ކާނަލް ނާޒިމްގެ ފަރުވާއަށްފަހު މިއަދު ދުނިދުއަށް ގެންދާނެ- ޕޮލިސް

ކުރީގެ ޑިފެންސް މިނިސްޓަރ މުޙައްމަދު ނާޒިމް 24 ގަޑިއިރަށް ގެއަށް ބަދަލު ކުރުމަށްފަހު އެވަގުތު ހަމަވުމުން މިރޭގެ ވަގުތެއްގައި އަނެއްކާވެސް ދޫނިދުއަށް ބަދަލު ކުރާނެ ކަމަށް ފުލުހުން ބުނެފިއެވެ.

ފުލުހުންގެ މީޑިއާއިން ބުނީ ނާޒިމް މިހާރު ހުންނެވީ ހޮސްޕިޓަލުގައި ކަމަށެވެ. އެތަނުން ނިމިގެން ސީދާ ގެންދާނީ ދޫނިދުއަށް ކަމަށެވެ. "ނާޒިމް ސަރ މިވަގުތު ހުންނެވީ ހޮސްޕިޓަލުގައި. އެތަނުން ނިމިގެން ގެންދާނީ ދޫނިދުއަށް" ފުލުހުންގެ މީޑިއާގެ އިސްވެރިއަކު ވިދާޅުވިއެވެ.

ނާޒިމް ވަގުތީ ގޮތުން ގެއަށް ބަދަލު ކޮށްފައިވަނީ އިއްޔެ އިރުއޮއްސުނު ވަގުތުއެވެ. އޭނާ ގެއަށް ބަދަލުކުރީގެ ސިއްހީ ހާލަތާ ގުޅިގެން އާއިލާގެ އެދުމުގެ މަތިންނެވެ.

ހަތިޔާރު އެތެރެކުރުމާއި ގެންގުޅުމުގެ ކުށުގައި ދައުލަތުން ދައުވާ އުފުލާފައިވާތީ ނާޒިމް ހުންނަވަނީ ފުލުހުންގެ ބެލުމުގެ ދަށުން ދޫނިދޫގައި ބަހައްޓާފައެވެ. އެމައްސަލައިގެ ޝަރީޢަތް ނިމެންދެން ނާޒިމް ބަންދުގައި ބަހައްޓަން ފުލުހުންގެ މައްޗަށް ކޯޓުންވަނީ އަމުރު ކޮށްފައެވެ.

މިމައްސަލައިގައި ބާއްވާ ޝަރީޢަތުގެ އަޑުއެހުމެއް މާދަމާރޭ 8.30 ގައި ކްރިމިނިލް ކޯޓުގައި އޮންނާނެއެވެ. މިއަދުގެ 2:00 އަށްވެސް އަޑުއެހުމެއް ތާވަލް ކުރިއެވެ. ނަަމަވެސް ފަހުންވަނީ ކެންސަލް ކޮށްފައެވެ.

އެންމެ ފަހުން ބޭއްވި މި ޝަރީޢަތުގެ އަޑުއެހުމުގައި ދައުލަތުން ބުނެފައިވަނީ ނާޒިމް ރާއްވަވާފައި ވަނީ، ރައީސް ޢަބްދުﷲ ޔާމީނާއި، ޓޫރިޒަމް މިނިސްޓަރ އަޙުމަދު އަދީބާއި، ސީޕީ ޙުސައިން ވަޙީދަށް ހަމަލާ ދިނުމަށް ކަމަށެވެ.