ކުރީގެ ޑިފެންސް މިނިސްޓަރ ނާޒިމް 11 އަހަރަށް ޖަލަށް ލުމަށް ޙުކުމް ކޮށްފި
27 މާރޗް 2015 0:37
ކުރީގެ ޑިފެންސް މިނިސްޓަރ ރިޓަރޔަރޑް ކާނަލް މުޙައްމަދު ނާޒިމްގެ މައްޗަށް ދައުލަތުން ކޮށްފައިވާ ނުރައްކާތެރި ހަތިޔާރު އެތެރެ ކުރުމާއި ގެންގުޅުމުގެ ދަޢުވާ ސާބިތުވެ 11 އަހަރަށް ނާޒިމް ޖަލަށް ލުމަށް ކްރިމިނަލް ކޯޓުން ޙުކުމް ކޮށްފިއެވެ.
ކްރިމިނަލް ކޯޓުގެ ފަނޑިޔާރުން މިރޭ ނާޒިމްގެ މައްޗަށް އިއްވި ޙުކުމުގައި ބުނެފައި ވަނީ އޭނާ ދިރިއުޅުއްވާ ގ. އެނިފްގެ އެޕާޓްމަންޓުން ފެނުނު ކަމަށް ފުލުހުން ބުނާ ފިސްތޯލައާއި ތިން ވަޒަނާއި ޕެންޑްރައިވަކީ ނާޒިމް ދިރިއުޅުއްވާ ކޮޓަރީން ފެނުނު ތަކެތި ކަމަށެވެ. އެކަން ސާބިތުކުރުމަށް ތިން މީހަކު ހެކި ބަސް ދީފައިވާ ކަމަށްވެސް ބުނެފައިވެއެވެ.
ދައުލަތުން ކްރިމިނަލް ކޯޓުގައި އުފުލި ދަޢުވާގައި ބުނެފައިވަނީ ނާޒިމްގެ އެޕާޓްމަންޓުން ފެނުނު ކަމަށް ބުނާ ފިސްތޯލައަކާއި ތިން ވަޒަނާއި އަދި އެ ތަކެތި ލާފައި އޮތް ދަބަސް ފުލުހުންގެ އިދާރާއަށް ގެންދިޔަ ކަމަށެވެ. އެތަނަށް ގެންގޮސްގެން އިތުރަށް ބެލިބެލުމުން އެދަބަސްތެރެއިން ޕެން ޑްރައިވެއް ފެނިފައިވާ ކަމަށެވެ. މުޅި ދަޢުވާ ބިނާކޮށްފައިވަނީ އެކަންކަމުގެ މައްޗަށެވެ.
އެޕެންޑްރައިވްގައިވަނީ ދައުލަތުގެ އިސް ތިންބޭފުޅަކު އަވަހާރަށް ކޮށްލަން ރާވާފައިވާ ކަމުގެ މައުލޫމާތު ކަމަށް ދައުލަތުގެ ވަކީލުންވަނީ ބުނެފައިވެއެވެ. އެ ކަމަށް ވިލާކުންފުނީގެ އިތުރަށް އެސްޓީއޯއިމް ޚަރަދު ކުރުމަށް ނިންމާފައިވާ ކަމަށް ދައުލަތުން ބުނެފައިވެއެވެ. އެދުވަސްވަރު އެސްޓީއޯގެ އެމްޑީއަކަށް ހުންނެވީ ނާޒިމްގެ ކޮއްކޮ އާދަމް އާޒިމެވެ.
ނާޒިމްގެ ވަކީލު މައުމޫން ހަމީދު ވިދާޅުވީ ނާޒިމަށް ކުރި ހުކުމާ މެދު ކަންބޮޑުވުންތަކެއް އެބަހުރި ކަމަށެވެ. އެއީ ނާޒިމްގެ ދިފާއުގައި ފާހަގަކޮށްފައިވާ ގާނޫނީ ނުކުތާތަކަށް ހުކުމުގައި ރިއާޔަތްކޮށްފައިވާ ކަމެއް އަދި އެނގިވަޑައިގެންފައި ނުވާ ކަމަށެވެ. ތަފްސީލް ރިޕޯޓު ލިބުމުން އެއަށް ބެލުމަށްފަހު މައްސަލަ އިސްތިއުނާފް ކުރާނެ ކަމަށްވެސް މައުމޫން ވިދާޅުވިއެވެ.
ޙުކުމަށްފަހު ކޯޓުން ނިކުމެ ވަޑައިގެން ނާޒިމް ޢާއިލާގެ ބޭފުޅުންނަށް ވިދާޅުވެފައިވަނީ ހިތްވަރު ކުރުމަށެވެ. އަދި އިންސާފު ލިބޭނެ ދުވަހެއް އަންނާނެ ކަމަށެވެ.
ކިޔުންތެރިންގެ ހިޔާލު