ރައީސް ނަޝީދަށް އެއްވެސް ނުރައްކަލެއް ދޫނިދޫގައިނެތް- ފުލުހުން

ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުހައްމަދު ނަޝީދަށް އެއްވެސް ނުރައްކަލެއް ނެތް ކަމަށް ފުލުހުން މިއަދު ބުނެފިއެވެ.

ފުލުހުން މިހެން ބުނެފައިވަނީ ރައީސް ނަޝީދު އަވަހާރަކޮށްލަން ރާވަމުންދާ ކަމުގެ މައުލޫމާތު އެމަނިކުފާނުގެ އާއިލާއަށް ލިބިވަޑައިގެންފައިވާ ކަމަށް އެމަނިކުފާނުގެ އަނބިކަނބަލުން ލައިލާ އަލީ މިއަދު ވިދާޅުވެފައިވަނިކޮށްނެވެ.

އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ސުޕްރިންޓެންޑެންޓް އޮފް ޕޮލިސް ހަމްދޫން ރަޝީދު ވިދާޅުވީ ރައީސް ނަޝީދަށް އެއްވެސް ނުރައްކަލެއް ނެތްކަމަށެވެ. އެމަނިކުފާނު ހުންނެވީ ފުލުހުންގެ ފުރިހަމަ ހިމާޔަތާއި ރައްކާތެރި ކަމުގެ ތެރޭގައި ކަމަށެވެ.

ހަމްދޫން ރަޝީދު ވިދާޅުވީ ނަޝީދުގެ ފުރާނައަށް ގެއްލުންދޭން ބަޔަކު މަސައްކަތް ކުރާ ކަމުގެ "އިތުބާހުރި" މައުލޫމާތު ލިބިފައިވާ ކަމަށް އެމްޑީޕީން ބުނެފައިވިޔަސް ހަމްދޫންވަނީ އެކަން ދޮގުކޮށްފައެވެ.

ރައީސް ނަޝީދު ދޫނިދޫގައި ބަހައްޓަވާފައި ހުންނެވީ އެމަނިކުފާނަށް ލިބެންޖެހޭ ސަލާމަތާ ރައްކާތެރިކަން ނުލިބޭ ގޮތަށް ކަމަށް އެމްޑީޕީން ވަނީ ބުނެފައެވެ. ނަމަވެސް އެކަންވެސް ފުލުހުން ދޮގުކުރިއެވެ. "ރައީސް ނަޝީދު ދޫނިދޫގައި ހުންނެވީ ފުރިހަމަ ސަލާމަތާއި ރައްކާތެރިކަމުގައި،" ހަމްދޫން ރަޝީދު ވިދާޅުވިއެވެ.

 ރައީސް ނަޝީދު ހުންނަވާ ތަނުގައި ޓިއުޓީއަށް ހުންނަނީ އެންމެ މީހެއް ކަމަށްވެސް އެމްޑީޕީން ބުނެފައިވާ ބުނުންވެސް ހަމްދޫން ދޮގު ކުރިއެވެ. ނަމަވެސް އެތާ ފޯރިއަށް ތިބެނީ ކިތައް މީހުން ކަމެއް ހާމައެއް ނުކުރެއެވެ. އޭނާ ވިދާޅުވީ ރައީސް މަޝީދު ހުންނަވާ ތަނުގެ ސަލާމަތާ ރައްކާތެރިކަން ފުލުހުންގެ ކަސްޓޯޑިއަލް ޑިޕާޓްމަންޓާއި، ޕްރޮފެޝަނަލް ސްޓޭންޑާޑުންވެސް ބަލަމުން ގެންދާ ކަމަށެވެ.

ނޫސްވެރިންނަށް މައުލޫމާތު ދެއްވަމުން ހަމްދޫން ވިދާޅުވީ މިމަހުގެ 17 ވަނަ ދުވަހު އެމްޑީޕީން ބޭއްވި އެއްވުމުގެ ތެރެއަށް ބަޔަކުވަދެވަނީ ކަޅުތެޔޮ ޖަހައިފައި ކަމަށެވެ. އަދި އެ އެއްވުމުގައި ގެންގުޅުނު ބައެއް ތަކެއްޗަށްވަނީ ގެއްލުންދީފައެވެ. އެމީހުންގެ ބައެއް މީހުން ހައްޔަރުކޮށްފައިވާ ކަމަށް އޭނާ ވިދާޅުވިއެވެ. އަދި އެމީހުން ކޯޓަށް ގެންދިއުމަށްފަހު ބަންދުގެ މުއްތަދު އިތުރުކޮށްފައިވާ ކަމަށްވެސް ވިދާޅުވިއެވެ. އެމައްސަލަ ފުލުހުން ގެންދަނީ ބަލަމުން ކަމަށްވެސް ވިދާޅުވިއެވެ.

ރައީސް ނަޝީދު އަވަހާރަކޮށްލާނެ ކަމުގެ މައުލޫމާތު ލިބުމުން ވަރަށް ކަންބޮޑުވާ ކަމަށް ލައިލާ އަލީ ވިދާޅުވިއެވެ. އެކަމުގެ ކަންބޮޑުވުން ފާޅުކުރުމުގެ ގޮތުން ކަމާ ބެހޭ ފަރާތްތަކަށް ސިޓީ ފޮނުއްވި ކަމަށްވެސް އެކަމަނާ ވިދާޅުވިއެވެ. ނަަމަވެސް އަދި އޭގެ ޖަވާބެއް ލިބިފައި ނުވާ ކަމަށްވެސް ވިދާޅުވިއެވެ.