ޝާހީން މިއާގެ މަރާ ގުޅިގެން ދެ މީހަކު ހައްޔަރުކޮށްފި

ބަނގްލަދޭޝްގެ ރައްޔިތެއް ކަމަށްވާ ޝާހީން މިއާ ގެ މަރުގެ މައްސަލައާ ގުޅިގެން ދެ މީހަކު ހައްޔަރުކޮށްފި ކަމަށް ފުލުހުން ހާމަކޮށްފިއެވެ.

މި މައްސަލައާ ގުޅިގެން ފުރަތަމަ މީހާ ހައްޔަރުކޮށްފައިވަނީ މިއަދު ހަވީރު އެވެ. އޭނާ އަކީ ޢުމުރުން 21 އަހަރުގެ ދިވެއްސެއް ކަމަށް ފުލުހުން ބުނެފައިވެއެވެ. ދެވަނަ މީހާ ހައްޔަރު ކޮށްފައިވަނީ މިރޭ 9:30 އެހައިކަންހާއިރު ކަމަށް ފުލުހުން ބުނެފައިވެއެވެ. ޢުމުރުން 24 އަހަރުގެ އެމީހާ ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.

ޢުމުރުން 29 އަހަރުގެ ޝާހީން މިއާ މަރުވެފައިވަނީ، މިމަހުގެ 22 ވަނަ ދުވަހުގެރޭ ފަތިހު 4:00 އެހައިކަންހާއިރު އެވެ. އޭނާ މަރާލާފައިވަނީ މޫނު ނިވާކޮށްގެން ތިބި ބަޔަކު އޭނާ މަސައްކަތް ކުރާ ކެފޭ ތެރެއަށް ވަދެ ތޫނު އެއްޗަކުން ހަމަލާ ދީގެންނެވެ.

މި މައްސަލަ ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ދަނީ ތަޙުޤީޤު ކުރަމުން ކަމަށްވެސް ފުލުހުންވަނީ ބުނެފައެވެ.