ރައްޔިތުންދެކެ ލޯބިވާ ސަރުކާރެއްކަން ޤަބޫލު ކުރެވެންދެން މިމަސައްކަތް ކުރާނަން-އަމީން

ސަރުކާރުގެ ކަންކަން ހަމަމަގަށް އަޅުވަން ކުރަމުންދާ މަސައްކަތް ހުއްޓާލާނީ ރައްޔިތުން ބޭނުންވާ ޢަދުލު އިންސާފު ރާއްޖޭގައި ގާއިމްކޮށްދީ މިވެރިކަމަކީ ރައްޔިތުންދެކެ ލޯބިވާ ވެރިކަމަކަށް ބަދަލުވެ އެކަން ޤަބޫލު ކުރެވުމުން ކަމަށް ޖުމްހޫރީޕާޓީގެ ނާއިބު ލީޑަރު އަމީން އިބްރާހީމް ވިދާޅުވެއްޖެއެވެ.

އަމީން މިހެން ވިދާޅުވީ "އަނިޔާވެރިކަމާ ދެކޮޅަށް ދިވެހިން"ގެ ނަމުގައި މިއަދު މާލޭގައި ކުރިއަށްދިޔަ ހިނގާލުމުގައި ވާހަކަދައްކަވަމުންނެވެ.

އަމީން ވިދާޅުވީ ރައްޔިތުންނަށް އަނިޔާވެރިވެ ރައްޔިތުން މަރާ ވައްޓާލާ ތަން ބަލަން ތިބެވެން ނެތް ކަމަށާ ރައްޔިތުން މިއަދު އަޑުއުފުލަމުން އެ ދަނީ އެފަދަ އަނިޔާވެރި އަމަލުތަކާ ދެކޮޅަށް ކަމަށެވެ.

އަމީން ވިދާޅުވީ މިމަސައްކަތް ހުއްޓައިލާނީ "ރާއްޖޭގައި މިކުރެވޭ ވެރިކަމަކީ ދިވެހި ރައްޔިތުން ދެކެ ލޯބިވާ ދިވެހިރާއްޖޭގައި އިންސާފު ގާއިމްކޮށްދޭ ވެރިން ކުރާ ވެރިކަން ކަމުގައި އަޅުގަނޑުމެންނަށް ގަބޫލުކުރެވުމަށް ދާންދެން މިކަން ކުރިއަށްދާން ޖެހޭ،" ކަމަށެވެ.

ރާއްޖޭގައި އަނިޔާވެރިކަން ފެތުރިގެން މިދަނީ ރޯގާއެއް ފެތުރިގެންދާ ބީދައިން ކަމަށްވެސް އަމީން ވިދާޅުވިއެވެ. އެހެން ކަމުން އެކަން ސަރުކާރުގެ ކިބައިން ހުއްޓުވުމަށް "ވާންޖެހުނު ކޮންމެ ގުރުބާނީއެއް މާލޭގައި ވެސް ރާއްޖޭގެ ހުރިހާ ރަށެއްގައިވެސް ކުދި ބޮޑު އެންމެން ރާއްޖޭގެ ހުރިހާ ރައްޔިތުން ނިކުމެގެން ވާންޖެހޭނެ،" ކަމަށް ވިދާޅުވިއެވެ.

އޭނާ ވިދާޅުވީ ޒުވާނުން ކަތިލައި، އެތައް ބަޔަކަށް އަނިޔާވެރިވަމުންދާއިރު ބަލަން ނުތިބެވޭނެ ކަމަށެވެ.

މިސަރުކާރުންވަނީ ކުރީގެ ރައީސް މުޙައްމަދު ނަޝީދާއި، ކާނަލް ނާޒިމް ނުޙައްގުން ޖަލަށްލާފައި ކަމަށް އަމީން ވިދާޅުވިއެވެ. އަދި ރާއްޖޭގެ ބައެއް ވިޔަފާރިވެރިންނަށް ދަތިކޮށް އަނިޔާވެރިވަމުންދާ ކަމަށްވެސް ވިދާޅުވިއެވެ. އަދި ސަރުކާރު ހިންގަން ތަފާތު ނަންނަމުގައި ރައްޔިތުްގެ އަތުން ޓެކްސް ނެގުމަކީވެސް ކުޑައަނިޔާއެއް ނޫން ކަމަށް އޭނާ ވިދާޅުވިއެވެ. އެހެން ކަމުން ސަރުކާރުގެ އެފަދަ ޢަމަލު ހުއްޓުވުމަށް އެންމެ ބައިވެރިވުމަށް އަމީން ގޮވައިލެއްވިއެވެ.