ސައުވީސް ގަޑިއިރަށް ނާޒިމް ގެއަށް ބަދަލުކޮށްފި

ކުރީގެ ޑިފެންސް މިނިސްޓަރ މުޙައްމަދު ނާޒިމް ވަގުތީ ގޮތުން ގެއަށް ބަދަލުކޮށްފި ކަމަށް ފުލުހުން ހާމަކޮށްފިއެވެ.

ފުލުހުން ހާމަކުރި ގޮތުގައި ނާޒިމް ގެއަށް ބަދަލުކުރީ މިއަދު އިރުއޮއްސުނުއިރު ކަމަށެވެ. އޭނާ ގެއަށް ބަދަލު ކޮށްފައިވަނީ 24 ގަޑިއިރަށެވެ. ނަަމަވެސް ގެއަށް ބަދަލުކުރި އެއްވެސް ސަބަބެއް ފުލުހުން ހާމައެއް ނުކުރިއެވެ.

ނާޒިމް ގެއަށް ބަދަލުކުރީ ސިއްހީ ހާލަތު ހުރިގޮތުންތޯ ދެންނެވުމުން އެއަށްވެސް ފުލުހުން ސީދާ ޖަވާބެއް ނުދިނެވެ. "އަޅުގަނޑުމެން ހާމަކުރި ވަގުތީ ގޮތުން ގެއަށް ބަދަލުކުރިވާހަކަ އެކަނި" ފުލުހުންގެ މީޑިއާގެ ވެރިއަކު ވިދާޅުވިއެވެ.

ހަތިޔާރު އެތެރެކުރުމާއި ގެންގުޅުމުގެ ކުށުގައި ދައުލަތުން ދައުވާ އުފުލާފައިވާތީ ނާޒިމް ހުންނަވަނީ ފުލުހުންގެ ބެލުމުގެ ދަށުގައެވެ. އެމައްސަލައިގެ ޝަރީޢަތް ނިމެންދެން ނާޒިމް ބަންދުގައި ބަހައްޓަން ފުލުހުންގެ މައްޗަށް ކޯޓުންވަނީ އަމުރު ކޮށްފައެވެ.

ނާޒިމާ ދެކޮޅަށް ދައުލަތުން އުފުލާފައިވާ ދައުވާގެ ޝަރީއަތުގެ އަޑުއެހުމެއް މާދަމާ މެންދުރު ފަހު 2:00 އަށް ވަނީ ތާވަލްކޮށްފައެވެ.

އެންމެ ފަހުން ބޭއްވި މި ޝަރީޢަތުގެ އަޑުއެހުމުގައި ދައުލަތުން ބުނެފައިވަނީ ނާޒިމް ރާއްވަވާފައި ވަނީ، ރައީސް ޢަބްދުﷲ ޔާމީނާއި، ޓޫރިޒަމް މިނިސްޓަރ އަޙުމަދު އަދީބާއި، ސީޕީ ޙުސައިން ވަޙީދަށް ހަމަލާ ދިނުމަށް ކަމަށެވެ.