ކާނަލް ނާޒިމް ދޫނިދުއަށް ގެންދަނީ ސިއްހީ ފަރުވާ ނިމުމުން- ޕޮލިސް
16 މާރޗް 2015 20:52
ކުރީގެ ޑިފެންސް މިނިސްޓަރ މުޙައްމަދު ނާޒިމް 24 ގަޑިއިރަށް ގެއަށް ބަދަލު ކުރުމަށްފަހު އެވަގުތު ހަމަވުމުން އަލުން ދޫނިދުއަށް ގެންދިޔުން ފަސްކޮށްފިއެވެ.
ނާޒިމް ވަގުތީ ގޮތުން ގެއަށް ބަދަލުކުރީ ސިއްހީ ފަރުވާއަށްޓަކައެވެ. ނަމަވެސް ނާޒިމްގެ ސިއްހީ ފަރުވާ އަދި ނުނިމޭތީ މިރޭ ޑޮކްޓަރަށް ދެއްކުމަށްފަހު އަލުންވަނީ ގެއަށް ބަދަލު ކޮށްފައެވެ.
މިރޭ އިރާކޮޅު ފުލުހުން ބުނެފައިވަނީ ނާޒިމް ހުންނެެވީ ފަރުވާ ހޯދުމަށް ހޮސްޕިޓަލަށް ވަޑައިގެން ކަމަށެވެ. އެތަނުން ނިމިވަޑައިގެންނެވުމުން ދޫނިދުއަށް ގެންދާނެ ކަމަށެވެ. ނަމަވެސް ޑޮކްޓަރަށް ދެއްކުމުން އިތުރަށް ފަރުވާ ބޭނުންވާ ކަމަށް ޑޮކްޓަރ ވަނީ ވިދާޅުވެފައެވެ. އެހެން ކަމުން ފަރުވާ ފުރިހަމަ ވަންދެން ނާޒިމް ހުންނަވާނީ ގޭގައި ކަމަށް ފުލުހުން ބުންޏެވެ.
"ފަރުވާ ފުރިހަމަ ވަންދެން ނާޒިމް ހުންނަވާނީ ގޭގައި. އަލުން ދޫނިދުއަށް ގެންދާނީ ފަރުވާ ނިމުމުން" ފުލުހުންގެ މީޑިއާގެ އިސް ބޭފުޅަކު ވިދާޅުވިއެވެ.
ހަތިޔާރު އެތެރެކުރުމާއި ގެންގުޅުމުގެ ކުށުގައި ދައުލަތުން ދައުވާ އުފުލާފައިވާތީ ނާޒިމް ހުންނަވަނީ ފުލުހުންގެ ބެލުމުގެ ދަށުން ދޫނިދޫގައި ބަހައްޓާފައެވެ. އެމައްސަލައިގެ ޝަރީޢަތް ނިމެންދެން ނާޒިމް ބަންދުގައި ބަހައްޓަން ފުލުހުންގެ މައްޗަށް ކޯޓުންވަނީ އަމުރު ކޮށްފައެވެ.
ކިޔުންތެރިންގެ ހިޔާލު