ޕާޓީތަކުގެ މެންބަރަކަށް ނުވެވޭ އިސްލާޙު ޤާނޫނު އަސާސީއާ ޚިލާފު ކަމަށްވަނީ ލަފާ ދެއްވާފައި- ޢަލީ ވަޙީދު

މީހަކު ޖަލުގައި ބަންދުކޮށްފައި ހުންނަ މުއްދަތުގައި ސިޔާސީ ޕާޓީތަކާއި، ޖަމިއްޔާތަކުގެ އެއްވެސް މަގާމެއްގައިވެސް އާންމު މެންބަރަކަށްވެސް ނުުހުރެވޭނެ ގޮތަށް މާރޗު 30 ވަނަ ދުވަހު ރައްޔިތުންގެ މަޖިލީހުން ޖަލުތަކާއި، ޕެރޯލްގޭ ޤާނޫނަށް ގެނައި އިސްލާޙަކީ ޤާނޫނު ޢަސާސީއާ ތައާރަޒުވާ އިސްލާޙެއް ކަމަށް ދައުލަތުގެ ބަންޑާނައިބް މުޙައްމަދު އަނިލް ލަފާ ދެއްވާފައިވާ ކަމަށް އެމްޑީޕީގެ ޗެއާޕާސަން ޢަލީ ވަޙީދު މިރޭ ވިދާޅުވެއްޖެއެވެ.

މާރޗުމަހުގެ 18 ވަނަ ދުވަހު އެއިސްލާހު ކޮމިޓީއަށް ހުށަހެޅުމުން އެ އިސްލާޙު ފާސް ކުރުމުގެ ކުރިން އެއީ ނުކުރެވޭނެ ކަމެއް ކަމަށް ލަފާ ދެއްވައި ބަންޑާރަ ނާއިބު އެކޮމިޓީއަށް ސިޓީއެއް ފޮނުއްވިކަމަށް ޢަލީ ވަޙީދު ވިދާޅުވިއެވެ.

ޤައުމީ ސަލާމަތުގެ ކޮމިޓީގައި އެ އިސްލާޙު ދިރާސާކުރަމުން ދިޔަ މަރުހަލާގައޮ ބަންޑާރަނާއިބު ވަނީ އެ އިސްލާހު އުނިކުރުމަށް އެދިވަޑައިގެންފައި ކަމަށްވެސް ޢަލީ ވިދާޅުވިއެވެ.

ބަންޑާރަ ނާއިބު އެކޮމިޓީއަށް ފޮނުވިކަމަށް ޢަލީ ވަޙީދު ވިދާޅުވި ސިޓީ އޭނާ ވަނީ މިރޭ ބޭއްވި "އަނިޔާވެރިކަމާ ދެކޮޅަށް ދިވެހިންގެ" ގެ ޖަލްސާގައި އިއްވާފައެވެ.

"މިބިލްގައި ބުނެވި ދިޔަ މާއްދާ އިބާރާތްކުރެވިފައިވާ ގޮތުން ސިޔާސީ ޕާޓީއާއި ޖަމިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތްވުމުގެ ޙައްގު ޙުކުމެއް ވެސް ތަންފީޒުކުރަމުން ނުދާ މީހުންވެސް ހިމެނޭ ގޮތަށް ޖަލުގައި ބަންދުކުރެވިފައިވާ އެއްވެސް ފަރާތަކަށް ލިބިގެން ނުވާ ކަމަށް މާނާކުރުމުގެ ފުރުސަތު އޮތް ކަން ފާހަގަކުރަމެވެ. އަދި ބިލްގެ 32 ވަނަ މާއްދާ އިން ދިވެހިރާއްޖޭގެ ޖަލުތަކާއި ޕެރޯލްގެ ޤާނޫނުގެ ހަވަނަ ބާބުގެ ގޮތުގައި އިތުރުކުރުމަށް ހުށަހަޅާފައިވާ ބާބުގެ މަގުސަދަކީ ޤާނޫނު އަސާސީގެ 16 ވަނަ މާއްދާއާއި 57 ވަނަ މާއްދާއަށް ރިއާޔަތްކޮށް ޤާނޫނު އަސާސީގެ ދެވަނަ ބާބުގައިވާ ޙައްގުތަކާއި މިނިވަންކަން ހިފެހެއްޓުމަށް ކޮންމެހެން ބޭނުންވާ މިންވަރަށް ޤާނޫނުގައި ބަޔާންކުރުމެވެ. އެހެންނަމަވެސް ބިލްގެ މިމާއްދާ ޢިބާރާތްކުރެވިފައިވާ ގޮތުން ޤާނޫނު ޢަސާސީގެ 30 ވަނަ މާއްދާއިން ލިބިދޭ ޙައްގުތަކާއި މިނިވަންކަން ހިފެހެއްޓުމަށް ކޮންމެހެން ބޭނުންވާ މިންވަރަށް ވުރެ ބޮޑަށް އަދި މިނިވަން ދިމިގްރާތީ މުޖުތަމައެއްގައި އެޙައްގު ހިފެހެއްޓިދާނެ ކަމަށް ޤަބޫލުކުރެވޭ މިންވަރަށް ވުރެ ބޮޑަށް އެޙައްގުތައް ހިފެހެއްޓިފައިވާ ކަމަށް ފާހަަގަކުރެވިފައިވާތީ ބިލްގެ އެ މާއްދާ އުނިކުރުމަށް މި ހުށަހަޅަނީ އެ މާއްދާ ޤާނޫނު އަސާސީއާ ތަޢާރުޒު ވާތީ އެވެ،" ޢަލީ ވަޙީދު މިރޭ އިއްވި ސިޓީގައިވެއެވެ.

އެސިޓީ ޤައުމީ ސަލާމަތުގެ ކޮމިޓީއަށް ލިބިފައިވަނީ މާރޗުމަހުގެ 19 ވަނަ ދުވަހު ކަމަށްވެސް ޢަލީ ވިދާޅުވިއެވެ. އެ ސިޓީ ފެނިފައިވަނީ މަޖިލީހުގެ ރައީސް ޢަބްދުﷲ މަސީޙަށާއި މަޖިލީހުގެ ކައުންސެލް ޖެނަރަލް ފާތިމަތު ފިލްޒާއަށާއި ޤައުމީ ސަލާމަތުގެ ކޮމިޓީގެ މުޤއްރިރު އަދި ޕީޕީއެމްގެ ގުރައިދޫ ދާއިރާގެ މެންބަރު އިބްރާހީމް ރިޒާއަށް އެކަނި ކަމަށެވެ.

"ޤައުމީ ސަލާމަތުގެ ކޮމިޓީގެ އެއްވެސް މަޖިލިސް މެންބަރަކަށް ވެސް މިސިޓީ ފެނިފައެއް ނޯންނާނެ. ޤައުމީ ސަލާމަތުގެ ކޮމިޓީގެ ޔައުމިއްޔާވެސް އަޑުއަހައިފިން. އެއަކުވެސް މިއެއް ނެތް. މިސިޓީ ގެއްލުވާލުމަށްފަހު ކަންކަން ކުރީ،" ޢަލީ ވިދާޅުވިއެވެ.

މިއިސްލާޙު ފާސްކުރުމުން އެމްޑީޕީގެ ރައީސް މުޙައްމަދު ނަޝީދަށް އެޕާޓީގެ މެންބަރު ކަމާއި، ޕާޓީގެ ރައީސްކަން ގެއްލޭނެއެވެ. ނަމަވެސް އެމްޑީޕީން ބުނެފައިވަނީ އެއިސްލާޙަކީ އެޕާޓީން ޤަބޫލުކުރާ އިސްލާޙެއް ނޫންކަމަށެވެ.