ލިލީސްޓޯރުގެ ގުދަނެއްގައި ރޯވެ އަނދައިހުލިވެއްޖެ

މާފަންނު އޯކްވިލާގައިހުރި ލިލީ ސްޓޯރުގެ ގުދަނުގައި ރޭ ރޯވެ ވަރަށް ބޮޑަށް އަނދައިފިއެވެ. އެގުދަނުގައި ރޯވެފައިވަނީ ރޭ 10:30 އެހައިކަންހާރު އެވެ.

އެގުދަނަކީ ކާބޯތަކެއްޗާއި، ކޮސްމެޓިކްސް ފަދަ ސާމާނުލައިފައި ހުރި ގުދަނެކެވެ. އެތަނުގައިރޯވި ސަބައެއް އަދިވެސް އެނިފައެއް ނުވެއެވެ. ދެބުރިއަށް ހަދާފައިވާ ގުދަނުގައި ރޯވެ އެތާގައިހުރި މިއްސަކަށް ކޮންޓެއިނަރުގެ މުދާވަނީ ބޭނުން ނުކުރެވޭ ވަރަށް އަނދައިފައެވެ.

މިހާދިސާގައި އަވަށްޓެރި ބައެއް ގޭގެއިން މީހުން ހުސްކޮށް ރައްކާތެރި ހިސާބަށްވެސް ގެންދަން ޖެހުނެވެ. އަދި ބައެއްގޭގެއިންވަނީ ތަކެތިވެސް ނެރެފައެވެ. އަލިފާންގަނޑު ނިއްވާލުމަށް ސިފައިންނާއި ފުލުހުން ގެންދަނީ މަސައްކަތްކުރަމުންނެވެ. އަދި އެސަރަހައްދަށް އެއްވެފައިވާ ގިނައަދަދެއްގެ ރައްޔިތުންގެ އެހީތެރިކަންވެސް އެކަމުގައި ލިބިފައިވާ ކަމަށް ފުލުހުންނާއި ސިފައިވަނީ ބުނެފައެވެ. އެ ސަރަހައްދަށް އެއްވެފައިވާ މީހުންގެ އަދަދު ގިނަކަމުން ސިފައިވަނީ އުދަގޫނުވާ ގޮތަށް ހަރަކާތްތެރިވުމަށް އާންމުގެ ކިބައިން އެދިފައެވެ.

އެތަން އަނދަމުންދިޔައިރު އެއްޗެހިތައް ގޮވަމުންދިޔަ އަޑުފަށްގަނޑު އިވުނެވެ. އެއީ ގުދަނުގައިހުރި ބޮޑީސްޕްރޭ ފުޅިތައް ކަމަށްވެސް މައުލޫމާތު ލިބިފައިވެއެވެ. އެގުދަނުގައި ރޯވެފައިވާ އަލިފާންގަނޑު ކޮންޓްރޯލް ކުރެވިފައިވިޔަސް އެއްކޮށް ނިއްވާ ނުލެވެއެވެ.

މައުލޫމާތު ލިބިފައިވާ ގޮތުގައި އެގުދަނުގައިހުރި މުދަލަކީ އިންޝުއަރެންސް ކޮށްފައިވާ ތަކެއްޗެވެ. އެހެން ކަމުން މުދާ އަނދައިގެން ދިޔަސް ރައްޔިތުންނަށް ގަންނަން ލިބެންވާ ސާމާނު ލިބުމުގައި ދަތިކަމެއް ކުރިމަތިނުވާނެ ކަމަށް އެތަނުގެ ވެރިމީހާ އަހުމަދު ނާސިރު ވަނީ ބުނެފައެވެ.

އެގުދަނުގެ އިތުރަށް މާލޭ ކުޅިވަރު އެކުވެންޏާއި، ނީލަން ފިހާރަ ހުންނަ ސަރަހައްދުގައިވެސް ރޭ ރޯވިއެވެ. ނަމަވެސް އެތަނުގައި ރޯވިއަލިފާންވަނީ ނިއްވާލައިފައެވެ.

ލިލީ ސްޓޯރުގެ ގުދަނުގައި ރޯވިކަން އެނގިފައިވަނީ ރޭ 1:15 އެހައިކަންްހާއިރު ކަމަށް އެތަނުގެ ވެރިން ބުނެފައިވެއެވެ. ރޯވިކަން އެނގިގެން އެމްއެންޑީއެފްއަށް އެންގިއިރުވެސް އެމްއެންޑީއެފްގެ ބޭފުޅުން ތިއްބެވީ އަލިފާން ނިއްވުމުގެ މަސައްކަތުގައި ކަމަށް އެތަނުގެ ވެރިޔާ އަހުމަދު ނާސިރު މީޑިއާގައި ބުނެފައިވެއެވެ.

އެގުދަނުގައި އަލިފާންރޯވެ ލިބުނު ގެއްލުމުގެ އެއްވެސް ތަފްސީލެއް ލިބިފައެއް ނުވެއެވެ. ނަމަވެސް މިލިއަނުން ގެއްލުންވާނެ ކަމަށް ލަފާކުރެވެއެވެ. އެއީ ލިލީ ކުންފުނީގެ ގުދަންތަކުގެ ތެރެއިން އެންމެބޮޑު ގުދަނެވެ. އަދި މާލޭގައިހުރި ގުދަންތަކުގެ ތެރެއިން ބޮޑެތި ގުދަންތަކުގެ ތެރޭގައި ހިމެނޭ ގުދަނެކެވެ.