އޭޕީއާއި އެމްޑީޕީ ބޮޑު ޢަދަދަކުން ޖުރިމަނާ ކޮށްފި
26 މާރޗް 2015 23:40
އަދާލަތު ޕާޓީ (އޭޕީ) އާއި މޯލްޑިވިއަން ޑިމޮކްރަޓިކްޕާޓީ (އެމްޑީޕީ) ބޮޑު ޢަދަދަކުން ޖުރިމަނާ ކޮށްފިއެވެ.
އިލެކްޝަންސް ކޮމިޝަނުން މިރޭ ނެރެފައިވާ ބަޔާނެއްގައި ބުނެފައިވަނީ އެމްޑީޕީ ޖޫރިމަނާކޮށްފައި ވަނީ، ސާޅީސް ހަތްހާސް ރުފިޔާއިންނެވެ. އޭޕީ ޖުރިމަނާ ކޮށްފައިވަނީ ތިރީސް ތިންހާސް ރުފިޔާއިން ކަމަށެވެ.
އިލެކްޝަންސް ކޮމިޝަނުން އެދެޕާޓީ ޖުރިމާނާ ކުރީ އެދެޕާޓީ އިސްވެއޮވެ މާލޭގައި މިހާރު ކުރަމުންދާ މުޒާހަރާތަކުގައި އާއްމުންގެ މުދަލަށް ގެއްލުން ދީ، ފުލުހުންނަށް އަނިޔާ ކުރުމަށް ގޮވާލަމުންދާ ކަމަށް ބުނެއެވެ.
އެދެޕާޓީ ޖޫރިމަނާކުރީ ސިޔާސީ ޕާޓީތަކުގެ ގާނޫނުގެ ހަތްވަނަ މާއްދާއާ ހިލާފުވެފައިވާތީ އެ ގާނޫނުގެ 48 ވަނަ މާއްދާގެ ދަށުން ކަމަށް އިލެކްޝަންސް ކޮމިޝަނުންވަނީ ބުނެފައެވެެ. އެފައިސާ ދެއްކުމަށް ހަތްދުވަހުގެ މުއްދަތެއް އިލެކްޝަންސް ކޮމިޝަނުންވަނީ އެދެޕާޓީއަށް ދީފައެވެ.
މުޒާހަރާތަކުގައި އެފަދަ އަމަލު ތަކުރާރުކޮށް ހިންގާ ކަމަށްވާނަމަ ކުރިއަށްއޮތްތާގައިވެސް "އިތުރު ފިޔަވަޅު އަޅަން ޖެހިދާނެ،" ކަމަށް އެބަޔަނުގައި ބުނެފައިވެއެވެ.
އަނިޔާއާ ދެކޮޅަށް ކުރާ މުޒާހަރާއެއް ކަމަށްބުނެ ކޮންމެ ރެއަކު މާލޭގެ މަގުތަކުގައި އަދާލަތު ޕާޓީއާއި އެމްްޑީޕީން ގެންދަނީ މުޒާހަރާ ކުރަމުންނެވެ. ރޭގެ މުޒާހަރާގައިވެސް 9 މީހުން ހައްޔަރު ކުރުމަށްފަހު އެކަކުވަނީ ދޫކޮށްލާފައެވެ.
ފަހަކަށް އައިސް ބާއްވާ މުޒާހަރާތައް ރޫޅާލަން ކުރާ މަސައްކަތުގައިވަނީ ހަމަނުޖެހުންތައް ހިނގާފައެވެ. ހަމަ ނުޖެހުންތަކުގައި ފުލުހުންނާއި އާންމުންނަށްވެސް އަނިޔާވެއެވެ. މުޒާހަރާގެ ބައިވެރިން ބުނަމުންދަނީ އެމީހުން ކުރަނީ ސުލްހަވެރި މުޒާހަރާ ކަމަށެވެ. ނަމަވެސް ފުލުހުން ބުނެފައިވަނީ މިހާރުކުރަނީ ސުލްހަވެރި މުޒާހަރާއެއް ނޫން ކަމަށެވެ.
ކިޔުންތެރިންގެ ހިޔާލު