ކްރިމިނަލް ކޯޓްގެ 4 ފަނޑިޔާރުންގެ މައްޗަށް އަބުރުގެ ދަޢުވާ ކުރައްވަން ރައީސް ނަޝީދު ނިންމަވައިފި

ކްރިމިނަލް ކޯޓްގެ 4 ފަނޑިޔާރުންގެ މައްޗަށް އަބުރުގެ ދަޢުވާ ކުރައްވަން ރާއްޖޭގެ ކުރީގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ނިންމަވައިފިއެވެ.

އެމަނިކުފާނު ދަޢުވާ ކުރައްވަން ނިންމަވާފައިވަނީ އެކޯޓުގެ އިސްފަނޑިޔާރާއި، އެމަނިކުފާނުގެ މައްސަލަ ބެއްލެވި ތިން ފަނޑިޔާރުންނާ ދެކޮޅަށެވެ.

ފަނޑިޔާރުންނާ ދެކޮޅަށް އަބުރުގެ ދަޢުވާ މަދަނީ ކޯޓުގައި ކުރައްވަން އެމަނިކުފާނު ނިންމަވާފައިވަނީ މިއަހަރުގެ މާރޗު 13 ވަނަ ދުވަހު އެމަނިކުފާނުގެ މައްޗަށް ކުރި ޙުކުމަށްފަހު ތަފްސީލް ރިޕޯޓުގައި އެމަނިކުފާނު ސޮއިކުރައްވާން އިންކާރު ކުރައްވާ ކަމަށް ބުނެ ކްރިމިނަލް ކޯޓުން ބުނެ ބަޔާން ނެރެފައިވުމުންނެވެ. ރައީސް ނަޝީދުވަނީ އެއީ ކްރިމިނަލް ކޯޓުން ޙާޤީޤަތާއި ޚިލާފަށް ދައްކާފައިވާ ވާހަކައެއް ކަމަށް ވިދާޅުވެފައެވެ.

"މި މައްސަލައިގެ ފުރަތަމަ ދުވަހުގެ ޝަރިއްޔަތުގެ އަޑުއެހުމަށްފަހުގައި، ރައީސް މުޙައްމަދު ނަޝީދު އެދުވަހު ކޯޓްގައި ދެއްކެވި ވާހަކަފުޅުތައް ކަމަށް ބުނެ އުފައްދާފައިވާ ލިޔުމެއް ރައީސް މުޙައްމަދު ނަޝީދުއަށް ދެއްކެވިއެވެ. އެދުވަހު ރައީސް މުޙައްމަދު ނަޝީދު ވިދާޅުވީ، އެލިޔުމަކީ އެމަނިކުފާނު އެދުވަހު ކޯޓްގައި ދެއްކެވި ވާހަކަތަށް ބަޔާންކުރާ ލިޔުމެއް ނޫންކަމަށެވެ."

އެމަނިކުފާނު ކޯޓުގައި ދެއްކެވި ވާހަކަތަށް ހިމަނާ، އެލިޔުން އިޞްލާޙްކޮށްދެއްވުމަށް، ރައީސް ނަޝީދު އެދިވަޑައިގެންނެވިއެވެ. ނަމަވެސް އަދިވެސް ކްރިމިނަލް ކޯޓުން އެކަން ކޮށްދެއްވާފައެއް ނުވާކަމަށް ރައީސް ނަޝީދުގެ ފަރާތްޕުޅުން ބުނެފައިވެއެވެ.

ކްރިމިނަލްކޯޓުން ވަނީ މިމަހުގެ 26 ވަނަދުވަހުގެރޭ، ރައީސް މުޙައްމަދު ނަޝީދު އެކޯޓްގެ ބަޔާންތަކުގައި ސޮއި ކުރައްވައިފިކަމަށް ބުނެފައެވެ. ނަމަވެސް އެ އެކަންވެސް އެ ނަޝީދުގެ ފަރާތްޕުޅުންވަނީ ދޮގު ކުރައްވާފައެވެ.

"26 މާރޗް 2015 ވީ ބުރާސްފަތި ދުވަހުގެރޭ ކްރިމިނަލް ކޯޓް އިން އަނެއްކާވެސް ހައްދަވާފައިއެވަނީ ކަނޑައެޅިގެން އިތުރުފުޅެވެ. "

ރައީސް ނަޝީދުގެ ބަޔާންތަކުގައި ސޮއިކުރުވުމަށް ކްރިމިނަލް ކޯޓުން މަސައްކަތް ކޮށްފައިވަނީ ދެފަހަރުއެވެ. ނަމަވެސް ބަޔާން އިސްލާހު ނުކުރައްވާތީ ނަޝީދު ސޮއި ނުކުރައްވައެވެ.

"ވީމާ، ކްރިމިނަލް ކޯޓް ގެ އިސް ޤާޟީ ޢަބްދުﷲ މުޙައްމަދު އާއި ރައީސް މުޙައްމަދު ނަޝީދުގެ މައްސަލަ ބެއްލެވި 3 ފަނޑިޔާރުންގެ މައްސަލަ، އަބުރުގެ ދަޢުވާއެއްގެ ގޮތުގައި ބައްލަވާ ދެއްވުމަށް އެދި މަދަނީ ކޯޓަށް މައްސަލަ ހުށަހެޅުމަށް ރައީސް ނަޝީދު ނިންމަވައިފިއެވެ."