ގަމުދާއިރާގެ މެންބަރު ފައްޔާޒު ދޫކޮށްލައިފި

އެމްޑީޕީގެ މުޒާހަރާއެއްގައި ހަރަކާތްތެރި ވަމުން ގެންދަވަނިކޮށް ފުލުހުން ހައްޔަރުކޮށްފައިވާ ހައްދުންމަތީ ގަމުދާއިރާގެ މެންބަރު ފައްޔާޒު އިސްމާއީލް ކްރިމިނަލް ކޯޓުން މިރޭ ދޫކޮށްލައިފިއެވެ.

ފުލުހުންގެ ހައްޔަރަށް ފައްޔާޒު ގެންގޮސްފައިވަނީ މިމަހުގެ 6 ވަނަ ދުވަހު ރޭ ބޭއްވި މުޒާހަރާގައެވެ.

އެރޭ ހައްޔަރުކުރުމަށްފަހު ކޯޓުންވަނީ 15 ދުވަހަށް އޭނާގެ މުއްދަތު ޖަހައިދީފައެވެ. މުއްދަތު ޖެހުމުގެ ކުރިން 60 ދުވަހަށް މުޒާހަރާއަށް ވަޑައި ނުގެންނެވުމަށް އެންގިއެވެ. ނަމަވެސް ފައްޔާޒުވަނީ އެކަމަށް އިންކާރު ކުރައްވާފައެވެ. 15 ދުވަހުގެ މުއްދަތު ކޯޓުން ޖަހައިދިނީ 60 ދުވަސް ވަންދެން މުޒާހަރާއަށް ވަޑައިނުގެންނެވުމަށް ކުރި ޝަރުތު ފައްޔާޒު ގަބޫލު ނުކުރެއްވުމުންނެވެ. ފައްޔާޒު އެކަމަށް އިންކާރު ކުރެއްވީ މުޒާހަރާ ކުރުމާއި އެއްވެ އުޅުމުގެ މިނިވަންކަމަކީ ގާނޫނު އަސާސީން ކަށަވަރުކޮށްދީފައިވާ ހައްގަކަށްވާތީއެވެ.

ފައްޔާޒާއެކު އެރޭ ހައްޔަރުކުރި ބައެއް މީހުން ވަނީ 60 ދުވަހަށް މުޒާހަރާއަށް ނުދިޔުމަށް ޝަރުތުކޮށް ދޫކޮށްލާފައެވެ.