ބިދޭސީންނަށް ހަމަލާދިނުން އިތުރުވުމަކީ ކަންބޮޑުވާ ކަމެއް-އެޗްއާރުސީއެމް

މިދިޔަ ހަފްތާގެ ތެރޭގައި އަނިޔާވެރި ހަމަލާތަކެއްގެ ސަބަބުން ދިވެއްސަކާއި ދެ ބިދޭސީއެއްގެ ފުރާނަ ގެއްލިފައިވާތީ އިންސާނީ ހައްގުތަކާބެހޭ ރާއްޖޭގެ ކޮމިޝަނުން ކަންބޮޑުވުން ފާޅުކޮށްފިއެވެ.

ހިޔުމަންރައިޓްސް ކޮމިޝަން އޮފްދަ މޯލްޑިވްސް (އެޗުއާރުސީއެމް) އިން ނެރެފައިވާ ނޫސްބަޔާނެއްގައި ބުނެފައިވަނީ އެކަން ކުށްވެރި ކުރައްވާ ކަމަށާއި، "ބިދޭސީންނަށް ހަމާލާދިނުމުގެ ހާދިސާތައް މިހަފްތާ ތެރޭގައި އިތުރުވެފައިވާކަމީ މި ކޮމިޝަނުން ނުހަނު ކަންބޮޑުވާކަމެއް" ކަމަށެވެ.

އެބަޔާނުގައި ބުނެފައިވަނީ ދިރިހުރުމުގެ ހައްޤާއި، ތިމާގެ ހަށިގަނޑާއި ނަފްސު ރައްކާތެރިކުރުމުގެ ހައްޤަކީ ރާއްޖޭގެ ޤާނޫނު އަސާސީގެ 21 ވަނަ މާއްދާއާއި އިންސާނީ ހައްޤުތަކުގެ އާންމު ޤަރާރުގެ 3 ވަނަ މާއްދާގެ ދަށުން ހަމަ ކޮންމެ މީހަކަށްމެ ލިބިގެންވާ ހައްޤެއް ކަމަށެވެ. މި ހައްޤަކީ ދިވެހި ކޮންމެ ރައްޔިތަކަށާއި ރާއްޖޭގައި ދިރިއުޅޭ ކޮންމެ މީހަކަށް އެއްވެސް ތަފާތު ކުރުމެއް ނެތި ކަށަވަރު ކޮށްދޭންޖެހޭ ހައްޤެއް ކަމަށްވެސް ބުނެފައިވެއެވެ.

"ދިވެހި ރައްޔިތުންނާއި ރާއްޖޭގައި ދިރިއުޅޭ އެންމެންނަށް ރައްކާތެރިކަން ޤާއިމް ކޮށްދިނުމަކީ ދައުލަތުގެ ޒިންމާއެއްކަމަށް ވީހިނދު އެ ރައްކާތެރިކަން ކަށަވަރުކުރުމަށް ދައުލަތުން މަސައްކަތް ތަކެއް ކުރަންޖެހެއެވެ. އެގޮތުން އަމަން އަމާން ކަން ޤާއިމް ކޮށް މުޖްތަމައުގެ ސަލާމަތާއި ރައްކާތެރިކަމަށްޓަކައި ދައުލަތުގެ ސަލާމަތީ ބާރުތަކުން އިތުރު ހަރުދަނާ ފިޔަވަޅުތަކެއް އެޅުން އަވަސް ކުރުމަށް މިކޮމިޝަނުން އިލްތިމާސް ކުރަމެވެ."

އެބަޔާނުގައި ބުނެފައިވަނީ ބުނެފައިވަނީ "ދިރިހުރުމުގެ ހައްޤަށް އަރައިގެންފައިވާ ފަރާތްތަކާއި، އަނިޔާވެރި ޖަރީމާތައް ހިންގާ ފަރާތްތައް ހޯދައި އިންސާފުގެ ކުރިމައްޗަށް ވީހާއަވަހަށް ގެނައުމަށް ދައުލަތުގެ ކަމާބެހޭ ފަރާތްތަކަށް މި ކޮމިޝަނުން" ގޮވާލާ ކަމަށެވެ.

އޭގެ އިތުރަށް ލާއިންސާނީ އެފަދަ ބޮޑެތި ކުށްތައް ހުއްޓުވައި، ރައްކާތެރި މާހައުލެއް ކަށަވަރު ކުރުމަށްޓަކައި އާންމު ރައްޔިތުންނާއި އަމިއްލަ ޖަމްއިއްޔާތަކުން އެހީތެރިކަމާއި އެއްބާރުލުން ދިނުމަށް ވެސް އެކޮމިޝަނުންވަނީ ގޮވާލާފައެވެ.