އެއްގައުމުން އަނެއް ގައުމެއްގެ ދާޚިލީކަންކަމާ ނުބެހުމަށް ސައުދީއާއި ރާއްޖެ އެއްބަސްވެއްޖެ

އެއްގައުމުން އަނެއްގެ ގައުމުގެ ދާޚިލީ ކަންކަމާ ނުބެހުމަށް ސައުދީ އަރަބިއްޔާއާއި ދިވެހިރާއްޖެއިން އެއްބަސްވެއްޖެއެވެ.

ސައޫދީ އަރަބިއްޔާގެ ފަރާތުން އެކަމަށް އެއްބަސްވެ ވަޑައިގެންފައިވަނީ ރަސްގެފާނު، ސަލްމާން ބިން އަބްދުލް އަޒީޒް އާލް-ސަޢުދެވެ. ރާއްޖެއިން އެކަމަށް އެއްބަސްވެ ވަޑައިގެންނެވީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމެވެ.

ދެގައުމުގެ ދެމެދުގައިވާ ގުޅުން އިތުރަށް ބަދަހިކުރެއްވުމުގައި އިހްތިރާމާއެކު މަސައްކަތްކުރެއްވުމަށްވެސް ދެބޭފުޅުން އެއްބަސްވެ ވަޑައިގެންނެވިއެވެ. ދެ ބޭފުޅުން އެކަމަށް އެއްބަސްވެ ވަޑައިގެންފައިވަނީ ރައީސް ޔާމީން ސައޫދީ އަރަބިއްޔާއަށް މިމަހު 18 ވަނަ ދުވަހު ކުރެއްވި ފުރަމާނަ ދަތުރުފުޅާ ގުޅިގެން، ދެގައުމުން ނެރުނު ގުޅިފައިވާ ރަސްމީ ބަޔާނުގައި ކަމަށް ރައީސް އޮފީހުން ބުނެފައިވެއެވެ.

ރައީސުލްޖުމްހޫރިއްޔާގެ މިދަތުރުފުޅުގައިވަނީ ދެގައުމުގެ ވިސްނުން އެއްގޮތްވާ ދާއިރާތަކާ ގުޅޭ ގޮތުން މަޝްވަރާ ކުރައްވާފައެވެ. އަދި ދެ ގައުމުން އެކުގައި ހާސީލްކުރަން ބޭނުންވާ ލަނޑުދަނޑިތައް ހާސިލްކުރުމަށް މަސައްކަތް ކުރައްވާނެކަމުގެ ޔަގީންކަން އެއްގައުމުން އަނެއްގައުމަށްވަނީ ދެއްވާފައެވެ. ގޮތުން، ޚާރިޖީ ދާއިރާއާއި، ދިފާއީ ދާއިރާއާއި، ދީނީ ކަންކަމުގަޔާއި، ޝަރުޢީ ދާއިރާއިންނާއި، އިގްތިސާދާއި، ވިޔަފާރިޔާއި، އިންވެސްޓްމަންޓްގެ ދާއިރާއިންނާއި، ތައުލީމާއި، ސިއްހަތާ ބެހޭ ދާއިރާއިން، އިތުރަށް ގުޅުން ބަދަހިކުރުމަށް ވަނީ ނިންމަވާފައެވެ.

ރާއްޖޭގެ އިސްލާމީ ޝިޢާރު ވަރުގަދަ ކުރުމުގައި ސަޢޫދީ ޢަރަބިއްޔާއިން މިހާރަށްވުރެ ބޮޑަށް ރާއްޖެއަށް އެހީތެރިކަން ފޯރުކޮށްދިނުމާ ބެހޭގޮތުންނާއި، ސަޢޫދީ ސަރުކާރުން ރާއްޖެއަށް ދެމުންގެންދާ ސްކޮލަޝިޕްގެ ފުރުޞަތުތައް އިތުރުކުރުމާ ބެހޭގޮތުން ރައީސުލްޖުމްހޫރިއްޔާއާއި، ސަޢޫދީ ރަސްގެފާނުވަނީ ޚާއްސަ ގޮތެއްގައި މަޝްވަރާ ކުރައްވާފައެވެ. އަދި ވިޔަފާރިއާއި އިންވެސްޓްމަންޓްގެ ދާއިރާއިން ދެގައުމުގެ ދެމެދުގައި އިތުރަށް ގުޅުން ބަދަހިކުރުމަށް ދެގައުމުންވަނީ ޝައުގުވެރިކަން ފާޅުކޮށްފައެވެ.

މީގެ އިތުރުން، ދެގައުމުގެ ދޭތެރޭގައި އޮތް ގާތް އަޚުވަންތަ ގުޅުމާއި، ސަރަޙައްދީ ގޮތުންނާއި ބައިނަލްއަގްވާމީ ގޮތުން، ދެޤައުމަށް މުހިންމު މައްސަލަތަކާ ބެހޭގޮތުން ސަޢޫދީ ރަސްގެފާނާއި ރައީސުލްޖުމްހޫރިއްޔާ މަޝްވަރާކުރެއްވި ކަމުގައި ގުޅިފައިވާ ބަޔާނުގައި ހާމަކުރައްވާފައިވެއެވެ.