ހުޅުމާލޭގެ ދެވަނަ ފިޔަވަހީގެ ބިން ހިއްކައި ނިމިއްޖެ

ހުޅުމާލެ ދެވަނަ ފިޔަވަހީގެ ދަށުން ހިއްކަންޖެހޭ 240 ހެކްޓަރުގެ ބިން ހިއްކައި މިއަދު ނިމިއްޖެއެވެ.

ހައުސިން ޑިވެލޮޕްމަންޓް ކޯޕަރޭޝަން (އެޗުޑީސީ) ގެ މެނޭޖިން ޑިރެކްޓަރ މުޙައްމަދު ސައިމަން ވިދާޅުވީ ބިން ހިއްކުމަށްފަހު ޑުރެޖަރުވެސް މިއަދު ހެނދުނު ފުރާފައިވާ ކަމަށެވެ.

ދެވަނަ ފިޔަވަހީގެ ބިން ހިއްކުމަށްފަހު ޑުރެޖަރު ފުރާފައިވަނީ ފަސްގަނޑު އެއްވަރު ކުރުމަށްފަހުއެވެ. ސައިމަން ވިދާޅުވީ އެސަރަހައްދުގައި ދެންކުރަންޖެހޭ މަސައްކަތަކީ ހިއްކި ސަރަހައްދު ހިމާޔަތް ކުރުމަށް ކުރަންޖެހޭ މަސައްކަތްތަކެވެ. އަންނަ ހަފްތާގައި އެމަސައްކަތް ފަށާނެ ކަމަށްވެސް ވިދާޅުވިއެވެ.

އެމަސައްކަތްކުރާނީ ބިންހިއްކި ކުންފުނި މެދުވެރިކޮށް، ސަބް ކޮންޓްރެކްޓަރެއް ލައްވައި ކަމަށްވެސް އޭނާ ވިދާޅުވިއެވެ. "ކުރިއަށް އޮތް 12 މަސްދުވަހުގެ ތެރޭގައި އެ މަސައްކަތް އެއްކޮށް ނިންމާލެވޭނެ،" ކަމަށްވެސް ސައިމަން ވިދާޅުވިއެވެ.

އެމަސައްކަތްތަކާއެކު ކަރަންޓާއި ފެނާއި، ނަރުދަމާގެ މަސައްކަތްވެސް ކުރިއަށް ގެންދާނެ ކަމަށް ސައިމަން ވިދާޅުވިއެވެ. އޭގެ އިތުރަށް ބައެއް މަގުތައް ހެދުމުގެ މަސައްކަތްވެސް ކުރިއަށް ގެންދާނެ ކަމަށް ވިދާޅުވިއެވެ.

ސައިމަން ވިދާޅުވީ ދެވަނަފިޔަވަހީގެ މަސައްކަތް ކުރިއަށް ގެންދަނީ ފުރިހަމަ ޕްލޭނެއްގެ ދަށުންނެވެ. އެހެން ކަމުން އެކިކަންކަން ކުރަން ފަށާނެ ތާރީޚާއި ނިމޭނެ ކަމަށް ލަފާކުރާ ތާރީޚުތައް އެކުލަވާލައި ވަރަށް އަވަހަށް އާންމު ކުރާނެ ކަމަށް ވިދާޅުވިއެވެ.

ހުޅުމާލޭގެ ދެވަނަ ފިޔަވަހީގެ ދަށުން ބިންހިއްކުމުގެ މަސައްކަތް ރަސްމީކޮށް ފަށައިފައިވަނީ ދެހާސް ފަނަރަވަނަ އަހަރު ޖެނުއަރީމަހު ފަނަރަވަަނަ ދުވަހުއެވެ.

ހުޅުމާލޭ ފުރަތަމަ ފިޔަވަހީގައި ހިއްކާފައިވަނީ ސަތޭކަ އަށްޑިހައަށް ހެކްޓަރު ބިމެވެ. އެއީ ފަސްދޮޅަސް ހާސް މީހުންގެ އާބާދީއަށް އަމާޒުކޮށްގެން ހިއްކި ބިމެކެވެ. އެ އާބާދީއަށް ބަލާއިރު މިހާރުވެސް އޭގެ ދެބައިކުޅަ އެއްބަޔަށްވުރެ ގިނަ މީހުން އެބިމުގައި ވަނީ އާބާދުވެފައެވެ. ދެވަނަ ފިޔަވަހީގައި ދުއިސައްތަ ސާޅީސް ހެކްޓަރު ބިން ހިއްކާފައިވަނީ އެއްލައްކަ މީހުންގެ އާބާދީއަކަށެވެ.

ރައީސް ޔާމީން ވިދާޅުވެފައިވާ ގޮތުގައި ހުޅުމާލެ ތަރައްގީ ކުރާނީ ޒުވާނުންގެ ސިޓީއެއްގެ ގޮތުގައެވެ. އެސިޓީ ތަރައްގީކޮށް ނިމޭއިރު ނޮލެޖެ ޕާކް (ޢިލް މީމަރުކަޒު) އައިޓީ ޕާކް (އިންފޮމޭޝަން ޓެކްނޮލޮޖީ މަރުކަޒު) އެއް ތަރައްގީ ކުރާނެއެވެ. އަދި ޔޮޓް މެރީނާއެއްވެސް ހެދިގެންދާނެއެވެ. އެއީ އެއްފަހަރާ 300 އެއްހާ ޔޮޓަށް ޚިދުމަތް ދެވޭވަރުގެ މެރީނާއެކެވެ.

މީގެ އިތުރަށް ތީމް ޕާކާއި އިންޑަސްޓްރިއަލް ޕާކެއް ހެދުމަށްވަނީ ޕްލޭންގައި ހިމަނާފައެވެ. އަދި ޓޫރިޒަމް ޑިސްޓްރިކްޓެއް (ފަތުރުވެރިންނަށް ޚާއްސަ ސަރަހައްދެއް) ގާއިމް ކުރުމަށްވެސްވަނީ ނިންމާފައެވެ. މީގެއިތުރަށް ބިޒްނަސް ޑިސްޓްރިކްޓަކާއި ތިން ސިޓީ ހޮޓާ ހުޅުމާލޭގައި ތަރައްގީ ކުރާނެއެވެ. އަދި ކޮންވެންޝަން ސެންޓަރާއި މިއުޒިއަމް (ދާރުލް އާސާރެއް) ތަރައްގީކުރެވޭނެއެވެ. އޭގެ އިތުރށް އެކުއަޓިކް ވޯޓަރ ސެންޓަރެއްވެސް ގާއިމް ކުރެވޭނެއެވެ.

ދެވަނަ ފިޔަވަހީގެ ދަށުން ހުޅުމާލޭގައި ނެއިބަރހުޑުތަކެއް ގިނައަދަދަކަށް ތަރައްގީ ވެގެންދާނެއެވެ. ސަތާރަހާސް ނުވަތަ ވިހިހާސް ހައުސިން ޔުނިޓް އަޅޭނެ ކަމަށް އެޗްޑީސީން ވަނީ ބުނެފައެވެ.