުން އެއްވެސް އިހުމާލުވުމެއް ނެތި ވަގުތުން ބަލައި ފިޔަވަޅުއެޅުމަށް އެމް.ޑީ.ޕީން ވަނީ ގޮވާލައިފައެވެ.

އެމްޑީޕީން މިހެން ބުނެފައިވާއިރު ފުލުހުން ބުނެފައިވަނީ މަހުލުފުގެ އަންހެނުންނާމެދު ފުލުހުން އިހާނެތިކޮށް ކަމެއް ކޮށްފައި ނުވާނެ ކަމަށެވެ. އޭނާއާމެދު އަމަލު ކޮށްފައިވަނި އެވަގުތު އަމަލު ކުރަންޖެހޭ އެންމެ ޕްރޮފެޝަނަލްކޮށް ކަމަށްވެސް ފުލުހުންވަނީ ބުނެފައެވެ.