ފާސްކުރާ ޤާނޫނަކުން އެމްޑީޕީ ރައީސްގެ މަޤާމެއް ނަޝީދުގެ ކިބައިން ނިގުޅައި ނުގަނެވޭނެ- ޝިފާޒު

ރައްޔިތުންގެ މަޖިލީހުގެ އަޣުލަބިއްޔަތު ސަރުކާރުގައި އޮވެފައި މަޖިލީހުން ފާސްކުރާ ޤާނޫނަކުން އެމްޑީޕީގެ ރައީސްގެ މަޤާމެއް އެޕާޓީގެ މިހާރުގެ ރައީސް މުޙައްމަދު ނަޝީދުގެ ކިބައިން ނިގުޅައި ނުގަނެވޭނެ ކަމަށް އެޕާޓީގެ ނާއިބު ރައީސް މުޙައްމަދު ޝިފާޒު ވިދާޅުވެއްޖެއެވެ.

ޝިފާޒު ވިދާޅުވީ އެމްޑީޕީގެ ރައީސްގެ މަޤާމަށް މީހަކު ހޮވުމާއި ހޮވާނެ މީހަކު އެނގޭނީ އެޕާޓީގެ މެންބަރުންނަށް ކަމަށެވެ. ޝިފާޒު މިހެން ވިދާޅުވީ ޖަލުގައި ހުކުމް ތަންފީޒު ކުރަމުންދާ ގައިދީންނަށް ސިޔާސީ ޕާޓީގެ މެމްބަރު ކަމާއި، އެހެން މަޤާމެއްގައިވެސް ނުހުރެވޭ ގޮތަށް، ޖަލުތަކާއި ޕެރޯލްގެ ޤާނޫނަށް ހުށަހެޅި އިސްލާޙު ރައްޔިތުންގެ މަޖިލީހުން މިއަދު ފާސްކުރުމުން އެއަށް ރައްދު ދެއްވަމުންނެވެ.

ޖަލުތަކާއި ޕެރޯލްގެ ޤާނޫނަށް މިގެނައި އިސްލާޙު ފާސްކޮށް އެބިލް ރައީސް ޢަބްދުﷲ ޔާމީން ތަސްދީޤު ކުރެއްވުމުން، ޓެރަރިޒަމްގެ ކުށުގެ ޙުކުމެއް ޖަލުގައި މިހާރު ތަންފީޒު ކުރަމުންދާ އެމްޑީޕީގެ ރައީސް ނަޝީދު އެ މަގާމުންވަކިވާނެއެވެ. އަދި ޕާޓީގެ މެންބަރު ކަމުންވެސް ވަކިވާނެއެވެ.

ޝިފާޒު ވިދާޅުވީ މިއަދުގެ ގެނައި އިސްލާޙަކީ އެމްޑީޕީން އެއްގޮތަކަށްވެސް ބަލައި ގަންނާނެ ކަމެއް ނޫންކަމަށެވެ. ޕާޓީތަކާ ބެހޭ ޤާނޫނެއް އޮންނަ އިރު ޖަލުތަކާއި، ޕެރޯލްގެ ޤާނޫނަށް އިސްލާޙު ގެނެސްގެން ރައީސް ނަޝީދުގެ މަޤާމް ގެއްލުވާލުމަކީ އެމްޑީޕީން އެއްގޮތަކަށްވެސް ރުހޭނެ ކަމެއް ނޫންކަމަށްވެސް ވިދާޅުވިއެވެ.

"އެ އިސްލާޙު އަޅުގަނޑުމެން ބަަލައި ނުގަންނަން. އެމްޑީޕީގެ ރައީސަކީވެސް އަދި ރިޔާސީ ކެންޑިޑޭޓަކީވެސް ރައީސް ނަޝީދު" ޝިފާޒު ވިދާޅުވިއެވެ. އެމަޤާމުގައި ރައީސް ނަޝީދު ބެހެއްޓުމުގެ ފުރިހަމަ އިޚްތިޔާރު ލިބިފައިވަނީ އެމްޑީޕީއަށް ކަމަށް އޭނާ ވިދާޅުވިއެވެ.އެޕާޓީގައިވެސް ހިންގާ ޤަވާޢިދެއް އޮންނަ ކަމަށާއި ޕާޓީ ހިނގާނީ އޭގެ ދަށުން ކަމަށްވެސް ވިދާޅުވިއެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ޗެއާޕާސަން ޢަލީ ވަޙީދުވެސް ވިދާޅުވީ ނަޝީދު އެ ޕާޓީގެ ލީޑަރުގެ ގޮތުގައި ބެހެއްޓުމުގެ ހުރިހާ އިޚްތިޔާރެއް ލިބިފައިވަނީ އެމްޑީޕީއަށް ކަމަށެވެ.

ޢަލީ ވަޙީދު ވިދާޅުވީ ސަރުކާރަށް މަޖިލީހުގެ އަޣުލަބިއްޔަތު އޮވެގެން މިފަދަ ބިލްތައް ފާސްކުރަމުންދާ ކަމަށްވާނަމަ އެމްޑީޕީވެސް އުވާލާނެ ކަމަށެވެ. އެހެން ނަމަވެސް އެމްޑީޕީއަކީ "ފިކުރެއް" ކަމަށްވުމުން އެފަދަ ބިލަކުން ޕާޓީ އުވައި ނުލެވޭނެ ކަމަށެވެ.