މިއަދުގެ ބޭއްވި އިލެކްޝަންތައް ސަރުކާރުން ކާމިޔާބު ކޮށްފި

މިއަދު ބޭއްވި ދ. މީދޫދާއިރާގެ އަތޮޅުކައުންސިލްގެ ބައި-އިލެކްޝަނާއި، މުރައިދޫ ކައުންސިލްގެ ބައި-އިލެކްޝަން ސަރުކާރު ހިންގާ ކޯލިޝަނުން ކާމިޔާބުކޮށްފިއެވެ.

މީދޫ ދާއިރާގެ އަތޮޅު ކައުންސިލްގެ ބައި-އިލެކްޝަން ކާމިޔާބުކޮށްފައިވަނީ ސަރުކާރުކޯލިޝަންގެ ބައިވެރިޔާ އެމްޑީއޭގެ ކެންޑިޑޭޓް މުޙައްމަދު މަމްދޫހެވެ. އޭނާއަށްވަނީ 997 ވޯޓް ލިބިފައެވެ. އިންސައްތައަށް ބަލާކަށްވާނަމަ އެއީ ވޯޓުދިން މީހުންގެ 60.94 އިންސައްތައެވެ. އޭނާއާ ވާދަކުރި އެމްޑީޕީގެ ކެންޑިޑޭޓް ޞާލިހް އައްސަބާހަށް ލިބިފައިވަނީ 639 ވޯޓެވެ.

މިއަދުނެގި ވޯޓުގައި 1662 މީހުންވަނީ ވޯޓުދީފައެވެ. ވޯޓުދިނުމުގެ ހައްގު ލިބިފައިވާ 2366 މީހުން އެދާއިރާގައި އެބަތިބިއެވެ. ސައްހަ ވޯޓުގެ ޢަދަދަކީ 1636 އެވެ.

ހއ. މުރައިދޫ ކައުންސިލްގެ ގޮނޑިއެއް ހުސްވެފައިވާތީ އެގޮނޑިއަށް މީހަކު ހޮވުމަށް މިއަދު ބޭއްވި ބައި-އިލެކްޝަން ކާމިޔާބު ކޮށްފައިވަނީ ޕީޕިއެމްގެ ކެންޑިޑޭޓް ޢަބްދުﷲ މުފީދެވެ. އޭނާވަނީ 208 ވޯޓު ހޯދައިފައެވެ.

ދެވަނައަށް އެންމެގިންއިން ވޯޓު ހޯއްދެވީ އަމިއްލަ ކެންޑިޑޭޓް މުޙައްމަދު ފުވާދެވެ. އޭނާއަށް ލިބިފައިވަނީ 143 ވޯޓެވެ. އެމްޑީޕީގެ ކެންޑިޑޭޓް ޢާއިޝަތު ވިސާމާއަށް ލިބިފައިވަނީ 107 ވޯޓެވެ.

އެދާއިރާގެ ބައި-އިލެކްޝަނުގައި ވޯޓުލައިފައިވަނީ 464 މީހުންނެވެ. ސައްހަ ވޯޓުގެ އަދަދަކީ 458 އެވެ. ވޯޓުލުމުގެ ހައްގު ލިބިފައިވަނީ 576 މީހުންނެވެ.އެމްޑީޕީގެ ނާއިބު ރައީސް މުޙައްމަދު ޝިފާޒު މިރޭ ވިދާޅުވީ ސަރުކާރުން މިއިލެކްޝަންތައް ކާމިޔާބު ކުރައްވާފައިވަނީ ނުފޫޒު ފޯރުވައިގެން ކަމަށެވެ. އެއްވެސް ނުފޫޒެއްނެތި ދެފުށްފެންނަ ގޮތަށް ބާއްވާ އިންތިޚާބެއް ސަރުކާރަށް ކާމިޔާބު ނުކުރެވޭނެ ކަމުގެ ޔަގީންކަން އެބައޮތް ކަމަށްވެސް އޭނާ ވިދާޅުވިއެވެ.