ޒިޔަދަަމްގެ މަރުގެ މައްސަލާގައި 4 މީހަކު ހައްޔަރުކޮށްފި

ހައްދުންމަތީ މުންޑޫ ނޫވިލު، އަލީ ޒިޔަދަމަށް ގްރޫޕަކުން ހަމަލާދީ މަރައިލި މައްސަލައާ ގުޅިގެން 4 މީހަކު ހައްޔަރު ކޮށްފި ކަމަށް ފުލުހުން ބުނެފިއެވެ.

އެމީހުންގެ ތެރެއިން 3 މީހުން ހައްޔަރުކޮށްފައިވަނީ މިއަދު ހެނދުނުއެވެ. ފުރަތަމަ މީހާ ހައްޔަރު ކޮށްފައިވަނީ ޒިޔަދަމް މަރުވިތާ މާގިނަ އިރެއް ނުވަނީސް ރޭގެ ވަގުތެއްގައެވެ.

ހައްޔަރުކުރި މީހުންނާބެހޭ އިތުރު އެއްވެސް މައުލޫމާތެއް ފުލުހުން ހާމަކޮށްފައެއް ނުވެއެވެ. ރޭ ޒިޔަދަމް މަރާލައިފައިވަނީ އޭނާއާއި އެކުވެރިންތަކެއް ގުޅިގެން ބަނގުރާ ކެއްކުމަށްފަހު އެ ބެހުމުގައި ދިމާވި މައްސަލައެއްގައި ކަމަށްވެއެވެ.

އޭނާ މަރާލާފައިވަނީ ވަޅިން ހަމަލާ ދީގެންނެވެ. އެހަމަލާއަށްފަހު އެރުށު ސިއްހީ މަރުކަޒަށް ގެންދިޔުމުގެ ކުރިން އޭނާ މަރުވެފައިވާ ކަމަށް އެތަނުން ބުނެފައި ވެއެވެ. އޭނާގެ ގައިގެ 4 ވަރަކަށް ތަނަށް ވަޅިހަރާފައިވާ ކަމަށްވެސް ސިއްހީ މަރުކަޒުންވަނީ ބުނެފައެވެ. ވަޅިހަރާފައިވަނީ އޭނާގެ ކަރާއި، އަތާއި، ބުރިކައްޓާއި، ފައިގެ ފަލަމަސްގަނޑަށެވެ.

މިހަމަލާއަށްފަހު އޭނާ ސިއްހީމަރުކަޒަށް ގެންދިޔައީ ރޭ 11:10 އެހައިކަންހާއިރު ކަމަށް ފުލުހުންވަނީ ބުނެފައެވެ. ފުލުހުން ބުނެފައިވަނީ ޒިޔަދަމަކީ ވައްކަމާއި މަސްތުވާތަކެތީގެ ކުށުގެ ރެކޯޑް އޮންނަ މީހެއް ކަމަށެވެ.

އުމުރުން 29 އަހަރުގެ ޒިޔަދަމްގެ މަރުގެ މައްސަލަ ފުލުހުން ގެންދަނީ ތަހުގީގު ކުރަމުންނެވެ. މިކަމާ ގުޅުންހުރި އިތުރުބަޔަކުވޭތޯ ބެލުމުގެ މަސައްކަތްވެސް ފުލުހުން ގެންދަނީ ކުރަމުންނެވެ.