އެއްވެސް މީހަކަށް އަނެކަކު މުއްސަނދިކޮށް ނުދެވޭނެ-ރައީސް
15 މާރޗް 2015 20:31
އެއްވެސް މީހަކަށް އަނެކަކު މުއްސަނދިކޮށް ނުދެވޭނެ ކަމަށް ރައީސުލް ޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޒުވާން މަސްވެރިންނާއި އޮޑިވެރިން އިތުރު ކުރުމަށް ސަރުކާރުން ފަށައިފައިވާ މަސައްކަތުގެ ދަށުން 14 ފަރާތަކަށް ލޯނު ދިނުމަށް ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ މުއްސަނދި ކޮށްދިނުމުގެ ބަދަލުގައި ސަރުކާރުން ކޮށްދެއްވޭނެ ކަމަކީ ފުރުސަތު ތަނަވަސްކޮށްދިނުން ކަމަށެވެ. މުއްސަނދިވުމާއި އެ ފުރްސަތުގެ ބޭނުން ހިފަން ކެރުމުގެ ހިތްވަރު، އެކަންކަމަށް އަމާޒުކުރެވޭ މީހުންގެ ކިބައިގައި ހުންނަން ވާނެކަމުގައިވެސް ރައީސް ވިދާޅުވިއެވެ.
އެމަނިކުފާނު ވިދާޅުވީ އިގްތިސާދީ ފައިދާ ގިނަ މީހުންތަކަކަށް ލިބޭ ކަމަށްވާނަމަ އޭގެ ފައިދާ މުޅި ގައުމަށްވެސް ކުރާނެ ކަމަށެވެ. ގައުމުގެ "ރައުސްމާލުގައި" ބައިވެރިވާ މީހުންގެ އަދަދު، މިހާރަށްވުރެ އިތުރުކުރަންޖެހޭ ކަމަށްވެސް ރައީސް ވިދާޅުވިއެވެ.
އެމަނިކުފާނު ވިދާޅުވީ ޒުވާނުންނަކީ އާމްދަނީ ލިބޭ، ހަމަޖެހޭ ދިރިއުޅުމެއްގައި އުޅޭ ބައެއް ކަމަށްވާނަމަ، ގަައުމަށް ހަމަޖެހުން ލިބިގެންދާނެ ކަމަށެވެ. އަދި ހުރިހާ އެންމެންނަކީ ވިޔަފާރީގައި، ނުވަތަ އާމްދަނީ ހޯދުމުގައި ރަނގަޅު މަސައްކަތްތަކެއް ކުރާ ބައެއް ކަމަށްވާނަމަ، ސިޔާސީ ވިސްނުމުގެ ތަފާތުވުންތަކަށްވެސް ޖާގައެއް ނުލިބޭނެ ކަމަށް ވިދާޅުވިއެވެ.
ކިޔުންތެރިންގެ ހިޔާލު