އެމްޑީޕީގެ މުޒާހަރާތަކަށް ވަދެ ހަމަލާދޭ މީހުންނާމެދު ފުލުހުން ފިޔަވަޅެއް ނާޅާ-އެމްޑީޕީ

އެމްޑީޕީން ބާއްވާ މުޒާހަރާތަކަށް ވަދެ މީހުންނާއި ތަކެއްޗަށް ހަމަލާދޭ މީހުންނާމެދު ފުލުހުން ފިޔަވަޅު އަޅަމުން ނުދާ ކަމަށާއި އެއީ ކަންބޮޑުވާ ކަމެއް ކަމަށް އެޕާޓީން ބުނެފިއެވެ.

އެޕާޓީން މިހެން ބުނެފައިވަނީ ރޭ އުސްފަސްގަނޑު ސަރަޙައްދުގައި މުޒާހަރާ ފެށުމަށް ތައްޔާރުވަމުން ދަނިކޮށް އެ މުޒާހަރާގެ ތެރެއަށް ކަތިވަޅި ހިފައިގެން ތިބި ބަޔަކު ވަދެ، މުޒާހަރާގެ ބައިވެރިންނަށް ކަތިވަޅިން ބިރުދައްކައި، ސައުންޑް ސިސްޓަމް ބަހައްޓާފައިހުރި ޕިކަޕުގެ ބިއްލޫރިތައް ތަޅާލައި އަދި ސައުންޑް ސިސްޓަމް ހަލާކުކޮށްލާފައިވާތީ އެކަން ކުށްވެރިކޮށް ނެެރެފައިވާ ބަޔާނެއްގައެވެ.

"ސުލްޙަވެރި މުޒާހަރާތައް ބޭއްވުމުގައި އެއްބާރުލުންދީ މުޒާހަރާ ކުރާފަރާތްތައް ހިމާޔަތްކޮށްދީ ރައްކާތެރިކޮށްދިނުމަކީ ފުލުހުންގެ މައްޗަށް ޤާނޫނީ ގޮތުން ލާޒިމު ކަމަކަށްވީހިނދު، އެމް.ޑީ.ޕީ އިން ބާއްވާ މުޒާހަރާތަކުގެ ތެރެއަށް މިގޮތަށް ގްރޫޕުތަކުން ތަކުރާރުކޮށް ވަދެ މީހުންނަށް ޙަމަލާދީ ތަކެއްޗަށް ގެއްލުންދެމުންދާއިރު، ފުލުހުން އެފަދަ ފަރާތްތައް ޙައްޔަރުކޮށް ފިޔަވަޅުއަޅަމުން ނުދާކަން ކަންބޮޑުވުމާއެކު ފާހަގަކުރަމެވެ." އެބަޔާނުގައިވެއެވެ.

ރައީސް ނަޝީދު މިނިވަން ކުރުމަށް އެދި ގޮވާލައި ރޭ ބޭއްވި މުޒާހަރާއަށް ތައްޔާރުވަމުން ދަނިކޮށް ކަތިވަޅި ހިފައިގެން ތިބި ހައެއްކަ މީހުންވަނީ އެތަނުގައި ހަރަކާތްތެރިވި ކެމެރާމަނެއްގެ ކެމެރާވެސް ހަލާކުކޮށްފައި ކަމަށް މައުލޫމާތު ލިބިފައިވެއެވެ.

މިފަދަ ޖަރީމާތަކެއް ހިންގަމުންދަނީ އެންމެންގެ ކުރިމަތީގައި ކަމަށްވެސް ފުލުހުން ބުނެފައިވެއެވެ. އަދި ފޮޓޯއާއި ވީޑިއޯގެ މަންޒަރުތަކުން އެމީހުން އެ ޖަރީމާތައް ހިންގާތަން ފެންނަން ހުންނަކަމަށްވެސް އެމްޑީޕީން ބުނެފައިވެއެވެ. ނަަމަވެސް ފިވަޅު އަޅަމުން ނުދާތީ އެއީ ކަންބޮޑުވާ ކަމެއްކަމަށްވެސް އެބަޔާނުގައި ބުނެފައިވެއެވެ.

"އެހެންކަމުން އެފަދަ ޖަރީމާތައް ހުއްޓުވައި އެފަރާތްތަކާމެދު ފިޔަވަޅުއެޅުމަށް ފުލުހުންނަށް ތަކުރާރުކޮށް ގޮވާލާހިނދު، ޕޮލިސް އިންޓެގްރިޓީ ކޮމިޝަނާއި ހިޔުމަން ރައިޓްސް ކޮމިޝަނުން މި މައްސަލަތައް ބައްލަވައިދެއްވުމަށް ވެސް މި ޕާރޓީން ގޮވާލަމެވެ." ބަޔާނުގައި ވެއެވެ.