ވަކިވަކި ފުލުހުންގެ ފޮޓޯތަކާއެކު އިންޒާރުދޭ މީހުން ގާނޫނުގެ ކުރިމައްޗަށް ގެންނާނަން-ފުލުހުން

ފުލުހުންނަށް ބިރު ދެއްކުމުގެ މަޤްޞަދުގައި ވަކިވަކި ފުލުހުންގެ ފޮޓޯ ޖަހައި އެފަދަ ފޮޓޯތަކުގައި އިންޒާރުގެ ބަސްތައްލިޔެ ސޯޝަލް މީޑިއާ މެދުވެރިކޮށް ފަތުރަމުން ގެންދިއުމަކީ އެއްވެސް ހާލެއްގައި މޯލްޑިވްސް ޕޮލިސް ސަރވިސް އިން ބަލައިގަންނާނޭ ކަމެއް ނޫން ކަމަށާއި އެފަދަ ފަރާތްތަކާމެދު ޤާނޫނީ ފިޔަވަޅު އަޅާނެ ކަމަށް ފުލުހުން ބުނެފިއެވެ.

ފުލުހުން ނެރެފައިވާ ނޫސްބަޔާނެއްގައި ބުނެފައިވަނީ ޤާނޫނީ މަސްއޫލިއްޔަތާއި ވާޖިބު އަދާކުރުމުގެގޮތުން ޤާނޫނީ ހަމަތަކުގެމަތިން ފުލުހުން ކުރަމުންދާ މަސައްކަތްތަކާ ގުޅޭގޮތުން ރައްޔިތުންގެ ހިތްތަކުގައި ފުލުހުންނާމެދު ނަފްރަތު އުފެއްދުމުގެ ގޮތުން ސޯޝަލް މީޑިއާގައި ވާހަކަ ފަތުރަމުންދާ ކަމަށެވެ.

"އެހެން ކަމުން ސޯޝަލް މީޑިއާގައި ހަރަކާތްތެރިވާ ފަރާތްތައް މިހާރަށްވުރެ ބޮޑަށް ޒިންމާދާރުވެ ފުލުހުންނަށް އަދި އެއްވެސް ބަޔަކަށް ބިރުދެއްކުމުގެގޮތުން އެއްވެސް ޢަމަލެއް ނުހިންގުމަށް އިލްތިމާސްކުރަމެވެ." ފުލުހުންގެ ބަޔާނުގައިވެއެވެ.

މުޖުތަމަޢުގެ އަމަން އަމާންކަމާ ރައްކާތެރިކަން ޤާއިމް ކުރުމަށްޓަކައި ކުރަންޖެހޭ ހުރިހައި މަސައްކަތްތައް ކުރުމާއި ޖިނާޢީ ކުށްތައް ތަޙްޤީޤްކޮށް ޝަރީޢަތަށް ހުށަހެޅުމަށް ބޭނުންވާ ތައްޔާރީތައް ކުރުމަކީ ޤާނޫނު އަސާސީގެ 244 ވަނަ މާއްދާގައި ފުލުހުންގެ ޚިދުމަތުގެ މައިގަނޑު މަޤްޞަދު ކަމަށްވެސް އެބަޔާނުގައި ބުނެފައިވެއެވެ.

"ދިވެހިރާއްޖޭގެ ދާޚިލީ ސަލާމަތާ މުޖުތަމަޢުގެ ޢާއްމު މަޞްލަޙަތު ރައްކާތެރިކޮށް ދެމެހެއްޓުމަށް ކުރަންޖެހޭ އެންމެހައި މަސައްކަތްކުރުމާއި، ޤާނޫނާއި ޤަވާއިދާ ޚިލާފަށް ހިންގާ ޢަމަލްތައް ހޯދައި ދެނެގަނެ، ދިވެހިރާއްޖޭގެ ރައްޔިތުންނަށާއި އިޤްތިޞާދަށް ނުރައްކަލެއް ލިބިދާނެފަދަ ޖިނާޢީ ޢަމަލުކުރާ ފަރާތްތައް ހޯދައި އެފަދަ މައްސަލަތައް ތަޙްޤީޤުކޮށް ޝަރީޢަތަށް ހުށަހެޅުމަކީ ފުލުހުންނަށް ޤާނޫނީ ގޮތުން މަތިކޮށްފައިވާ ޒިންމާ" އެއް ކަމަށްވެސް ބުނެފައިވެއެވެ.

ޝަރުޢީ އަދި ޤާނޫނީ ބާރުލިބިގެން ކުރާ އަމުރުތައް ތަންފީޒު ކުރުމުގައި ފުލުހުން އަދާކުރަންޖެހޭ ދައުރު އަދާކުރުމަކީ ފުލުހުންގެ ޤާނޫނުގައި ފުލުހުންގެ މަސްޢޫލިއްޔަތުގެ ތެރޭގައި ހިމެނޭ ކަންކަން ކަމަށްވެސް ބުނެފައިވެއެވެ.

ޤާނޫނާއި ޚިލާފް ނުވާގޮތުގެމަތިން މީހުން ހުއްޓުވައި ސުވާލުކޮށް، ބަލައި ފާސްކޮށް، ކުށުގެ ތުހުމަތުގައި މީހުން ހިފައި ހައްޔަރުކުރުމާއި ތަންތަންބަލާ ފާސްކުރުމަކީ ފުލުހުންގެ ޤާނޫނުން އެމީހުންނަށް ިލިބިފައިވާ ބާރެއް ކަމަށްވެސް ބުނެފައިވެއެވެ. އެހެން ކަމުން ފުލުހުން ބަދުނާމުކޮށް ރައްޔިތުންގެ އިތުބާރު ގެއްލޭ ފަދަ ކަންކަން ނުކުރުމަށް އެބަޔާނުގައި ގޮވާލާފައިވެއެވެ.