އަދާލަތު ޕާޓީގެ އެދުމުގެ މަތިން އެޕާޓީއާއެކު މަސައްކަތް ކުރުމަށް އެމްޑީޕީން ނިންމައިފި
17 މާރޗް 2015 17:52
އަދާލަތު ޕާޓީގެ އަމިއްލަ އިސްނެގުމުގެ ދަށުން އެމްޑީޕީއާއެކު މަސައްކަތް ކުރަން ހުށަހެޅުމުން އެމްޑީޕީން އެކަން ބަލައިގެންފިއެވެ.
އެމްޑީޕީއާއެކު މަސައްކަތް ކުރުމަށް އަދާލަތުއެދި ސިޓީއެއް ފޮނުވުމުން މިއަދު ހަވީރު އެމްޑީޕީންވަނީ އެޕާޓީގެ ގައުމީ ހިންގާ ކޮމިޓީގެ ބައްދަލުވުމެއް ބާއްވައިފިއެވެ. އެބައްދަލުވުމުގައި ނިންމާފައިވަނީ އަދާލަތު ޕާޓީއެކު މަސައްކަތް ކުރުމަށެވެ. އެޕާޓީއާއެކު މަސައްކަތް ކުރުމަށް ފެންނަ ކަމަށް މިއަދުގެ ބައްދަލުވުމުގައި ބައިވެރިވި 55 މެންބަރުންވަނީ އިއްތިފާގު ވެފައެވެ.
އަދާލަތުޕާޓީން ބުނެފައިވަނީ ސަރުކާރުން މިހާރު އަމަލުކުރަމުން ގެންދަވަނީ ލާއިންސާނީ ގޮތަކަށް ކަމަށެވެ. އެހެން ކަމުން އެޕާޓީންވަނީ ގައުމީ އެއްބައިވަންތަކަމުގެ ގުޅުމެއް ގާއިމްކޮށްގެން ސަރުކާރު ޒިންމާދާރު ކުރުމަށް މަސައްކަތް ކުރުމަށް ގޮވާލައިފައެވެ. އަދި ކަންކަން ހައްލު ކުރުމަށް ކޮންމެ ބަޔަކާއެކުވެސް މަސައްކަތް ކުރުމަށް ތައްޔާރަށް އޮތްކަމަށް އެޕާޓީންވަނީ ބުނެފައެވެ.
މިކަމާ ގުޅިގެން އެމްޑީޕީގެ ނާއިބު ރައީސް މުޙައްމަދު ޝިފާޒު ވިދާޅުވީ އަދާލަތު ޕާޓީ އެމްޑީޕީއާއެކު މަސައްކަތް ކުރަން އައުމަކީ ލިބުނު ވަރަށް ބޮޑު ކުރިއެރުމަކާއި ހިތްވަރެއް ކަމަށެވެ. އޭގެ ސަބަބުން ޖޭޕީއާއި އެމްޑީޕީ ގުޅިގެން މިހާރު ކުރަމުންދާ މަސައްކަތްތައް ވަރުގަދަވެ ފުޅާވެގެންދާނެ ކަމަށްވެސް ވިދާޅުވިއެވެ.
ކިޔުންތެރިންގެ ހިޔާލު