މުއްޔަށް މަސްތުވާތަތި އެތެރެކުރަން އުޅުނު މީހަކު ހައްޔަރުކޮށްފި

މ. މުއްޔަށް މަސްތުވާތަކެތި އެތެރެކުރަން އުޅުނު މީހަކު މަސްތުވާތައްޗާއެކު ހައްޔަރުކޮށްފި ކަމަށް ފުލުހުން ބުނެފިއެވެ.

މިމަހުގެ 18 ވަނަދުވަހު އެރަށަށް އެތެރެކުރަން މަސައްކަތްކުރީ މަސްތުވާތަކެތި ކަމަށް ބެލެވޭ އެއްޗެއްހުރި 15 ރަބަރު ޕެކެޓާއި ބުލެޓް ސައިޒްގެ 5 ރަބަރު ޕެކެޓެވެ.

އެ ތަކެތި އެތެރެ ކުރަން އުޅުނު 31 އަހަރުގެ ދިވެހި ފިރިހެން މީހާ ހައްޔަރުކޮށްފައިވަނީވެސް ހަމައެދުވަހުއެވެ.

އެދުވަހު ހަވީރު 4:00 އެހައިކަންހާއިރު އޭނާ އަތުލައިގަތީ މ. މުލީ ބަނދަރު ސަރަހައްދުން ކަމަށް ފުލުހުން ބުނެފައިވެއެވެ. މަސްތުވާތަކެތި ކަަމަށް ބެލެވޭ އެއްޗެހި ފެނިފައިވަނީ އޭނާ ބަލައި ފާސްކުރިއިރުއެވެ.

އެމީހާގެ ކުޑަކަމުދާތަކެތި މަސްތުވާތަކެތީގެ 2 ބާވަތަކަށް ވަނީ ޕޮޒިޓިވް ވެފައި ކަމަށްވެސް ފުލުހުން ބުނެފައިވެއެވެ. ނަމަވެސް އެއީ ކޮންބާވަތެއް ކަމެއް ފުލުހުން ހާމަކޮށްފައެއް ނުވެއެވެ.

އޭނާގެ ބަންދާމެދު ގޮތެއް ނިންމުމަށް މ. މުލި މެޖިސްޓްރޭޓް ކޯޓަށް ހާޒިރު ކުރުމުން، މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބަހައްޓައިގެން ތަޙުޤީޤު ކުރިއަށް ގެންދިއުމަށް 15 ދުވަހުގެ ބަންދުގެ މުއްދަތެއް ވަނީ ދީފައެވެ. ފުލުހުން މިހާރު ގެންދަނީ މިމައްސަލަ ތަހުގީގު ކުރަމުންނެވެ.